1 तैखन तैनी अपने घरेरे अधिकारी मैन्हु हुक्म दित्तो, "इन मैन्हु केरि बोरन मां ज़ेत्री खानेरी चीज़ां लेगि सेखचन, तेत्री भेरि दे, ते हर एक्‍की मैन्हेरे रुपेइये तैसेरी बोरी मां रेखतां छ़ड। 2 ते मेरो चैंदरो कुटोरो निकड़े ढ्लाएरी बोरी मां बह अन्नेरे रुपेइयन सेइं साथी रेखथ," यूसुफेरे इस हुक्मेरे मुताबिक तैनी तैन्ने कियूं। 3 झ़ेझ़ भोंते तैना मैन्हु अपने गधे लेदतां भेज़े। 4 तैना नगरे मरां मसां निसोरे थिये, ते हेजू दूर न थिये पुज़ोरे, कि यूसुफे अपने घरेरे अधिकैरी सेइं ज़ोवं, "तैन मैन्हु केरो पीछो केर, ते तैना मैलतां तैन सेइं ज़ो, तुसेईं भलियाइरे बदले बुराई किजो कियोरीए? 5 कुन ई तै चीज़ नईं ज़ैस मां मेरो मालिक पीते, ते ज़ैस सेइं तै सारो हाल एजने बाले मौकेरो ज़ानते? तुसेईं ज़ैन कियूं तैन बड़ू बुरू कियूं।"

6 तैखन तैनी तैना गेइतां ट्लाए, ते इना गल्‍लां तैन सेइं ज़ोने लगो। 7 तैनेईं तैस सेइं ज़ोवं, "हे इश्शे मालिक तू एरी ज़ेरि गल्‍लां किजो ज़ोतस? एरू कम तेरे नौकर न केरन। 8 हेर ज़ैना रुपेइये इश्शे बोरन मां मैल्होरे थिये, तैना असेईं कनान मुल्खेरां एन्हतां तींए कां वापस दित्तोरे थिये, भला तेरे मालिकेरे घरेरां असां सोन्नू या चैंदरी चीज़ां च़ोरतां केन्च़रे एन्हीं सकतम? 9 तेरे नौकरन मरां ज़ैस कोन्ची कां एन मैल्हेलू, तै मारो गालो, ते असां भी तैस मालिकेरे नौकर बनमेले।" 10 तैनी ज़ोवं, "तुश्शू ज़ोनू ठीके, ज़ैस कां तै मैल्हेलो, तैए मेरो नौकर भोल्हो, ते तुस लोक बेकसूर भोल्हे।" 11 तैखन तैना लूशी एपनी-एपनी बोरी तल्‍ले मां ओसैलतां खोलने लगे। 12 तैखन तै तोप्पने लगो; ते बड्डेरी बोरी करां लेइतां ते निकड़ेरी बोरी तगर तोप्पु, ते कुटोरो बिन्यामीनेरी बोरी मां मैल्हो। 13 तैखन तैनेईं अपना-अपना लिगड़ां छ़िन्दां, ते अपनो-अपनो गधो लेद्दतां नगरे जो वापस जे। 14 ज़ैखन यहूदा ते तैसेरे ढ्ला यूसुफेरे घरे पुज़्ज़े, त यूसुफ तैड़ी थियो, तैखन तैना तैसेरे सामने झुके। 15 यूसुफे तैन सेइं ज़ोवं, "तुसेईं लोकेईं एन केरहु कम कियोरूए? कुन तुस न थिये ज़ानते कि अवं तै मैन्हु आईं कि छ़पोरी गल्‍लां भी बुझ़ी गाताईं?" 16 यहूदा ज़ोवं, "अस लोक अपने मालिके सेइं कुन ज़ोम? अस कुन ज़ोइतां अपनो आप बेकसूर साबत केरम? परमेशरे तेरे नौकरां केरो अधर्म ट्लेइ छ़डोरोए। असां ते तै ज़ैस कां तेरो कुटोरो निस्सोरो भी आहे, अस सभेरे सब अपने मालिकेरे नौकरे अहम।" 17 तैनी ज़ोवं, "एन केरनू भी मीं करां दूर राए, ज़ैस मैन्हु कां मेरो कुटोरो निसोरोए, तैए मेरो नौकर भोल्हो; ते तुस लोक अपने बाजी कां सुखे सेइं च़ले गाथ।"

