उत्पत्ति 24

इसहाकेरो ड्लाह

1 अब्राहम हुनी बुढो भोइ जेवरो थियो ते तैसेरी उमर बड़ी थी ते यहोवा परमेशरे तैस सेब्भी गल्‍लन मां बरकत दित्तोरी थी। 2 अब्राहमे अपने तैस नौकरे सेइं ज़ोवं, ज़ै तैसेरे घरे मां सियानो ते तैसेरी सारे जाईदाती पुड़ अधिकारी थियो, "अपनो हथ मेरी ज़ंघी हैठ रख*24:2 ज़ंघी हैठ रख तैन दिहाड़न एरू केरनू इन ज़ोतू थियूं कि ज़ै कसम खेवरीए तै ट्लुटे न।; 3 ते मीं सेइं अम्बर ते धेरतरे परमेशर यहोवारे इस बारे मां कसम खा, कि तू मेरे मट्ठेरे लेई कनानी लोकां केरे कुइयन मरां, ज़ैन मां अवं रहताईं, कोन्ची भी न आनेलो। 4 पन तू मेरे मुल्खे मां मेरे कुटमेरे लोकन मां गेइतां मेरे मट्ठे इसहाकेरे लेई अक कौन्श आनेलो।" 5 तैनी नौकरे तैस सेइं ज़ोवं, "अगर तै कौन्श इस मुल्खे मां मीं सेइं साथी एजनू न चाहे; त कुन अवं तेरे मट्ठे तैस मुल्खे मां ज़ैट्ठां तू एवरोस नेही सकताईं?" 6 अब्राहमे तैस सेइं ज़ोवं, "खबरदार, मेरे मट्ठे तैड़ी कधी न नेइयां।" 7 सुर्गेरे परमेशर यहोवाए, ज़ैनी अवं मेरे बाजी केरे घरे मरां ते मेरे रिश्तेदारन*24:7 मेरे रिश्तेदारन मेरी ज़र्म ठार। मरां कढो मीं सेइं कसम खेइतां ज़ोवं, कि "अवं ई मुल्ख तेरे खानदाने देइलो; तैए अपनो दूत तीं अग्री-अग्री भेज़ेलो, कि तू मेरे मट्ठेरे लेई तैट्ठां अक कौन्श आनेलो। 8 ते अगर तै कौन्श तीं सेइं साथी एजनू न चाहे त तू मेरी इस कसमी करां छुट्टी गालो; पन मेरे मट्ठे तैड़ी न नेइयां।" 9 तैखन तैनी नौकरे अपने मालिक अब्राहमेरी ज़ंघी हैठ अपनो हथ रेखतां तैस सेइं इस बारे मां कसम खई।

10 तैखन तै नौकर अपने मालिकेरे ऊँटन मरां दश ऊँट तैलतां ते तैसेरे सब रोड़ी-रोड़ी चीज़न मरां किछ-किछ नेइतां च़लो जेव; ते अरम्नहरैम सूबे*24:10 अरम्नहरैम सूबे मेसोपोटामिया मुल्ख मां नाहोर नगरे कां पुज़्ज़ो। 11 ते तैने ऊँट नगरे करां बेइर एक्‍की खुहे कां बिशाले। तै ड्लवझ़रो वक्त थियो, ज़ैस मौके कौन्शां पानी भरनेरे लेई गैतिन। 12 तै प्राथना केरने लगो, "हे मेरे मालिक अब्राहमेरे परमेशर यहोवा, अज़ मेरू कम पूरू केर, ते मेरे मालिक अब्राहमे पुड़ दया केर। 13 हेर, अवं पैनेरे इस नागे कां खड़ो आईं; ते नगरे मां रानेबाले लोकां केरि कुइयां पानी भरनेरे लेई एवरिन 14 एल्हेरेलेइ एरू भोए कि ज़ैस कुइये सेइं अवं ज़ोईं, ‘अपनो पैनेरो घड़ो मेरे पासे रख, कि अवं पानी पीं,’ ते तै ज़ोए, ‘यां, पी, बादे मां अवं तेरे ऊँटन भी पियाली,’ ई तैए भोए ज़ै तीं अपने दास इसहाकेरे लेई रख्खोरी भोए; एन्च़रां सेइं मीं पतो लग्गेलो कि तीं मेरे मालिके पुड़ दया कियोरीए।"

