सोपरेरी दलील
1 तैखन नामात मुल्खेरे रानेबाले सोपरे ज़ोवं,
2 "बेड़ि-बेड़ि गल्लां ज़ैना ज़ोई जेवरिन, कुन तैन केरो जुवाब दित्तोरो न लोड़े?
कुन ई फुज़ूल गल्लां केरनेबालो मैन्हु धर्मी ठहराव जेव?
3 कुन तेरी बेड्डी-बेड्डी गल्लां केरे वजाई सेइं लोक च़ुप रान?
ते ज़ैखन तू मज़ाक बनास, त कुन कोई तीं बेइज़्ज़त न केरे?
4 तू त परमेशरे सेइं इन ज़ोतस, ‘मेरी शिक्षा सही आए,
ते अवं परमेशरेरी नज़री मां पवित्र आईं।’
5 पन भलू भोए, कि परमेशर एप्पु गल्लां केरे,
ते तेरे खलाफ आशी खोल्ले,
6 ते तीं पुड़ अक्लरी छ़ेपोरी गल्लां बैंदी केरे,
कि तैन केरो भेद तेरी समझ़ी करां बेद्धतां आहे।
एल्हेरेलेइ इन ज़ान, कि परमेशर तेरे अधर्मे मरां बड़ू किछ बिसरी गाते।
7 कुन तू परमेशरेरो डुग्घो भेद हासिल केरि सकतस?
ते कुन तू सर्वशक्तिमान परमेशरेरो भेद पूरे तरीके सेइं पेरखी सकतस?
8 तै अम्बरेरो ज़ेरो उच्चोए; तू कुन केरि सकतस?
तै पाताले करां डुग्घो आहे, तू कोड़ि सेमझ़ी सकतस?
9 तैसेरी नाप धेरती करां भी लम्मी आहे,
ते समुन्दरे करां बिल्ली आहे।
10 ज़ैखन परमेशर मझ़मेइं भोइतां च़ले अगर तै एइतां तीं कैदखाने मां छ़डे
ते आदालती मां कुजाए, त कौन तैस रोकी सकते?
11 किजोकि तै पाखंडी मैन्हु केरो भेद ज़ानते,
ते बुराई बगैर सोच-विचार केरतां भी ज़ानते।
12 ज़ेन्च़रे अक जंगली गधी मैन्हेरे बच्चे ज़र्म न देइ बटे,
तेन्च़रे बेअक्ल मैन्हु भी अक्लमन्द न बेनि सके;
13 अगर तू अपनो मन बदलस,
ते मद्दतरे लेई परमेशरेरे पासे अपने हथ अग्रोवं केरस,
14 ते अगर कोई बुरां कम्मां तीं करां भोवरां भोन त तैना दूर केर,
ते अपने डेरन मां कोई बुराई न राने दे,
15 तैखन त तू पक्की अपनि क्रोड़ी बगैर दोषे खड़ी केरि सकेलो;
ते तू मज़बूत ते बगैर डरे खड़ो रालो।
16 तैखन तू अपनो दुख बिसरी गालो,
तू तैस दुखे, तैस पैनेरो ज़ेरो याद केरेलो ज़ैन रुड़ी जेवरू भोए।
17 ते तेरी ज़िन्दगी दुपहरन करां भी जादे लौई बाली भोल्ही;
ते चाहे आंधरू भी भोए फिरी भी तैन झ़ेझ़ेरे लौअरू ज़ेरू भोइ गालू।
18 ते तीं उमीद भोल्ही, इस वजाई सेइं तू निडर रालो;
ते अपने च़ेवरे पासन हेरी-हेरी तू बगैर डरे आराम केरि सकेलो।
19 ते ज़ैखन तू आराम केरनेरे लेई लेटेलो, तैखन कोई तीं न डरालो;
ते बड़े लोक तेरे मद्दतरे लेई तेरे पासे तकेले।
20 पन दुष्ट लोकां केरि एछ़्छ़ी धुंधली भोइ गैली,
ते तैन्न कोई छ़पनेरी ठार न मैल्हेली,
ते तैन केरि उमीद ईए भोल्ही कि प्राण निस्सी गान।"