उत्पत्ति 20

अब्राहम ते अबीमेलेक

1 फिरी अब्राहम तैट्ठां निस्तां दक्षिण मुल्खे मां एइतां कादेश ते शूरेरे दरमियाने मां रुको, ते गरार नगरे मां राने लगो। 2 ते अब्राहम अपनि कौन्श सारारे बारे मां ज़ोने लगो, "ऐह मेरी बेइने," एल्हेरेलेइ गरार नगरेरे राज़े अबीमेलेके कोई मैन्हु भेज़तां सारा कुजाई। 3 राती परमेशरे सुपने मां अबीमेलेके कां एइतां ज़ोवं, "शुन, ज़ै कौन्श तीं रख्खोरीए, तैसेरे वजाई सेइं तू मेरि गालो, किजोकि तै साघन कौन्शे।" 4 पन अबीमेलेक तैस कां न थियो जेवरो; एल्हेरेलेइ तैने ज़ोवं, "हे प्रभु, कुन तू बेकसूर कौमी भी मारेलो? 5 कुन तैने एप्पु मीं सेइं एन न ज़ोवं, ‘कि तै मेरी बेइने?’ ते तैस कौन्शां भी एप्पु ज़ोवं, ‘तै मेरो ढ्लाए,’ मीं त अपने साफ मने सेइं ते अपने हथ्थां केरे सच़्च़ाई सेइं इन कम कियोरू।" 6 परमेशरे तैस सेइं सुपने मां गल की, "हाँ, अवं भी ज़ानताईं कि तीं अपने साफ मने सेइं इन कम कियोरूए ते मीं तू रोतकतां भी रखोरोस कि तू मेरे खलाफ पाप न केरस; इस्से वजाई सेइं मीं तू तैस सेइं हुरने नईं दित्तोरो। 7 एल्हेरेलेइ हुनी तैस मड़देरी कौन्श तैस वापस दे; किजोकि तै नबीए, ते तै तेरे लेई प्राथना केरेलो, ते तू ज़ींतो रालो पन अगर तू तैस वापस न देस त याद रख, कि तू, ते तेरे ज़ेत्रे लोकन, सब पक्‍के मेरि गाले।"

8 झ़ेझ़ां अबीमेलेके सुबेले उठतां अपने सेब्भी नौकरन कुजेइतां इना सब गल्‍लां शुनेई; ते तैना लोक बड़े डेरि जे। 9 तैखन अबीमेलेके अब्राहमे कुजेइतां ज़ोवं, "तीं असन सेइं एन कुन कियूं? ते मीं तेरू कुन बिगाड़ोरू थियूं कि तीं मेरे ते मेरे रियासती पुड़ बड़ो पाप छ़ेडी दित्तोरोए? तीं मीं सेइं तैन कम कियोरूए ज़ैन जाइज़ न थियूं।" 10 फिरी अबीमेलेके अब्राहमे पुछ़ू, "तीं कुन सेमझ़तां एरू कम कियूं?" 11 अब्राहमे ज़ोवं, "मीं इन सोचोरू थियूं कि इस ठारारे लोक परमेशरे करां न डरन; एल्हेरेलेइ इना लोक मेरी कौन्शरे वजाई सेइं मीं मारेले। 12 इसेरे अलावा सच़्च़े तै मेरी बेइन भी आहे, तै मेरे बाजी केरि कुई त आए पन मेरी अम्मरी कुई नईं; फिरी तै मेरी कौन्श भोइजेइ। 13 ते एरू भोवं कि ज़ैखन परमेशरे मीं अपने बाजी केरू घर शैरतां निसनेरो हुक्म दित्तो, तैखन मीं तैस सेइं ज़ोवं, ‘एत्री महरबानी तीं मीं पुड़ केरनि भोल्ही कि अस दूईये ज़ैड़ी-ज़ैड़ी गाम तैड़ी-तैड़ी तू मेरे बारे मां इन ज़ोइयां कि ई मेरो ढ्लाए।’" 14 तैखन अबीमेलेके गब्बां-गोरू, ते नौकर-नौकरैनी नेइतां अब्राहमे दित्ती, ते तैसेरी कौन्श सारा भी तैस वापस दित्ती। 15 ते अबीमेलेके ज़ोवं, "हेर, मेरो मुल्ख तेरे सामने; ज़ैड़ी तीं ठीक लगते तैड़ी रा।" 16 ते सारा सेइं तैने ज़ोवं, "हेर, मीं तेरे ढ्लाए रुपेइयां केरे अक हज़ार टुक्ड़े दित्तोरेन। हेर, तेरे सारे सैथी केरे सामने तैए तेरी एछ़्छ़ी केरो पड़दो बनेलो, ते सेब्भी केरे सामने तू सच़ साबत भोल्ही।" 17 तैखन अब्राहमे यहोवा परमेशरे कां प्राथना की, ते यहोवा अबीमेलेक, ते तैसेरी कौन्शी ते नौकरैनी बझ़ेइं ते तैन बच्‍चे भोने लग्गे। 18 किजोकि यहोवा परमेशरे अब्राहमेरे कौन्श सारारे वजाई सेइं अबीमेलेकेरे घरेरे सब कौन्शां केरि औलाद पूरे तरीके सेइं बन्द कियोरी थी।