15 ते एरू भोवं कि ज़ैखन तै ज़ोई राहोरो थियो कि रिबका, ज़ै अब्राहमेरे ढ्ला नाहोरेरी कौन्श मिल्कारे मट्ठे, बतूएलेरी कुई थी, तै कंधे पुड़ घड़ो घिन्तां अई। 16 तै बड़ी खूबसूरत, ते कुवारी थी, ते तैसां कोन्ची मड़देरू तुत्तर न थियूं लाहोरू। तै पैनेरे नागे कां जेई, ते अपनो घड़ो भेरतां उबरे अई। 17 तैखन तै नौकर तैस सेइं मिलनेरे लेई दौड़ो, ते ज़ोवं, "अपने घड़े मरां मीं थोड़ू ज़ेरू पानी पीया।" 18 तैसां ज़ोवं, "हे मेरे मालिक, यां, पी," ते तैसां लूशी घड़ो ओसैलतां हथ्थे सेइं पानी पियावं। 19 ज़ैखन तैसां तैस पानी पियावं, तैखन तैसां ज़ोवं, "अवं तेरे ऊँटन भी तांतगर पानी भेरि-भेरि पियाली, ज़ांतगर तैना पीतां न रज़्ज़न।" 20 तैखन तै लूशी अपने घड़ेरू पानी कुण्डे मां उलटेइतां फिरी खुहे कां भरनेरे लेई दौड़ी; ते तैसेरे सब ऊँटां केरे लेई पानी कुण्डे मां भरू। 21 ते तै मड़द तैसेरे पासे च़ुप-च़ाप हैरान भोइतां तकतो राव ते इन सोचतो थियो कि यहोवा मेरू सफर कामयाब कियोरूए या नईं।

22 ज़ैखन ऊँटेइं पानी पीवं, तैखन तैनी मड़दे अध्धो तोलो*24:22 अध्धो तोलो 5.7 ग्राम सोन्नेरी अक नथ केढतां तैस दित्ती, ते दश तोले*24:22 दश तोले 115 ग्राम सोन्नेरे कंगन तैसारे हथ्थन लुवाए; 23 ते तैस पुछ़ू, "तू केसेरी कुई आस? इन मीं ज़ो। कुन तेरे बाजी केरे घरे मां इश्शे रानेरे लेई ठारे?" 24 तैसां जुवाब दित्तो, "अवं त नाहोरेरे कौन्श मिल्कारू मट्ठू बतूएलेरी कुई आईं।" 25 फिरी तैसां तैस सेइं ज़ोवं, "इश्शे इड़ी भूंस ते दानो बड़ोए, ते रानेरे लेई ठार भी आहे।" 26 तैखन तैनी नौकरे झुकतां यहोवा कां मथ्थो टेकतां ज़ोवं, 27 "धन आहे मेरे मालिक अब्राहमेरो परमेशर यहोवा, ज़ैनी अपनि दया ते सच़्च़ाई मेरे मालिके पुड़ेरां न हटाई: यहोवा अवं ठीक बत्तां च़लेइतां मेरे मालिकेरे रिश्तेदारां केरे घरे पुज़व।"

28 तैखन तैस कुइयां देवड़तां अपनि अम्मा जो इस बीतनारे बारे मां सारो बिस्तार शुनाव। 29 तैखन लाबान ज़ै रिबकारो ढ्ला थियो, बेइर खुहे कां तैस मड़दे कां दौड़तो जेव। 30 ते एरू भोवं कि ज़ैखन तैने तै नथ ते अपनि बेइन रिबकारे हथ्थन मां तैना कंगन लाहे, ते तैसेरी ई गल भी शुनी कि तैनी मड़दे मीं सेइं एरी गल्‍लां की; तैखन तै तैस मड़दे कां जेव; ते कुन हेरू, कि तै नागे कां ऊँटन कां खड़ोए। 31 तैने ज़ोवं, "हे यहोवारे तरफां धन मड़द अन्तर च़ल तू किजो बेइर खड़ोस? मीं तेरे लेई घर, ते ऊँटां केरे लेई भी ठार तियार कियोरीए।" 32 इस गल्‍ली पुड़ तै मड़द घरे मां जेव; ते लाबाने ऊँटां केरि कैठी खोलतां भूंस ते दानो दित्तो; ते तैस ते तैसेरे सैथन पव धोनेरे लेई पानी दित्तू। 33 तैखन अब्राहमेरे नौकरे खाने पीनेरे लेई किछ दित्तू; पन तैने ज़ोवं "अवं ज़ांतगर एजनेरी वजा न ज़ोईं, तांतगर किछ न खेइलो।" लाबाने ज़ोवं, "ज़ो।"

