1 एल्हेरेलेइ, ज़ैना गल्‍लां असेईं शुनोरिन, तैन पुड़ असेईं होरो भी मन लेइतां ध्यान कियेरू लोड़े, कोस्कोई एरू न भोए, कि असां टेपलोइतां तैन करां दूर च़ले गाम। 2 किजोकि ज़ैन वचन परमेशरे स्वर्गदूतां केरे ज़िरिये ज़ोवरू थियूं, तैन सच़्च़ू साबत भोवं, ते हर एक्‍की पाप केरनेबाले ते हुक्म न मन्नेबाले सज़ाह मैल्ही। 3 त असन भी सज़ाह मैल्हेली, अगर अस एत्री महान मुक्ति करां बे खबर राए त। ज़ेसेरे बारे मां पेइले प्रभुए एप्पू ज़ोवरूए, ते ज़ैन चेलेईं एन प्रभु करां शुनोरू थियूं तैन केरे ज़िरिये असन याकीन भोवं कि एन सच़्च़े। 4 परमेशरे भी निशान ते चमत्कार ते बड्डां-बड्डां कम्मां केरे ज़िरिये ते अपने मेर्ज़रे मुताबिक लोकन पवित्र आत्मारे ज़िरिये वरदान देइतां इन साबत कियूं।

5 परमेशरे एजने बैली दुनिया ज़ेसेरे बारे मां अस ज़ोने लगोरेम, स्वर्गदूत केरे अधीन मां न की पन प्रभु यीशुएरे अधीन की। 6 बल्के पवित्रशास्त्रे मां कोस्कोई केन्चे परमेशरे सेइं एन ज़ोवरूए,

"मैन्हु कुन चीज़े, ज़ेसेरे बारे मां तू सोचतस?

या इन्सान कौने, कि तू तैसेरी फिक्र केरतस?

7 तीं तै शेक्ति मां किछ वक्तेरे लेई स्वर्गदूतन करां थोड़ो ज़ेरो घट कियो,

ते तीं तैस राज़ेरी ज़ेरि महिमा ते आदर दित्तोरीए, ते तैस अपने हथ्थां केरे कम्मन पुड़ अधिकार दित्तो।

8 तीं तैस सेब्भी चीज़न पुड़ अधिकार दित्तोरोए,"

ज़ैखन सब किछ तैसेरे अधिकारे मां कियूं,

ते किछ भी बाकी न रख्खू, ज़ैन तैसेरे अधीन न भोए। पन असां हुन्ना तगर सैरी चीज़ां तैसेरे अधिकारे मां न लहम। 9 पन असां यीशु लहतम, ज़ै स्वर्गदूतन करां किछ वक्तेरे लेई निकड़ो कियोरो थियो, ताके तै परमेशरेरे अनुग्रहे सेइं सेब्भी केरे लेई अपनि जान दे। किजोकि यीशुए दुख बरदाश कियो ते मरो, ते हुनी अस ज़ानतम कि तैस महिमा ते आदर दित्तोरीए। 10 परमेशरे सब किछ बनाव, ते तै सब किछ अपने लेई सुमैलतां रखते। परमेशरे ठीक कियूं ज़ैन तैनी दुखेरे ज़िरिये यीशु सिद्ध कियो, ताके तै बड़े लोकन महिमाई मां पुज़ाए। किजोकि यीशु ही आहे ज़ै असन मुक्तरे पासे नेते। 11 किजोकि पवित्र केरनेबालेरो ते पवित्र भोनेबालां केरो बाजी अक्‍के, एल्हेरेलेइ यीशु तैन जो ढ्ला बेइन ज़ोने करां न शरमाए। 12 पन मसीह परमेशरे सेइं ज़ोते,

"अवं अपने लोकन इन ज़ोलो कि तीं मेरे लेई इन कियोरूए,

ते तैन केरे सभाई मां तेरे नंव्वेरू गीत ज़ोइलो।"

13 ते फिरी तै ज़ोते,

"अवं तैस पुड़ भरोसो रेखेलो।"

ते फिरी तै ज़ोते,

"अवं तैन लोकन सेइं साथी भोनोईं, ज़ैना परमेशरे मीं दित्तोरेन।"

14 किजोकि ज़ेन्च़रे परमेशरेरे बच्‍चे, मैन्हु आन, तेन्च़रे यीशु भी तैन केरो ज़ेरो मैन्हु बनो। परमेशरे एन एल्हेरेलेइ कियूं ताके तैसेरे मौतरे ज़िरिये शैताने बरबाद केरे ज़ैस कां मौतरो अधिकार थियो। 15 ते एन्च़रे तैनी तैना आज़ाद किये ज़ैना मौतरे डरे सेइं सैरी उमरी गुलामेरे ज़ेरे ज़ीते थिये। 16 किजोकि प्रभु यीशु स्वर्गदूतां केरि नईं बल्के अब्राहमेरे वंशेरी मद्दत केरते। 17 एल्हेरेलेइ यीशु मसीहे हर गल्‍ली मां मैन्हु केरो ज़ेरो बन्नू ज़रूरी थियूं, ताके सेब्भी केरे पापां केरे बलिदानेरे लेई परमेशरेरे सामने दया केरनेबालो ते ईमानदार महायाजक बने। 18 किजोकि यीशुएरी अज़मैइश कीजेई ते तैनी एप्पू दुख झ़ैल्‍लोरोए, एल्हेरेलेइ तै तैन लोकां केरि मद्दत केरि बटते, ज़ैना अज़मैइशरो सामनो केरतन।