1 फ़सह तिहारे करां शा दिहाड़े पेइले यीशु बैतनिय्याह ड्लाव्वें मांजो च़लो अव, ज़ैड़ी लाज़र रहतो थियो, ज़ै यीशुए मुड़दन मरां ज़ींतो कियोरो थियो। 2 तैड़ी तैनेईं यीशुएरी खातरदारी केरनेरे लेई धाम बनाई। ते मार्था सेवा लगोरी थी केरने, लाज़र भी तैन मरां अक थियो ज़ैना यीशु सेइं साथी रोट्टी खाने बिश्शोरे थिये। 3 तैखन मरियमा जटामासी सेइं बनोरो अध्धो लीटर खुशबूदार इत्र ज़ै बड़ो कीमती थियो, यीशुएरे पव्वन मल्‍लो, ते अपने दोग्गेरे बालन सेइं पोंछ़ने लगी, ते सारू घर खुशबू सेइं भेरोई जेव। 4 पन तैसेरे चेलन मरां अक यहूदा इस्करियोती नव्वेंरो अक चेलो, ज़ैनी यीशु ट्लुवेवरो थियो ज़ोने लगो, 5 "ई इत्र 300 दीनारन मां बेच़तां गरीबन किजो न दित्तो?" 6 तैनी एना गल्‍लां एल्हेरेलेइ न थी ज़ोवरी, कि तैस गरीबां केरो खियाल थियो, पन एल्हेरेलेइ ज़ोवं कि तै च़ोर थियो, तैस कां पेइंसां केरि झोली भोती थी, ते ज़ैन किछ तैस मां रखते थी तै कढतो थियो। 7 यीशुए ज़ोवं, "एस तंग न केरा, एसां वक्तेरे पेइले मेरी जान दब्बनेरी तियारी कियोरीए। 8 किजोकि गरीब लोक त तुसन सेइं साथी सदा रहतन, पन अवं तुसन सेइं साथी सदा नईं रानो।"

9 मैन्हु केरि बड़ी भीड़ी तैड़ी आई ज़ैखन तैनेईं शुनू कि यीशु तैड़ी अव। तैना सिर्फ यीशु नईं बल्के लाज़रे भी हेरने एवरे थिये, ज़ै तैनी मुड़दन मरां ज़ींतो कियोरो थियो। 10 तैखन प्रधान याजके लाज़र भी मारनेरी सलाह की। 11 किजोकि बड़े लोक यहूदी लीडरन करां च़ले जे, ते तैनेईं यीशु पुड़ विश्वास कियो।

12 होरसां मैन्हु केरि बड़ी भीड़ तिहारे मां आई। ज़ैखन तैनेईं शुनू कि यीशु भी यरूशलेम नगरे मां एजनेबालोए, 13 त तैनेईं खजूरां केरि डैलड़ी हथ्थन मां रेखतां नहरे देते तैस सेइं मिलनेरे लेई निस्से ते ज़ोने लगे, "होशाना (तारीफ़) धने इस्राएलेरो राज़ो, ज़ै प्रभुएरे नंव्वे सेइं एइते।" 14 ज़ैखन यीशु अक गधेरो बच्‍चो मैल्हो, ते तै तैस पुड़ बिशतां यरूशलेम नगरे मांजो अव, ज़ेन्च़रे पवित्रशास्त्रे मां लिखेरूए तेन्च़रे एन भोवं,

15 "हे सिय्योनेरी कुई (यरूशलेमेरे लोक),

तू न डर, हेर,

तेरो राज़ो एज्जी राओरोए,

ते तै गधेरे बच्‍चे पुड़ च़ेढ़तां एज्जी राओरोए।"