34 तैखन तैने ज़ोवं, "अवं अब्राहमेरो नौकर आईं। 35 यहोवा परमेशरे मेरे मालिके बड़ी बरकत दित्तोरीए; एल्हेरेलेइ तै महान मैन्हु भोवरोए; ते यहोवा तैस गोरू-गब्बां, सोन्नू-चाँदी, नौकर-नौकरैनी, ऊँट ते गधे दित्तोरेन। 36 ते मेरे मालिकेरे कौन्शी सारारे बुढे बारे मां तैस अक मट्ठू पैदा भोवरूए; ते तैस मट्ठे अब्राहमे अपनु सब किछ दित्तोरूए। 37 मेरे मालिके मीं ई कसम दित्तोरिए, कि ‘अवं तैसेरे मट्ठेरे लेई कनानी लोकां केरे कुइयन मरां ज़ैन केरे मुल्खे मां तै रहते, कोई कौन्श न आनेलो। 38 अवं तैसेरे बाजेरे घरे, ते कुटमेरे लोकन मां गेइतां तैसेरे मट्ठेरे लेई अक कौन्श आनेलो।’ 39 तैखन मीं अपने मालिके सेइं ज़ोवं, ‘अगर तै कौन्श मीं सेइं साथी न एज्जे।’ 40 तैखन तैने मीं सेइं ज़ोवं, ‘यहोवा, ज़ेसेरे सामने अवं वफादैरी सेइं च़लतो राहोरोईं, तै तीं साथी अपने दूत भेज़तां तेरू सफर कामयाब केरेलो; ते तू मेरे कुले, ते तू मेरे बाजी केरे घराने मरां मेरे मट्ठेरे लेई अक कौन्श ऐनी सकेलो। 41 तू तैखन मेरी इस कसमी करां छुटेलो, ज़ैखन तू मेरे कुलेरे लोकन मां पुज़ेलो; ते अगर तैना तीं कोई कौन्श न देन, त तू मेरी कसमी करां छुटेलो।’ 42 एल्हेरेलेइ अवं अज़ तैस खुहे कां नेड़े एइतां ज़ैखन ज़ोने लगो, ‘हे मेरे मालिक अब्राहमेरे परमेशर यहोवा, अगर तू मेरे इस सफरे कामयाब केरतस; 43 त हेर अवं पैनेरे इस खुहे कां नेड़े खड़ो आईं; ते एरू भोए, कि ज़ै कुई पानी भरनेरे लेई एज्जे, ते अवं तैस सेइं ज़ोईं, "अपने घड़े मरां मीं थोड़ू ज़ेरू पानी पीया," 44 ते तै मीं सेइं ज़ोए, "यां पी, ते अवं तेरे ऊँटां केरे लेई भी पानी भेरेली," तै तैए कौन्श भोए ज़ै तीं मेरे मालिकेरे मट्ठेरे लेई रख्खोरी भोए।’ 45 अवं मने-मने मां इन ज़ोई राहोरो थियो, कि हेरा रिबका कंधे पुड़ घड़ो घिन्तां अई; फिरी तै पैनेरे नागे कां ओस्तां पानी भरने लग्गी। मीं तैस सेइं ज़ोवं, ‘मीं, पानी पीया।’ 46 ते तैसां लूशी अपनो घड़ो कंधे पुड़ां ओसैलतां ज़ोवं, ‘यां, पी, बादे मां अवं तेरे ऊँटन भी पियाली,’ एन्च़रां मीं पीवं, ते तैसां मेरे ऊँटन भी पियावं। 47 तैखन मीं तैस पुछ़ू, ‘तू केसेरी कुई आस?’ ते तैसां ज़ोवं, ‘अवं त नाहोरेरी कौन्श मिल्कारू मट्ठू बतूएलेरी कुई आईं,’ तैखन मीं तैसेरे नक्‍के मां तै नथ, ते तैसेरां हथ्थन मां तैना कंगन लुवाए। 48 फिरी अवं मथ्थो टेकतां यहोवा कां झुको, ते अपने मालिक अब्राहमेरे परमेशर यहोवा जो धन ज़ोवं, किजोकि तैने अवं ठीक बत्तां पुज़व कि अवं अपने मालिकेरे मट्ठेरे लेई तैसेरे कुटमे मरां कुई ऐनी। 49 एल्हेरेलेइ हुनी, अगर तुस मेरे मालिके सेइं महरबानी ते सच़्च़ो सलूख केरनो चातथ, त मीं सेइं ज़ोथ; ते अगर न चाथ; त फिरी भी मीं सेइं ज़ोथ; ताके अवं होरि पासे च़लो गेईं।"

