Cânticos 7

लाड़ो

1 हे राजकुमारी, जुट्टन मां तेरे पव

केत्रे खूबसूरत लेइहोतन!

ते ज़ंघां केरि गोलाई एरे गेहनेरी ज़ेरिए,

ज़ै कोन्ची माहिर कारीगिरे बनावरो भोए।

2 तेरी नाही गोल कुटोरेरी ज़ेरिए,

ज़ै मसालो मिलोरे दाछ़रे रस्से सेइं भेरतां भोए,

तेरू पेट गेहुं केरे ढेरेरू ज़ेरूए ज़ेसेरे

च़ेवरे पासन सोसनेरां फूड़ू भोन।

3 तेरी दूईये छैती

हिरनरे जोड़ी बच्‍चां केरि ज़ेरि आन,

4 तेरू गल ज़ेन्च़रे हाथी दंतेरो मीनारे।

ते तेरी एछ़्छ़ी हेशबोनेरे तैन कुण्डां केरि ज़ेरिन,

ज़ैना बत्रब्बीमेरे फाटकन कां आन।

तेरू नक लबानोनेरे मीनारेरू ज़ेरूए।

ज़ेसेरू तुत्तर दमिश्केरे पासे आहे।

5 तेरी क्रोड़ी तीं पुड़ कर्मेलेरी ज़ेरि शोभने बालीए,

ते तेरे दोग्गेरे बाल बैंगनी रंगेरे लिगड़ां केरे ज़ेरेन;

ते राज़ो तेरे बालां केरो कैदी भोवरोए।

6 हे ट्लारी, मेरी मन पसंद कुमारी,

तू केत्री खूबसूरत ते रोड़ी आस!

7 तेरू कद-काठी खजूरेरू ज़ेरू शानदारे,

ते तेरी छाती दाछ़रे घोन्छ़ां केरि ज़ेरिए।

8 मीं ज़ोवं, "अवं इस खजूरे पुड़ गुस्तां एसेरी डैलड़ी ट्लेइलो।"

तेरी छाती दाछ़रे घोन्छ़े भोन,

ते तेरे सांसां केरी खुशबू ज़ेन्च़रे च़ोइयां केरि ज़ेरि भोए,

9 ते तेरू आशी खूब रोड़े दाछ़रे रस्सेरू ज़ेरूए,

लाड़ी

ज़ै आसैनी सेइं बल्हे-बल्हे ओठन पुड़ बेगि गातीए।

10 अवं अपने ट्लारेरी आईं।

ते तैसेरी खुवैइश मेरे पासे बनोरी रहतीए।

11 हे मेरा ट्लारा, एई, असां उडारे मां गाम

ते ड्लाव्वें मां रहम;

12 ते झ़ेझ़ां उठतां अस दाछ़री बागी मां गाम,

ते हेरम कि दाछ़री बागी मां गुड्डी लेगोरिन कि नईं या दाछ़रां फूड़ू लगोरन कि नईं

ते अनार फुलोरेन कि नईं।

तैड़ी अवं तीं अपनो प्यार हरेइली।

13 दूदाफलन सेइं खुशबू फैली राहोरीए,

ते इश्शे दारन पुड़ हर किसमेरे रोड़े फल आन, नंव्वे ते पुराने भी,

हे मेरा ट्लारा, ज़ैना मीं तेरे लेई अकोट्ठां केरतां रखोरेन।