1 "सर्वशक्तिमान परमेशर दुष्टां केरो न्याय केरनेरे लेई वक्त किजो नईं ठहरावरो,

ते ज़ैना लोक तैसेरू ज्ञान रखतन तैना तैसेरे न्यायेरे ठहरावरे दिहाड़े किजो हेरी न सकन?

2 किछ लोक ज़मीनरी हद बद्धातन,

ते भैड्डां-छ़ेल्‍ली थुसोड़तां च़ारतन।

3 तैना अनाथां केरे गधे नेतन,

ते विधवारे दांते एप्पु कां रखतन ज़ांतगर तै तैन केरो कर्ज़ो न मुकाए।

4 तैना ज़रूरतमन्द लोकन बत्ती मरां कढतन,

ते मुल्खेरे गरीब लोकन अकोट्ठे छ़पनू पेते।

5 हेरा, गरीब लोक जंगली गधेरे ज़ेरेन

अपने कम्मे ते किछ रोट्टी मेहनती सेइं तोप्पने निस्सी गातन;

तैन केरे बच्‍चां केरि रोट्टी तैन्न जंगले मरां मैलतीए।

6 तैना उडारे मां खानेरी चीज़ां अकोट्ठी केरतन,

ते दुष्टां केरि बच़ोरी दाछ़ जमा केरनी पेतीए।

7 राती तैन्न लिगड़ां केरे बगैर नग्गू रानू

ते हिवंतड़ेरे वक्ते बगैर छ़ुंहें रानू पेते।

8 तैना पहाड़ां केरि झ़ेड़ी सेइं सिज़्ज़ोरे रहतन,

ते छ़पनेरी ठार न मैल्हनेरे वजाई सेइं चट्टानी सेइं पलेटोतन।

9 किछ दुष्ट लोक ज़ैन बच्‍चन बाजी न भोन अम्मरे छैती करां थसोड़तन,

ते गरीब लोकां केरे बच्‍चे औगी रखतन।

10 ज़ैस सेइं तैना लिगड़ां केरे बगैर नग्गे फिरतन;

ते ढ्लुखरे मारे, पूले घरातन।

11 तैना दुष्टां केरे दिवारां केरे अन्तर तेल कढतन

ते तैन केरे कुण्डन मां दाछ़ ढ्लन्च़तन, पन फिरी भी ट्लिशोरे रहतन।

12 तैना बड़े नगरे मां ट्लासतन,

ते ज़खमी कियोरां केरो दिल फरियाद केरते;

पन परमेशर बुरैइयरो हिसाब न ने।

13 फिरी किछ लोक लौई सेइं बैर रखतन,

तैना तैसेरे बत्तन न पिशानन,

ते तैसेरे बत्तन मां बनोरे न रान।

14 खूनी, लौ भोते उठतां गरीब मैन्हु मारते,

ते राती च़ोर बेनि गाते।

15 व्यभिचार केरनेबालो एन सोचतां कि कोई मीं लेही न सके,

दिहाड़ो डुबनो बलगतो रहते,

ते तै अपनु तुत्तर छ़ुपेइतां भी रखते।

16 तैना आंधरेरे वक्ते घरन मां च़ोरी केरतन

ते दीसां छ़पोरे रहतन;

तैना लौई ज़ानन भी न।

17 किजोकि तैन सेब्भन झ़ेझ़री लौ

गुप आंधरेरे ज़ेरि लगतीए

बड़े आंधरेरो डर तैना ज़ानतन।

18 तैना हड़ैई पुड़ पोल्‍ली ज़ेरि चीज़रे ज़ेरे आन,

तैन केरे हिस्से धेरतरे रानेबाले कोसतन,

ते तैना अपनि दाछ़री बागन मां वापस एज्जी न सकन।

19 ज़ेन्च़रे शुकोरे ते धुप्पी सेइं हिंवेरू पानी शुक्‍की गाते

तेन्च़रे पापी लोक पाताले मां शुक्‍की गातन।

20 ज़र्म देनेबाली अम्मा भी तैस बिसरी गातीए,

ते कीड़े तैन खातन,

एजने बाले वक्ते मां तैसेरी याद न राली;

एन्च़रां बुरू कम केरनेबालो बुट्टेरो ज़ेरो कट्टो गाते।

21 तै बेऔलाद कौन्शी लुटते ज़ैस कधी बच्‍चे न भोए,

ते विधवा सेइं भलियाई केरनी न चाए।

22 परमेशर बहादरन भी अपने शेक्ति सेइं खिचते,

ज़ै ज़ींते रानेरी उमीद न रख्खे, तै भी फिरी उठते।

23 परमेशर तैन्न सुरक्षित रखते, ते तैन्न सम्भालते;

ते तैसेरी सिद्धी नज़र तैन केरि चाली पुड़ लगोरी रहतीए।

24 तैना बद्धतन, तैखन थोड़े च़िरे मां गाते रहतन,

तैना दब्बे गातन ते सेभी केरे ज़ेरे रख्खे गातन,

ते अन्नेरे ज़ेरे कट्टे गातन।

25 कुन इन सब सच़ नईं! कौन मीं झूठो साबत केरेलो?

कौन इन हिरालो कि मेरी गल्‍लां गलत आन?"