50 तैखन लाबान ते बतूएले जुवाब दित्तो, "ई गल यहोवा परमेशरेरे तरफां भोवरीए; एल्हेरेलेइ अस तीं सेइं न त भलू ज़ोई सकम ते न बुरू। 51 हेर, रिबका तेरे सामने, तैस नेही गा, ते तै यहोवा परमेशरेरे वचनेरे मुताबिक, तेरे मालिकेरे मट्ठेरी कौन्श भोइ गाए।" 52 तैन केरि ई गल शुन्तां, अब्राहमेरे नौकरे तल्‍ले झुकतां यहोवा कां मथ्थो टेको। 53 फिरी तैसेरे नौकरे सोन्ने चैंदरो गेहनो, ते लिगड़ां केढतां रिबका दित्तां; ते तैसेरे ढ्लाए ते अम्मा भी तैने कीमती-कीमती चीज़ां दित्ती। 54 तैखन तैने ते तैसेरे सैथेईं भी रोट्टी खाई, ते रात तैट्ठी गुज़ारी। तैने झ़ेझ़ां उठतां ज़ोवं, "मीं अपने मालिके कां गानेरे लेई भेज़ा।" 55 रिबकारे ढ्लाए ते अम्मा ज़ोवं, "कुई असन कां किछ दिहाड़े, मतलब घटे करां घट दश दिहाड़े राने दे; फिरी तैसेरे बाद तै च़ली गाली।" 56 तैनी तैन सेइं ज़ोवं, "यहोवा ज़ैने मेरू सफर कामयाब कियोरूए; एल्हेरेलेइ तुस मीं न रोका हुनी मीं भेज़ा, कि अवं अपने मालिके कां गेईं।" 57 तैनेईं ज़ोवं, "अस कुइये कुजेइतां पुछ़तम, ते हेरतम, कि तै कुन ज़ोतीए।" 58 ते तैनेईं रिबका कुजेइतां तैस पुछ़ू, "कुन तू इस मैन्हु सेइं साथी गाली?" तैसां ज़ोवं, "हाँ अवं गाली।" 59 तैखन तैनेईं अपनि बेइन रिबका, ते तैसेरी घाई ते अब्राहमेरो नौकर, ते तैसेरे साथी सब भेज़े। 60 ते तैनेईं रिबका आशिर्वाद देइतां ज़ोवं, "हे इश्शी बेइन, तू हज़ारां ते लखां केरि अम्मा भोस, ते तेरू खानदान अपने दुशमनां केरे नगरां केरू मालिक भोए।" 61 तैखन रिबका अपनि सहेलन सने च़ली; ते ऊँटे पुड़ च़ेढ़तां तैस मड़दे सेइं साथी च़ली। एन्च़रां तै नौकर रिबका साथी नेइतां च़लो जेव।

62 इसहाक ज़ै दक्षिणी मुल्खे मां रहतो थियो, लहैरोई नंव्वेरे एक्‍की खुहे मेइं भोइतां च़लो एवरो थियो। 63 ड्लवझ़रे मौके तै मैइदाने मां ध्यान केरनेरे लेई*24:63 ध्यान केरनेरे लेई घुमनेरे लेई निस्सोरो थियो; ते तैने तक्‍कू, कि ऊँट च़ले एवरेन। 64 रिबका भी इसहाक लाव, ते ज़ेरो तैसां तै लाव त तै ऊँटे पुड़ेरां ओस्सी। 65 तैखन तैसां नौकरे पुछ़ू, "ज़ै मड़द मैइदाने मां असन सेइं मिलनेरे लेई च़लो एवरोए, तै कौने?" नौकरे ज़ोवं, "तैए त मेरो मालिके।" तैखन रिबका पड़दो नेइतां अपनु तुत्तर ढक्‍कू। 66 नौकरे इसहाके सेइं तैन सब किछ ज़ोवं ज़ैन तैस सेइं बीतोरू थियूं। 67 तैखन इसहाके रिबका अपनि अम्मा सारारे तेम्बु मां आनी, ते तैस सेइं ड्लाह बनाव ते तैस सेइं प्यार कियो। एन्च़रां इसहाके अपने अम्मरे मौतरे बाद तसल्‍ली मैल्ही।