1 अय्यूबे होरि भी अपनि डुग्घी गल्‍लां केरतां ज़ोवं,

2 "अवं परमेशरेरे ज़िन्दगरी कसम खाताईं ज़ैनी मेरो न्याय बिगाड़ो,

मतलब तैस सर्वशक्तिमानेरे ज़िन्दगरी ज़ैनी मेरो प्राण ट्लिठो कियो।

3 किजोकि हुन्ना तगर मेरो शाह बराबर एइते,

ते परमेशरेरी आत्मा मेरे नक्‍के मां बनोरी राई।

4 अवं इन ज़ोताईं कि मेरे ऐशी मरां कोई बुरी गल न निस्सेली,

ते अवं झूठी गल्‍लां न ज़ोइलो।

5 परमेशर न केरे कि अवं तुसन लोकन सच़्च़ो ठहरेइलो,

ज़ांतगर मेरे प्राण न निस्सन तैखन तगर अवं अपने ईमानदैरी करां दूर न भोइलो।

6 अवं अपनि धार्मिकता ट्लेइतां आईं ते तैस हथ्थे मरां गाने न देइलो;

किजोकि मेरो मन ज़िन्दगी भर मीं दोषी न ठहरालो।

7 मेरो दुश्मन दुष्टां केरो ज़ेरो,

ते ज़ैना मेरे खलाफ खड़े भोतन तैना अधर्मी केरे ज़ेरे ठहरे।

8 ज़ैखन परमेशर अधर्मी मैन्हेरो प्राण नेते,

तैखन अगर तैने धन भी हासिल कियोरू भोए, त फिरी भी तैसेरी कुन उमीद राली?

9 ज़ैखन तै मुसीबती मां पे,

तैखन कुन परमेशर तैसेरी फरियाद शुनेलो?

10 कुन तैस सर्वशक्तिमान परमेशरे मां सुख मैल्ही सखेलू,

ते हर वक्त परमेशरे पुकैरी सकेलो?

11 अवं तुसन परमेशरेरे कम्मेरे बारे मां शिक्षा देइलो,

ते सर्वशक्तिमान परमेशरेरी गल अवं न छ़ुपेइलो

12 हेरा, तुसेईं सेभी लोकेईं एप्पु लाऊं,

फिरी तुस बेकार खियाल किजो ट्लेइतां रखतथ?

13 दुष्ट मैन्हेरो हिस्सो परमेशरेरे तरफां ईए,

ते ज़ुलम केरनेबालां केरो अंश ज़ै तैन सर्वशक्तिमान परमेशरेरे हथ्थे मैलतन, तै ईए, कि

14 चाहे तैसेरे बच्‍चे गिनती मां बेधी भी गान, फिरी भी तलवारारे लेई बधेले,

ते तैसेरी औलाद पेट भेरतां रोट्टी न खेइ सकेली।

15 तैसेरे ज़ैना लोक बच़ेले तैना मेरतां कब्री मां पुज़ेले;

ते विधवां लेरां न देली।

16 चाहे तै रुपेइये धूड़रे ज़ेरे अकोट्ठे केरतां रख्खे

ते लिगड़ां मित्तरे कनां केरे ज़ेरे बेशुमार तियार कराए,

17 तै तैन्न तियार कराए त सही, पन धर्मी तैन्न लालो,

ते तैसेरो रुपेइयो बेकसूर लोक एप्पु मांमेइं बंटेले।

18 दुष्टे अपनु घर गरज़ारेरू ज़ेरू बनेवरू,

ते उडारेरे पहरदारेरे लेई ज़ेरी कूड़ी बनाते।

19 तै अमीर भोइतां लेटी गाए पन तै बनोरो न रालो;

ज़ैखन एछ़्छ़ी घाड़ते त तैन सब च़लू गाते।

20 डर तैस पैनेरो ज़ेरो रुड़ालो,

राती आँधी तैस उडराली।

21 पूर्वी हवा* तैस तैसेरे रानेरे ठारारां एरी उडारेली, ते तै गातो रालो

ते तैस तैसेरे ठारां उडारतीए।

22 किजोकि परमेशर* तैस पुड़ आफतां बगैर तरस खेइतां छ़डेलो,

तैसेरे हथ्थेरां तै नश्शनू चालो।

23 लोक तैस पुड़ च़ैड़ी बज़ाले,

ते तैस पुड़ सीटी बज़ाले कि तै अपने ठारी पुड़ न रेइ बटेलो।"