1 हे मेरे मट्ठा, मेरी शिक्षाई न बिसरां;

ते मेरे हुक्म अपने दिले मां रेखां;

2 किजोकि एरू केरने सेइं तेरी उमर बधेली,

ते तू बड़े सुखे सेइं रालो।

3 ईमानदारी ते वफादारी तीं करां अलग न भोए;

बल्के तैन्न अपने गलेरो हार बना,

ते अपने दिलेरे तेख्ती पुड़ लिख।

4 तैखन तीं परमेशर ते मैन्हु दूईयां केरो अनुग्रह मैल्हेलो,

तू बड़ो इज़्ज़तदार भोल्हो।

5 तू अपनि समझ़रो सहारो न नेइयां,

बल्के पूरे मने सेइं यहोवा पुड़ भरोसो रेखां।

6 तैस्से याद केरतां सब कम्मां केरनां,

तैखन तै तेरे लेई सिद्धी बत कढेलो।

7 अपने नज़री मां अक्लमन्द नईं बन्नू;

यहोवारो डर मन्नो, ते बुरैई करां अलग रानू।

8 एरू केरने सेइं तेरी जान नीरोग,

ते तेरी हेड्डी तंदरुस्त रहेली।

9 अपने जाईदातरे ज़िरिये

ते अपनि ज़मीनरी सारी पेइली फसल देइतां यहोवारी आदर केरनी;

10 एन्च़रां तेरे गुदाम पूरे भरोरे राले

ते तेरे रस्सेरे कुण्डन मरां नंव्वो दाछ़रो रस भेरोइतां बेइरोवं निस्सेलो।

11 हे मेरे मट्ठा, यहोवारी शिक्षा करां तुत्तर नईं फिरानू,

ते ज़ैखन तै तीं झ़िड़के, तैखन तू बुरू न बुझ़ां,

12 ज़ेन्च़रे बाजी अपने ट्लारे मट्ठे डांटते,

तेन्च़रे यहोवा ज़ैस सेइं प्यार केरते तैस डांटते।

13 केत्रो धने तै मैन्हु ज़ैस अक्ल मैलतीए, ते तै मैन्हु ज़ै समझ़ हासिल केरे,

14 ज़ै फैइदो अक्ली सेइं हासिल भोते, तै चाँदी हासिल केरने करां जादे,

ते तैसेरो फैइदो शुद्ध सोन्नेरे फैइदे करां भी बेद्धतां आहे।

15 तै बड़े कीमती गेहन्न करां जादे कीमतीए,

ते ज़ेत्री चीज़ां केरि तू इच्छा केरतस, तैन मरां कोई भी तैसेरे बराबर न ठहरेली।

16 तैसेरे देइने हथ्थे मां लम्मी उमरे,

ते तैसेरे बांए हथ्थे मां दौलत ते आदर आहे।

17 तैसेरी बत्तां आनन्देरी आन,

ते तैसेरी सब बत्तां सुखे सेइं भेरतन।

18 ज़ैना अक्ल कबूल केरतन,

तैन केरे लेई तै ज़िन्दगरो बुट बनतीए; ते ज़ैना तैस ट्लेइतां रखतन, तैना धन आन।

19 यहोवा ज़मीनरी बुनीयाद अक्ली सेइं रख्खी;

ते सुर्ग समझ़रे ज़िरिये कायम कियूं।

20 तैस्से ज्ञानेरे ज़िरिये डुग्घे समुन्दरेरे नाग निस्से,

ते अम्बरे मरां ट्लेल पेतीए।

21 हे मेरे मट्ठा, खरी अक्ल ते ज़मीरे एप्पु कां रख

ते अपने नज़री करां दूर भोने न दे,

22 तैखन इन सेइं तीं ज़िन्दगी मैल्हेली,

ते इनां तेरे गलेरो हार बनेले।

23 तैखन तू अपने बत्ती पुड़ निडर च़लेलो,

ते तेरे पव्वन ठोकर न लग्गेली।

24 ज़ैखन तू लेटेलो, तैखन डर न लग्गेलो,

ज़ैखन तू झ़ुलेलो, तैखन आरामेरी निड्ल एज्जेली।

25 अचानक एजने बाले डरे करां नईं डरनू,

ते ज़ैखन दुष्टन पुड़ आफत एज्जे,

तैखन घबरानू नईं;

26 किजोकि यहोवा तीं सहारो देलो,

ते तेरे पव्वन फंदे मां फसने न देलो।

27 ज़ैना भलियाई केरनेरे काबलन तैन केरू भलू ज़रूर केरनू,

अगर एरू केरनू तेरी शेक्ति मां आहे।

28 अगर तीं कां देने जो किछ भोए,

त अपने सैथी सेइं नईं ज़ोनू कि गा कालां फिरी एज्जां, अवं कालां तीं देइलो।

29 ज़ैखन तेरो पड़ोसी तीं कां तेरे भरोसे रहते,

तैखन तैसेरे खलाफ बुरी योजना न बनेइयां।

30 ज़ैने मैन्हे तीं सेइं बुरो सलूख न कियोरो भोए,

तैस सेइं बगैर वजां मुकदमो खड़ो नईं केरनो।

31 फसाद केरनेबाले मड़देरे बारे मां जलन नईं केरनि,

न तैसेरी ज़ेरि चाल च़लनी;

32 किजोकि यहोवा बुरे मैन्हु सेइं नफरत केरते,

पन तै अपनो भेद धर्मी लोकन पुड़ बांदो केरते।

33 दुष्टेरे घरे पुड़ यहोवारी लानत एइतीए

ते धर्मी लोकां केरि रानेरी ठारन पुड़ तैसेरी बरकत भोतीए।

34 मज़ाक बनाने बालां केरो तै ज़रूर मज़ाक बनाते;

पन हलीम लोकन पुड़ तै अनुग्रह केरते।

35 अक्लमन्दन आदर मैल्हेली,

पन बेवकूफां केरि तरक्‍की बेइज़्ज़तरी वजा भोल्ही।