18 तैखन यहूदा तैस कां गेइतां ज़ोने लगो, "हे मेरे मालिक, तेरे नौकरे अपने मालिके सेइं अक गल ज़ोनेरो हुक्म दे, ते तेरी सरक तेरे नौकरन पुड़ न भड़के; किजोकि तू त फ़िरौनेरे बराबर आस। 19 मेरे मालिके अपने नौकरन पुछ़ेरू थियूं, ‘कुन तुश्शे बाजी या होरे ढ्ला आन?’ 20 ते असेईं अपने मालिके सेइं ज़ोवं, ‘हाँ, इश्शो बुढो बाजीए, ते तैसेरे बुढापेरू अक निकड़ू मट्ठू भी आहे, पन तैसेरो ढ्ला मेरि जेवरोए, एल्हेरेलेइ हुनी तैन एपनी अम्मरू अक्‍के मट्ठू रेइ जेवरूए, ते तैसेरे बाजी तैन बड़ू ट्लारू आहे।’ 21 तैखन तीं अपने नौकरन सेइं ज़ोवरू थियूं, ‘तैस मीं कां ऐनथ, ज़ैस सेइं कि अवं तैस हेरी।’ 22 तैखन असेईं अपने मालिके सेइं ज़ोवरू थियूं, ‘तैन मट्ठू अपने बाजी न शैरी सके; नईं त तैसेरो बाजी मेरि गालो।’ 23 ते तीं अपने नौकरन सेइं ज़ोवं, ‘अगर तुश्शो निकड़ो ढ्ला तुसन सेइं साथी न एज्जे, त तुस मेरे सामने फिरी न एज्जी सकेले।’ 24 एल्हेरेलेइ ज़ैखन अस अपने बाजी तेरे नौकरे कां वापस जे, त तैखन असेईं तैस सेइं अपने मालिकेरी सैरी गल्‍लां ज़ोई। 25 तैखन इश्शे बाजीए ज़ोवं, ‘फिरी गेइतां इश्शे लेई थोड़ी ज़ेरि खानेरी चीज़ां घिन्नी एज्जा।’ 26 असेईं ज़ोवं, ‘अस न गेइ सकम, हाँ, अगर इश्शो निकड़ो ढ्ला असन सेइं साथी भोए त, तैखन असां गामेले; किजोकि अगर इश्शो निकड़ो ढ्ला असन सेइं साथी न भोए, त अस तैस मैन्हेरे सामने न गेइ बटमेले।’ 27 तैखन तेरे नौकर मेरे बाजीए असन सेइं ज़ोवं, ‘तुस त ज़ानतथ कि मेरी कौन्शरां दूई मट्ठा भोआं। 28 ते तैन मरां अक त मीं छ़ेडतां च़लो जेव, ते मीं पक्‍कू याकीने, कि तै मेरि जेवरो भोल्हो; ते तेइसेरे बाद मीं तैसेरू तुत्तर भी नईं लाहेरू। 29 ते अगर तुस एस भी मेरी एछ़्छ़न करां दूर नेतथ, ते कोई मुसीबत एस पुड़ एज्जी गाए, त तुश्शे वजाई सेइं अवं इस बुढापेरी हालती मां मातम केरतो-केरतो पाताले मांजो च़लो गानोईं।’ 30 एल्हेरेलेइ ज़ैखन अवं अपने बाजी तेरे नौकरे कां पुज़्ज़ी, त इन मट्ठू असन सेइं साथी न भोए, ज़ेसेरे प्राण सिर्फ एस्से मां आन। 31 एस्से वजाई सेइं, एन हेरतां कि मट्ठू नईं, तै लूशी मेरि गालो। तैखन तेरे नौकरां केरे ज़िरिये तेरो नौकर इश्शो बाजी, ज़ै बुढापेरी हालती मांए, मातम केरतो-केरतो पाताले मांजो च़लो गालो। 32 फिरी तेरो नौकर अपने बाजी केरे तैड़ी इन ज़ोइतां एवरोईं कि अवं इस मट्ठेरो ज़िमेवार भोवरोईं, ‘अगर अवं एस तीं कां न पुज़ेइतां देईं, तां त अवं हमेशारे लेई तेरो पापी भोइलो।’ 33 एल्हेरेलेइ हुनी तेरो नौकर इस मट्ठेरे बदले अपने मालिकेरो नौकर बन्नेरो हुक्म दे, ते इन मट्ठू अपने ढ्लान सेइं साथी घरे जो गाने दे। 34 किजोकि मट्ठेरे बगैर अवं केन्च़रे अपने बाजी कां गेइ सकेलो; एरू न भोए कि मेरे बाजी पुड़ ज़ै मुसीबत पेली तै मीं हेरनी पे।"