1 परमेशरे बड़े पेइले इश्शे दादे पड़दादन सेइं बड़े बारे ते अलग-अलग किसमे सेइं नेबी केरे ज़िरिये गल्‍लां की। 2 पन इन आखरी दिहाड़न मां परमेशरे असन सेइं अपने मट्ठेरे ज़िरिये गल्‍लां की, ज़ैन तैनी सैरी चीज़ां केरू बारस ठहराव ते तैसेरे ज़िरिये परमेशरे सारी सृष्टि बनाई। 3 मट्ठू परमेशरेरी महिमारू प्रकाशे, ते तैन हर किसमे सेइं परमेशरेरू ज़ेरूए, तैन्ने सैरी चीज़न अपने शेक्तरे वचनेरे ज़िरिये सेइं सम्भालते, तैन्ने लोकन पापन करां शुद्ध केरतां सुर्गे मां परमेशरेरे महिमाई मां देइने पासे बिश्शू। 4 एन केरने सेइं परमेशरे मट्ठू, स्वर्गदूतन करां महान कियूं, ते ज़ैन नवं तैस दित्तू जेवं तैन स्वर्गदूतन करां महाने।

5 किजोकि परमेशरे स्वर्गदूतन मरां कोन्ची सेइं कधे नईं ज़ोवरू,

"तू मेरू मट्ठू आस;

अज़ अवं इन बांदू केरताईं तू मेरू मट्ठू आस"

ते फिरी परमेशरे केन्ची स्वर्गदूते सेइं इन नईं ज़ोवरू,

"अवं तैसेरो बाजी भोइलो,

ते तैन मेरू मट्ठू भोल्हु"

6 ते फिरी परमेशरे अपने पेइले मट्ठे दुनियाई मां भेज़ने करां पेइलू, इन ज़ोवं, "परमेशरेरे सब स्वर्गदूत तैस कां मथ्थो टेकन।" 7 परमेशर स्वर्गदूतां केरे बारे मां इन ज़ोते,

"‘तै अपने स्वर्गदूतन हवारे ज़ेरे बनाते,

ते अपने सेवकन अग्गरे लप्परे ज़ेरे बनाते।’

8 पन परमेशरे अपने मट्ठेरे बारे मां ज़ोते,

‘हे परमेशर तेरू राज़ सदा रालू,

ते तू न्याये सेइं राज़ केरेलो।

9 ज़ैन रोड़ूए तैस केरने सेइं तू प्यार केरतस ते ज़ैन गलते तैन केरने सेइं नफरत केरतस;

एल्हेरेलेइ तेरे परमेशरे तू च़ुनोरोस

ते तेरे सैथन करां जादे तीं आदर ते आनन्द दित्तोरोए।’

10 ते पवित्रशास्त्र इन भी ज़ोते, ‘हे प्रभु, तीं शुरू मां दुनियारी रच़ना की,’

ते ज़ैन किछ अम्बरे मांए तैन तीं बनावं।

11 तैन सब किछ खतम भोइ गानूए; पन तू हमेशा रालो;

ते तैन सब किछ लिगड़ां केरू ज़ेरू पुरानू भोइ गालू।

12 ते तू तैन च़ादरारू ज़ेरो बनालो,

ते तैन लिगड़ां केरू ज़ेरू बेदलोई गालू;

पन तू कधे न बेदलोस;

ते तेरी ज़िन्दगी कधी खतम न भोल्ही।

13 ते परमेशरे स्वर्गदूतन मरां केस सेइं किताली ज़ोवं,

‘तू मेरे देइने पासे आदरारे ठैरी बिश,’

ते अवं तेरे दुश्मन तेरे अधीन केरेलो।"

14 तैना सब स्वर्गदूत सिर्फ परमेशरेरे सेवक आन; परमेशरे तैना तैन लोकां केरि हिफाज़त केरनेरे लेई भेज़ोरेन ज़ैन मुक्ति मैल्होरीए।