1 अवं पौलुस ई चिट्ठी लिखने लगोरोईं। परमेशरे अवं यीशु मसीहेरो प्रेरित भोनेरे लेई च़ुनो, ताके अवं इस सन्देशेरो प्रचार केरि कि परमेशरे यीशु मसीह पुड़ विश्वास केरनेरे ज़िरिये वाधो कियो कि हमेशारी ज़िन्दगी देलो। 2 अवं ई चिट्ठी ट्लारे तीमुथियुसे जो लिखने लगोरोईं, ज़ैन मेरे मट्ठेरू ज़ेरूए, हे तीमुथियुस अवं प्राथना केरताईं बाजी परमेशर ते इश्शे प्रभु यीशु मसीह तीं अनुग्रह ते दया ते शान्ति देतो राए।

3 ज़ैस परमेशरेरी सेवा अवं अपने दादे पड़दादां केरे रीति पुड़ शुद्ध ज़मीरे सेइं केरताईं, तैसेरू शुक्र भोए, कि अवं एपनी प्राथनान मां तीं रात दिहैड़ी याद रखताईं। 4 मीं यादे ज़ैखन अस अलग भोने लगोरे थिये तैखन तू केन्च़रे लेरां देने लगोरो थियो, ते तीं सेइं मिलनेरी बड़ी इच्छा रखताई कि ज़ैखन मिली त अवं आनन्दे सेइं भेरि गेइ। 5 ते अवं तेरे अम्मा यूनीके ते तेरी नानी लोइसरो तै सच़्च़े विश्वास याद केरताईं। तेरो विश्वास भी तेरहो आहे, ते मीं याकीने तीं मां भी आहे। 6 एल्हेरेलेइ अवं तीं याद कराताईं, कि तू परमेशरेरे तैस वरदाने ज़ैन मेरे हथ रखने सेइं तीं मैल्होरू थियूं चमका। 7 किजोकि परमेशर अस डरपोक नईं बनावरे बल्के तैसेरो आत्मा इश्शे दिलन मज़बूत केरते, ते मद्दत केरते कि अस होरि लोकन सेइं प्यार केरम ते ताके आपे कैबू मां रखम।

8 एल्हेरेलेइ होरि लोकन प्रभु यीशुएरे बारे मां ज़ोने करां शरमा ते एल्हेरेलेइ शरमा कि अवं प्रभुएरी सेवा केरनेरे लेई कैदे मां आईं। बल्के तू परमेशरेरे तैस शेक्ति इस्तेमाल केर ते मीं सेइं साथी खुशखेबरारे लेई दुख झ़ैलने मां शामल भो। 9 परमेशरे असन मुक्ति दित्ती, ते अस पवित्र ज़िन्दगी ज़ींनेरे लेई कुजाए, तैने अस एल्हेरेलेइ नईं कुजेवरे कि असेईं रोड़ां कम्मां कियां, किजोकि दुनिया बनाने करां पेइलो परमेशरेरो ई मकसद थियो कि तै यीशु मसीह इश्शे लेई इस दुनिया मां भेज़तां असन पुड़ अनुग्रह हिराए। 10 पन हुनी इश्शे मुक्ति देनेबाले यीशु मसीह एवरोए ते तैनी अपनो अनुग्रह हिरावरोए। तैने मौतरी शक्ति नाश की, तैने असन खुशखेबरारे ज़िरिये हमेशारे ज़िन्दगरी बत हिराई। 11 इस खुशखेबरारे लेई परमेशरे अवं प्रचारक ते प्रेरित ते शिक्षा देनेबालो च़ुनो। 12 एल्हेरेलेइ अवं कैदखाने मां दुख भी झ़ैल्‍लने लगोरोईं, पन शरमेई न, किजोकि अवं मसीहे ज़ानताईं ज़ैस पुड़ मीं विश्वास कियोरोए, ते मीं याकीने, कि ज़ैन मसीहे दित्तोरू ज़ांतगर तै वापस न एज्जे तांतगर तै तैसेरी रखवाली केरि बटते। 13 ज़ैना रोड़ी शिक्षां तीं मीं करां शुनोरिन तैन तू मिसालरे रूपे मां रख, इन तू विश्वासे ते प्यारे सेइं साथी केर, किजोकि तू मसीह यीशु सेइं साथी अक भोवरोस। 14 ते तैस सच़्च़ेरी रखवाली केर, ज़ैन पवित्र आत्मारे ज़िरिये सेइं तीं सौंफोरू, ज़ै असन मां रहते।

15 तू ज़ानतस, कि आसिया इलाकेरे बड़े विश्वासी लोक ज़ैनेईं अवं शारोरोईं, ज़ैन मां फूगिलुस ते हिरमुगिनेसे भी अवं शारो। 16 उनेसिफुरूसेरे घराने पुड़ प्रभु दया केरे, किजोकि तै बड़े बार मीं कां अव ते मीं होसलो दित्तो, ते मीं सेइं कैदखाने मां एजनेरे लेई न शरमव। 17 पन ज़ैखन तै रोम नगरे मां अव, त बड़ी कोशिश केरतां तोपतां मीं सेइं मुलाकात केरि। 18 प्रभु न्यायेरे दिहाड़े अपनि महान दया उनेसिफुरूसे पुड़ हिराए। तू एप्पू रोड़े च़ारे ज़ानतस कि इफिसुस नगरे मां तैनी मेरी केत्री मद्दत की।