उत्पत्ति 30

1 ज़ैखन राहेलां हेरू कि याकूबेरे लेई मीं सेइं कोई औलाद नईं भोवरी, तैखन तै एपनी बेइनी पुड़ ज़लने लगी, ते याकूबे सेइं ज़ोवं, "मीं भी औलाद दे, नईं त अवं मेरि गाली।" 2 तैखन याकूबे राहेली सेइं सेरकोइतां ज़ोवं, "कुन अवं परमेशर आईं? तेरू गर्भ त तैन्नी बन्द केरतां रखोरूए।" 3 राहेलां ज़ोवं, "ठीके, मेरी नौकरानी बिल्हा हाज़रे; तैस कां गा, ते तैसारे ज़िरिये मेरू भी घर बस्सेलू।" 4 तैखन राहेलां अपनि नौकरानी बिल्हा दित्ती, कि तै तैसेरी कौन्श बने; ते याकूब तैस कां जेव। 5 ते बिल्हा दोज़ींती भोइ ते याकूबेरू तैस अक मट्ठू भोवं। 6 तैखन राहेलां ज़ोवं, "परमेशरे मेरो न्याय कियोरोए, ते मेरी शुन्तां मीं अक मट्ठू दित्तेरूए।" एल्हेरेलेइ तैसां तैसेरू नवं दान रख्खू। 7 राहेलरी नौकरानी बिल्हा फिरी दोज़ींती भोइ ते याकूबेरू तैस अक होरू मट्ठू भोवं। 8 तैखन राहेलां ज़ोवं, "मीं एपनी बेइनी सेइं बड़े ज़ोरे सेइं घौल लग्गो, ते हुनी अवं ज़ींती जेई।" ते एल्हेरेलेइ तैसां तैसेरू नवं नप्ताली*30:8 नप्ताली मेरी लड़ाई रख्खू।

9 ज़ैखन लिआ एन हेरू कि अवं बच्‍चे ज़ाने करां रेइ जेवरी, तैखन तैसां अपनि नौकरानी जिल्पा याकूबेरी कौन्श बन्नेरे लेई दित्ती। 10 ते लिआरी नौकरानी जिल्पा सेइं भी याकूबेरू तैस अक होरू मट्ठू पैदा भोवं। 11 तैखन लिआ ज़ोवं, "हे मेरी किस्मत!" एल्हेरेलेइ तैसां तैसेरू नवं गाद रख्खू। 12 ते फिरी लिआरी नौकरानी जिल्पारू भी याकूबे सेइं अक होरू मट्ठू भोवं। 13 तैखन लिआ ज़ोवं, "अवं धन आईं; सच़्च़े कौन्शां मींजो धन ज़ोली।" एल्हेरेलेइ तैसां तैसेरू नवं आशेर रख्खू।

