श्रेष्ठगीत 1

1 सुलैमानेरां गीतां इना आन।

पेइलू गीत

लाड़ी

2 अपने ओठन सेइं तू मीं फुम्मड़ी दे!

किजोकि तेरो प्यार दाछ़रे रस्से करां जादे रोड़ोए।

3 तेरे किसमां-किसमां केरे इत्रेरी खुशबू बड़ी रोड़ीए।

तेरू नवं*1:3 नवं आदर उलटावरे इत्रेरू ज़ेरू आहे,

एल्हेरेलेइ कुइयां तीं सेइं प्यार केरतिन।

4 मीं एप्पु सेइं साथी ने, अस अकोट्ठे तीं पत्ती दौड़मेले,

राज़े अवं अपने मेहले मां आनोरी आईं,

अस तीं मां खुश ते मघन भोल्हे;

असां दाछ़रे रस्से करां जादे तेरे प्यारेरी चर्चा केरमेली।

तैना ठीक तींए सेइं प्यार केरचन।✝1:4 होश. 11:4;फिल. 3:1-12;भज. 45:14.

5 हे यरूशलेम नगरेरी कुइयव,

अवं काली त आईं पन हेरनी रोड़ी आईं,

केदारेरे तेम्बु केरि ज़ेरि

ते सुलैमानेरे पड़दां केरि ज़ेरि आईं।

6 मीं एल्हेरेलेइ न तक कि अवं काली आईं,

किजोकि अवं धुप्पी सेइं फुकोई जेवरी आईं।

मेरे ढ्ला मीं पुड़ खुशी न थिये,

तैनेईं अवं दाछ़री बागां केरि रखवाली केरनेबाली बनेवरी आईं।

पन मीं अपने दाछ़री बागरी हेरगेश न की।

7 अवं तीं सेइं प्यार केरचां मीं सेइं ज़ो,

कि तू अपना गब्बां कोड़ि च़ारतस,

ते तैन दुपहरां केरे मौके कोड़ि बिशालतस;

अवं तेरे सैथी केरे गब्बन कां

झुन्ढ छ़ेडतां किजो भेटकी।

ट्लारेरी बिनती

लाड़ो

8 हे कौन्शन मां खूबसूरत, अगर तू न ज़ानती भोस

त तू गब्बां केरे रौन्ने केरे निशानन पुड़ च़ल,

ते पुहालां केरे डेरन कां, अपने छ़ेल्‍ली केरे बच्‍चे च़ार।

9 हे मेरी ट्लारी मीं तेरी तुलना

फ़िरौनेरे रथ्थन सेइं जोट्लोरे घोड़ी सेइं कियोरीए।✝1:9 2 इति. 1:16.

10 तेरी खैखोड़ी बालन मां खूब रोड़ी लेइहोतिन,

ते तेरू गल हीरां केरे लेड़ी केरे दरमियान।

लाड़ी

11 असां तेरे लेई सोन्नेरे हार बनामेले, ते तैन मां चैंदरां फूड़ू लामेले।

12 ज़ैखन राज़ो अपने मेज़े कां बिशोरो थियो,

मेरे जटामासी एरी खुशबू फैली राहोरी थी।

13 मेरो प्यार केरनेबालो मेरे लेई लोबानेरे थेलारो ज़ेरोए,

ज़ै मेरी छैती मां बस्सोरो रहते।

14 मेरो ट्लारो मेरे लेई मींधरे फूड़ू केरे गुच्छेरो ज़ेरोए,

ज़ै एनगदी नंव्वेरे बागी मां भोते।

लाड़ो

15 हे मेरी ट्लारी, तू केत्री खूबसूरत आस, हेर तू केत्री खूबसूरत आस

तेरी एछ़्छ़ी कबूतरेरी ज़ेरिन।

लाड़ी

16 हे मेरे ट्लारा तू केत्रो मने पसंद एजनेबालो आस,

ते इश्शू बिछ़ान भी सब्ज़ आहे;

17 इश्शे घरेरे पट्टे गैइड़ेरे आन,

ते इश्शी घरेरी छतरी केड़ी सनोवर बुट्टेरी आन।