16 पेइलू त यीशुएरे चेलेईं किछ न समझ़ू, पन ज़ैखन यीशुएरी महिमा बांदी भोइ, तैनेईं तैना सैरी गल्‍लां याद की, एन सब गल्‍लां तैसेरे बारे मां लिखोरी थी, ते लोकेईं एरो ज़ेरो सलूख कियोरो थियो। 17 तैखन भीड़रे लोकेईं ज़ैना तैस सेइं थी, ई गवाही दित्ती, कि तैनी लाज़र कब्री मरां कुजव, ते मुड़न मरां ज़ींतो कियो। 18 एल्हेरेलेइ लोक तैस सेइं मिलनेरे लेई आए, किजोकि तैनेईं शुनोरू थियूं, तैनी ई चमत्कार कियोरे। 19 फरीसी लोक एन हेरतां एक्‍की होरि सेइं ज़ोने लगे, "सोचा, तुस लोक किछ नईं केरि लगोरे बटने, हेरा सारी दुनिया एस पत्ती च़ली।"

20 ज़ैना लोक फ़सह तिहारे मां यरूशलेम नगरे मां आराधना केरने एवरे थिये, तैन मां किछ यूनानी थिये। 21 तैना फिलिप्पुसे कां जे ज़ै गलीलेरे नगर बैतसैदा मां रहतो थियो, तै ज़ोवले हथ केरतां ज़ोने लगे, "जनाब अस यीशु सेइं मिलनू चातम।" 22 फिलिप्पुसे अन्द्रियासे सेइं ज़ोवं, ते अन्द्रियास फिलिप्पुसे सेइं साथी जेव ते यीशु सेइं ज़ोवं। 23 यीशुए तैन जुवाब दित्तो, "कि मैन्हेरे मट्ठेरी यानी मेरी महिमा बांदी भोनेरो वक्त एवरोए। 24 अवं तुसन सेइं सच़-सच़ ज़ोताईं, कि ज़ांतगर गेहुं केरो गलेव मित्ती मां न मर्रे, तै अक्‍के रहते, पन ज़ैखन मरते त बड़ो फल आनते, (तेन्च़रे मीं सेइं साथी भोनूए)*। 25 ज़ै अपनि जान ट्लारी रखते ते अपनि जान गुवाते, पन ज़ै अपनि जानी सेइं बैर रखते ते अक हमेशारी ज़िन्दगी बच़ालो। 26 ज़ै कोई मेरी सेवा केरनि चाते त तैसेरेलेइ ज़रूरीए तै मेरो चेलो बने, ताके ज़ैड़ी अवं आईं तैड़ी मेरो सेवक भी भोए, ज़ै मेरी सेवा केरते मेरो बाजी परमेशर तैस इज़्ज़त देलो।"

27 "हुना मेरो दिल बड़ो उदास भोवरोए। एल्हेरेलेइ अवं कुन ज़ोईं? ‘हे बाजी इस दुखेरी घेड़ी करां मीं बच़ा,’ पन अवं इस दुनियाई मां एल्हेरेलेइ एवरोईं कि दुख झ़ेल्‍ली। 28 हे बाजी तू केत्रो महिमा बालोस इन बांदू केर।" तैखन सुर्गेरां अक आवाज़ अई, "मीं तेरी केत्री महिमा बांदी कियोरीए ते फिरी भी केरेलो। 29 तैखन तैड़ी ज़ैना मैन्हु खड़े भोइतां शुनी राहोरे थिये, तैनेईं ज़ोवं, गुड़ने लगोरूए," ते होरेईं ज़ोवं, "केन्चे स्वर्गदूते तैस सेइं गल की।" 30 यीशुए ज़ोवं, "ई आवाज़ मेरे फैइदेरे लेई नईं बल्के तुश्शे लेई आहे। 31 इस वक्त परमेशर दुनियारे लोकां केरो न्याय केरेलो, ते अवं इस शैतानेरी शक्ति नाश केरेलो ज़ै इस दुनियाई पुड़ राज़ केरते। 32 ते ज़ैखन अवं ज़मीनी पुड़ां उच्‍चे च़ाढ़ो गालो, तैखन अवं सैरी लोकन एप्पू कांजो आनेलो।" 33 एन ज़ोइतां तैनी साफ च़ारे बांदू कियूं, ते तै केन्च़रां मरने बालो। 34 एस पुड़ लोकेईं ज़ोवं, "असेईं मूसेरे कानूने मां ई गल शुनोरीए, कि मसीह हमेशा रानोए, फिरी तू केन्च़रे ज़ोतस कि मैन्हेरू मट्ठू उच्‍चे पुड़ च़ढ़नू ज़रूरीए? एन मैन्हेरे मट्ठे कौने?" 35 यीशुए तैन सेइं ज़ोवं, "लौ* तुसन कां थोड़े च़िरे तगरे, ज़ांतगर लौ तुसन साथीए, तांतगर च़लते राथ, एरू न भोए आंधरू तुसन घेरे, ज़ै आंधरे मां च़लते तै न ज़ाने तै कोरहां च़लरोए। 36 ज़ांतगर लौ तुसन सेइं साथीए, त लोई पुड़ विश्वास केरा ताके तुस लौअरे बच्‍चे बनथ।" इना गल्‍लां ज़ोइतां यीशु छ़ेप्पी जेव।

