श्रेष्ठगीत 3

बेचैनी बाली रात

1 मीं सैरी राती तै अपने बिछ़ाने पुड़ तोप्पो ज़ैस सेइं मेरो दिल प्यार केरते,

मीं तैसेरी

तलाश की पन तै न मैल्हो;✝3:1 यशा. 3:1.

2 "मीं ज़ोवं, हुनी अवं झ़ेझ़ां उठतां नगरे मां गेइतां हेंठतां फिरतां तोप्पेली।"

बज़ारां केरि गेलन मां अवं तैस तोप्पेली ज़ैस सेइं मेरो दिल प्यार केरते,

मीं तै तोप्पो पन तै न मैल्हो।

3 पहरदार ज़ैना नगरे मां घुमते थिये, तैना मीं मैल्हे,

मीं तैन पुछ़ू, "कुन तुसेईं तै लाहोरोए, ज़ैस सेइं मेरो दिल प्यार केरते?"

4 मीं तैन करां अग्रोवं च़लोरे थोड़ू च़िर भोवरू थियूं,

ते तै, ज़ैस सेइं मेरो दिल प्यार केरते, मीं मैल्ही जेव,

मीं तै ट्लातो ते नशने न दित्तो

ज़ांतगर मीं तै एपनी अम्मरे घरे यानी ज़ैड़ी अवं ज़र्मोरी थी।

5 हे यरूशलेमेरी कुइयव, अवं तुसन चिकारी

ते मैइदानेरी हिरनी केरि कसम देचाईं,

कि ज़ैखन तगर प्यार एप्पु न उट्ठे,

तांतगर तै एप्पु न उकसाथ ते न बींझ़ाथ।

ट्लेइयोवं गीत

लाड़ी

6 एन कुने ज़ैन तूएरे खम्भेरू ज़ेरू,

गन्धरस ते लोबाने सेइं खुशबूदार,

ते बुपैरेरी सब किसमां केरि लेप लेइतां

जंगले मरां निस्तां एइतिन?

7 हेरा, ऐह सुलैमानेरी पालके!

तैसारे च़ेवरे पासन इस्राएलेरे जंगी मड़दन मरां शठ जुवान साथीन।

8 तैना सब तलवार च़लानेबाले, ते सब जंगी मां माहिरन।

राती हमलेरे डरे सेइं हर मड़देरे ज़ंघी पुड़ तलवार लटकावरी आहे।

9 सुलैमान राज़े अपने लेई अक पालक बनावाई, तैनी तै लबानोनेरी लेकड़री बनेवरी थी।

10 तैसारे डण्डे चैंदरे थिये, ते तैसारो शिरहानो सोन्नेरो थियो,

ते तैसारी गद्दी बैंगनी रंगेरी बनावाई,

ते तैसारो एन्त्रियों हिस्सो

यरूशलेमेरी कुइयां केरि तरफां

प्यारेरो तोफो थियो।

11 हे सिय्योनेरी कौन्शव, बेइर निस्तां सुलैमान राज़े पुड़ नज़र देथ,

हेरा तैनी तैन्ने ताज लेवरूए,

ज़ैन तैसेरी अम्मा तैसेरे ड्लाहेरे दिहाड़े

ते तैसेरे मनेरे खुशरे दिहाड़े तैसेरे दोग्गे पुड़ रखेरू थियूं।