Apocalipse 4

सुर्गे मां आराधना

1 इना गल्‍लां हेरनेरां पत्ती, मीं सुर्गे मां अक दार खुल्‍लोरू लाव। ते मीं सेइं कोई गल्‍लां केरने लगो ई तैए थियो ज़ैने मीं सेइं पेइली गल्‍लां की, तैसेरी आवाज़ नरशिंगेरी ज़ेरि थी। तैने मीं सेइं ज़ोवं, "इड़ी बा एई: अवं तीं तैना गल्‍लां हरेइलो, ज़ैन केरू इन गल्‍लां केरे पत्ती पूरू भोनू ज़रूरीए।" 2 अकदम पवित्र आत्मां अवं अपने कैबू मां कियो; ते मीं सुर्गे मां अक तखत लाव ते तैस तखते पुड़ कोई बिशोरो लाव। 3 ते ज़ै तैस तखते पुड़ बिशोरो थियो, तै यशब ते माणिक्य कीमती घोड़ां केरो ज़ेरो लेइहोतो थियो। ते तैस तखते च़ेवरे पासन भुन्ज़ल्‍लैठ थी, ज़ै मरकत घोड़ेरी ज़ेरि लेइहोती थी। 4 तैस तखतेरे च़ेवरे पासन चोब्ही तखत थिये; ते तैन तखतन पुड़ चोब्ही बुज़ुर्ग छ़ित्तां लिगड़ां लेइतां बिश्शोरे थिये, ते तैन केरे क्रोड़न पुड़ सोन्नेरां ताजां थियां। 5 ते तैस तखते मां बिजली ते गुड़ने ते तखतेरे सामने अग्गरे सत दीये बलने लेवरे थिये, इन परमेशरेरी सत आत्मा आन। 6 ते तैस तखतेरे सामने शीशेरो साफ समुन्दर थियो ज़ै हिंवेरो ज़ेरो थियो, ते तखतेरे मझ़ाटे ते तखतेरे च़ेवरे पासन प्राणी थिये, तैन केरे सारे जानी पुड़ एछ़्छ़ी-एछ़्छ़ी थी। 7 पेइलो प्राणी शेरेरो ज़ेरो थियो, ते दूइयोवं प्राणी दांतेरो ज़ेरो, ट्लेइयोवं प्राणी मैन्हेरो ज़ेरो थियो, ते च़ेवरोवं प्राणी उडरने बाले उकाबेरो ज़ेरो थियो। 8 ते च़ेवरे प्रैणी केरां शा-शा फंघां थियां ते तैन पुड़ एछ़्छ़ी थी इड़ी तगर कि फंघन अन्तर भी एछ़्छ़ी थी, तैना रात दिहाड़ी बगैर आरामे इन ज़ोते रहतन,

"पवित्र, पवित्र, प्रभु-परमेशर, सर्वशक्तिमान,

ज़ै थियो, ज़ै आहे, ते ज़ै एजनेबालोए।"

9,10 ज़ै तखते पुड़ बिशोरो ज़ै हमेशा-हमेशा ज़ींतोए, तैना प्राणी तैसेरी महिमा ते आदर ते शुक्र केरेले, ज़ैखन चोब्ही बुज़ुर्ग तखतन पुड़ बिशने बाले कां मथ्थो टेकेले, ते तैसेरी आराधना केरेले। ते तैना अपना-अपना ताजां तखतेरे सामने इन ज़ोइतां रखेले:

11 "हे इश्शे प्रभु-परमेशर, तींए सैरी चीज़ां बनेइ।

तेरे मेर्ज़ी सेइं सब चीज़ां बनेइ जेई ते वजूदे मां एई।

एल्हेरेलेइ तूए महिमा, आदर ते शेक्तरे काबलस।"