14 गेहुं कटनेरे दिहाड़न मां रूबेने मैइदाने मां दूदाफल*30:14 दूदाफलदूदाफले जो प्यार फल भी ज़ोतन, इन मन्नू गाते कि ई खाने सेइं यौन इच्छा बद्धतीए ते कौन्शन दोज़ींती भोने मां मद्दत मैलतीए। मैल्हे, ते तै तैस एपनी अम्मा लिआ कां नेइतां जेव, तैखन राहेलां लिआ सेइं ज़ोवं, "अपने मट्ठेरे दूदाफले मरां किछ मीं भी दे।" 15 तैसां तैस सेइं ज़ोवं, "तीं त मेरो मुन्श भी नियो, ते कुन ऐह निकड़ी गल्‍ले? हुनी कुन तू मेरे मट्ठेरो दूदाफल भी नेनो चातिस?" राहेलां ज़ोवं, "ठीके, तेरे मट्ठेरे दूदाफलेरे बदले याकूब अज़ राती तीं सेइं साथी झ़ुलेलो।" 16 ड्लवझ़ां ज़ैखन याकूब मैइदाने मरां एज्जी राहोरो थियो, तैखन लिआ तैस सेइं मिलनेरे लेई निस्सी, ते ज़ोवं, "तीं अज़ मीं कां एजनू भोल्हु, किजोकि मीं तू अपने मट्ठेरे दूदाफलेरे बदले सच़्च़े घिन्नोरोस।" तैखन तै तैस राती तैस सेइं साथी झ़ुल्‍लो। 17 तैखन परमेशरे लिआरी शुनी, ते तै दोज़ींती भोइ ते याकूबेरू पंच़ोंव मट्ठू भोवं। 18 तैखन लिआ ज़ोवं, "मीं अपने मुन्शे ज़ै नौकरानी दित्ती, एल्हेरेलेइ परमेशरे मीं मेरी मज़दूरी दित्तोरीए।" एल्हेरेलेइ तैसां तैसेरू नवं इस्साकार*30:18 इस्साकार मतलब इनाम। रख्खू। 19 लिआ फिरी दोज़ींती भोइ ते याकूबेरू तैस शेइयोवं मट्ठू भोवं। 20 तैखन लिआ ज़ोवं, "परमेशरे मीं रोड़ू दान दित्तेरूए; इस फेरे त मेरो मुन्श मीं सेइं साथी बनोरो रालो, किजोकि मेरां तैस सेइं शा मट्ठां भेवरन।" एल्हेरेलेइ तैसां तैसेरू नवं जबूलून*30:20 जबूलून मतलब आदर। रख्खू। 21 तैल्‍लां पत्ती तैस अक कुई भी भोइ, एल्हेरेलेइ तैसां तैसारू नवं दीना रख्खू। 22 परमेशरे राहेलरी भी बिनती शुनी, ते तैसारो गर्भ खोल्‍लो। 23 एल्हेरेलेइ तै दोज़ींती भोइ ते तैस अक मट्ठू भोवं; तैखन तैसां ज़ोवं, "परमेशरे अवं बेइज़्ज़ती करां बच़ेवरीं।" 24 एल्हेरेलेइ तैसां तैसेरू नवं यूसुफ रख्खू ते ज़ोवं, "यहोवा मीं अक होरू भी मट्ठू देलो।"