37 तैनी तैन केरे सामने बड़े चमत्कार हिराए, फिरी भी तैनेईं विश्वास न कियो। 38 ताके यशायाह नेबेरू ज़ोवरू वचन पूरू भोए,

"हे प्रभु, केन्चे इश्शे खुशखेबरी पुड़ विश्वास न कियो,

ते बड़े लोकेईं परमेशरेरी शक्ति हेरतां भी कबूल न की।"

39 एल्हेरेलेइ तैना विश्वास न केरि सके यशायाह एक्‍की होरि ठैरी ज़ोते:

40 "तैनी तैन केरि एछ़्छ़ी केनि की, ते मन सखत कियोरोए,

एरू न भोए कि तैना एछ़्छ़न सेइं लहन ते मने सेइं बुझ़न,

ते माफ़ी मघन ते अवं तैन बज़्झ़ेई।"

41 यशायाह नबी एल्हेरेलेइ ज़ोतो थियो, कि तैनी यीशुएरी एजनेबाली महिमा लाहोरी थी, ते तैसेरे बारे मां गल भी की। 42 फिरी भी लीडरन मरां बड़ेईं यीशु पुड़ विश्वास कियो, पन फरीसी लोकां केरे वजाई सेइं बांदे मां न थिये मन्ते, एरू न भोए कि असन प्राथना घरे मरां कढन। 43 किजोकि मैन्हु केरि बडीयाई तैन परमेशरेरी बडीयाई करां जादे रोड़ी लगती थी।

44 तैखन यीशुए ज़ोरे सेइं ज़ोवं, "ज़ै कोई मीं पुड़ विश्वास केरते तै मीं पुड़ नईं पन मेरे भेज़ने बाले परमेशरे पुड़ विश्वास केरते। 45 ते ज़ै मीं हेरते तै मेरे भेज़ने बाले हेरते। 46 अवं दुनियाई मां अक लौ बेनतां एवरोईं, ताके ज़ै मीं पुड़ विश्वास केरे तै आंधरे मां न रालो। 47 अगर कोई मेरी गल्‍लां शुन्तां तैन पुड़ अमल केरे, त अवं तैस दोष न लेइलो, अवं दुनियारे लोकन पुड़ दोष लाने नईं पन मुक्ति देने एवरोईं। 48 ज़ै मेरो इन्कार केरते ते मेरी गल्‍लां कबूल न केरे, तैस पुड़ दोष लानेबालो अक्‍के, मतलब ज़ैन वचन मीं ज़ोवरूए, तैन आखरी दिहाड़े तैस दोषी ठैरालू। 49 किजोकि मीं अपने अधिकारे सेइं किछ नईं ज़ोवरू, पन बाजी ज़ैने अवं भेज़ोरोईं तैनी मीं हुक्म दित्तोरोए, कि कुन-कुन ज़ोईं ते कुन-कुन शुनेईं? 50 ते अवं ज़ानताईं कि तैसेरो हुक्म मन्ने सेइं हमेशारी ज़िन्दगीए मैलतीए, एल्हेरेलेइ अवं तुसन सेइं तैन्ने ज़ोताईं ज़ैन ज़ोनेरो हुक्म मेरे बाजे मीं दित्तोरोए।"