याकूबेरो लाबाने सेइं समझोतो

25 ज़ैखन राहेली सेइं यूसुफ पैदा भोव, तैखन याकूबे लाबाने सेइं ज़ोवं, "मीं भेज़, कि अवं अपने मुल्खे जो वापस गेईं। 26 मेरी कौन्शां ते मेरे बच्‍चे, ज़ैन केरे लेई मीं तेरी सेवा कियोरीए, तैन मीं दे कि अवं च़लो गेईं; तू त ज़ानतस कि मीं तेरी केत्री सेवा कियोरीए।" 27 लाबाने तैस सेइं ज़ोवं, "अगर तेरे अनुग्रहेरी नज़र मीं पुड़ भोवरीए, त इड़ी बिश्शी गा; किजोकि मीं तजरबे सेइं पतो लग्गोरोए कि यहोवा परमेशरे तेरे वजाई सेइं मीं बरकत दित्तोरीए।" 28 फिरी तैनी ज़ोवं, "तू रोड़ेच़ारे ज़ो, कि अवं तीं कुन देईं, ते अवं तैन्ने तीं देइलो।" 29 तैनी तैस सेइं ज़ोवं, "तू त ज़ानतस कि मीं तेरी केत्री सेवा कियोरीए; ते तेरे जानबर मीं कां राए। 30 मेरे एजने करां पेइले तैना केत्रे थिये, ते हुन्ना केत्रे भेवरेन; ते यहोवा मेरे एजने पुड़ तीं केत्री बरकत दित्तोरीए, पन अवं अपने घरेरू कम कैखन केरेलो?" 31 तैनी फिरी ज़ोवं, "अवं तीं कुन देईं?" याकूबे ज़ोवं, "तू मीं किछ न दे; अगर तू मेरे लेई अक कम केरस, त अवं फिरी तेरां गब्बां च़ारेलो, ते तैन केरि हिफाज़त केरेलो। 32 अवं अज़ तेरे सब गब्बां केरे मझ़मेइं निसेलो, ते ज़ैना छ़ेल्‍ली तौसी या चित्री भोन, ते ज़ैना भैड्डां कैली भोन, ते ज़ैना छ़ेल्‍ली चित्री भोन, ते ज़ैना थाव्वे चित्रे ते धैरन बाले भोन, अवं तैना अलग केरतां रखेलो; ते मेरी मज़दूरी तैए भोल्ही। 33 ते ज़ैखन अग्रोवं जो मेरी मज़दूरारी गलबात तेरे सामने भोए, तैखन धर्मेरी ई गवाही भोल्ही, मतलब छ़ेल्‍लन मरां ज़ै कोई न तौसी न चित्री भोए, ते ज़ैना भैड्डां कैली न भोन, अगर मीं कां निस्सन, त च़ोरी ठहरन।" 34 तैखन लाबाने ज़ोवं, "तेरे ज़ोनेरे मुताबिक भोल्हु।" 35 ते तैनी तैस्से दिहाड़े सब धैरन बाले ते चित्रे थाव्वे, ते सब तौसी ते चित्री छ़ेल्‍ली, मतलब ज़ैन मां किछ छ़ितार थियो, तैना सब कैली भैड्डां भी अलग केरतां अपने मट्ठन कां सौंफतां दित्ती। 36 ते लाबाने अपने ते याकूबेरी ठारारो फर्क पैदल ट्लाई दिहाड़ां केरि बत्तरो बनाव; ते याकूब लाबानेरे गब्बन च़ारने लगो।

37 तैखन याकूबे चिनार, बदाम, ते अर्मोन बुट्टां केरि नीली-नीली सोटी एन्हतां, ते तैना ज़ैट्ठां कोट्ठां छ़िलतां, तैना धारी दार बनेई, एन्च़रे कि तैन सोटी केरि सुफेदी लेइहोने लगी। 38 ते तैखन छ़िलोरी सोटी भैड्डां-छ़ेल्‍ली केरे सामने तैन केरे पानी पीनेरे कुण्डन मां खेड़ि की, ते ज़ैखन तैना पानी पीने एई, त तैना गभिन भोइ जेई। 39 सोटी केरे सामने गभिन भोइतां, भैड्डां-छ़ेल्‍ली धैरन बाले, चित्रे ते ड्लड़बड़े बच्‍चे ज़ांने लेगि। 40 तैखन याकूबे भैड्डां-छ़ेल्‍ली केरे बच्‍चे अलग-अलग किये, ते लाबानेरी भैड्डां-छ़ेल्‍ली केरां तुत्तरां तौसां ते सब काले बच्‍चे केरे पासे कियां; ते अपनि कन्नी तैनी अलग रख्खी, ते लाबानेरी भैड्डां-छ़ेल्‍लन सेइं मिलने न दित्ती। 41 ते ज़ैखन-ज़ैखन निगर भैड्डां-छ़ेल्‍ली गभिन भोती थी, तैखन-तैखन याकूब तैना सोटी केरे सामने रेखी देतो थियो; ज़ेन्च़रे सेइं तैना सोटी हेरतां गभिन भोती थी। 42 पन ज़ैखन लिस्सी भैड्डां-छ़ेल्‍ली गभिन भोती थी, तैखन तै तैन केरे अग्गर तैना सोटी न थियो रखतो। एन्च़रे सेइं लिस्सी-लिस्सी लाबानेरी रेइ, ते निगर-निगर याकूबेरी भोइ जेई। 43 एन्च़रां याकूब बड़ो जादे अमीर भोइ जेव, ते तैसेरां बड़ां गब्बां भोइ जेआं, ते बड़े नौकर ते नौकरैनी, ते ऊँट ते गधे भोइ जे।