यूहन्ना 16

1 "मीं तुसन एना सैरी गल्‍लां एल्हेरेलेइ ज़ोई कि तुश्शो विश्वास न ट्लुटे। 2 तैनेईं तुस प्राथना घरन मरां कढनेथ, खास केरतां एरो ज़ेरो वक्त एज्जी राहोरोए, ज़ै तुसन मारेलो तै इन समझ़ेलो कि तै परमेशरेरी सेवा केरने लगोरोए। 3 तैन एन सब एल्हेरेलेइ केरेले कि न तैनेईं कधी मेरो बाजी ज़ानो ते न कधी अवं। 4 पन मीं एना सैरी गल्‍लां एल्हेरेलेइ तुसन सेइं ज़ोई, कि ज़ैखन तैना पूरी भोनेरो वक्त एज्जेलो, त तुसन याद एज्जे, कि मीं तुसन एन पेइलू ज़ोवरू थियूं, ज़ेइस तुस मेरे चेले बनोरे थिये। मीं एना गल्‍लां केरे बारे मां पेइलू एल्हेरेलेइ न ज़ोवं, कि अवं एप्पू तुसन सेइं साथी थियो।"

पवित्र आत्मारां कम्मां

5 "पन हुन्ना अवं अपने भेज़ने बाले कां च़लोरोईं, पन तुसेईं केन्चे भी न पुछ़ू कि तू कोरहां च़लोरोस? 6 पन मीं तुसन सेइं ज़ोई छ़डेरूए एल्हेरेलेइ तुश्शो मन उदास आए। 7 फिरी भी अवं तुसन सेइं सच़ ज़ोताईं कि मेरू इट्ठां गानू तुश्शे लेई फैइदोए, अगर अवं न गेइलो त तै मद्दतगार तुसन कां नईं एजनो, पन अवं च़लो जेव त तैस अवं तुसन कां भेज़ी देलो। 8 ते ज़ैखन तै एज्जेलो त दुनियाई पाप ते धार्मिकता ते न्यायेरे बारे मां सब किछ बांदू केरेलो। 9 पापेरे बारे मां एल्हेरेलेइ कि दुनियां मीं पुड़ विश्वास न कियो, 10 धार्मिकतारे बारे मां एल्हेरेलेइ कि अवं वापस बाजी कां च़लोरोईं ते तुसेईं अवं फिरी नईं लहनो, 11 न्यायेरे बारे मां एल्हेरेलेइ कि, शैतान ज़ै दुनियाई पुड़ राज़ केरनेबालो मुर्ज़म बनोरोए।"

12 "अवं तुसन सेइं होरू भी बड़ू किछ ज़ोनू चाताईं, पन हुन्ना तुसेईं तैन झ़ेल्‍ली नईं बटनू। 13 पन ज़ैखन तै मतलब सच़्च़ेरी आत्मा एज्जेली त तै सच़्च़ेरी बत हिराली, किजोकि तै अपने तरफां न ज़ोली, पन ज़ैखन किछ परमेशरे करां शुनेली तैन्ने ज़ोली, ते एजने बैली गल्‍लां ज़ोली। 14 ते मेरी महिमा केरेली किजोकि तै मेरी गल्‍लां ज़ोली, किजोकि तै मेरी गल्‍लन मरां तुसन सेइं ज़ोली। 15 ज़ैन किछ बाजी केरूए, तैन सब मेरूए, एल्हेरेलेइ मीं ज़ोवं, कि तै मेरी गल्‍लन मरां शुनालो।"

यीशु अपने चेलन ज़ोते तुश्शो दुख खुशी मां बेदलोनोए

16 "थोड़े च़िरेरां पत्ती तुसेईं अवं फिरी नईं लहनो, ते तैसेरे थोड़े च़िरेरां पत्ती तुसेईं अवं फिरी लहनोईं।" 17 तैखन तैसेरे किछ चेलेईं एप्पू मांमेइं ज़ोवं, इन कुने, "ऐह कुन ज़ोते, थोड़े च़िरेरां पत्ती तुस मीं न लाहेले, ते फिरी थोड़े च़िरेरां पत्ती तुस मीं लाहेले? कि अवं बाजी कां गाताईं?" 18 तैखन तैनेईं ज़ोवं, "थोड़े ज़ेरे च़िरेरां बाद, एन ज़ै ऐह ज़ोते, कुन गल्‍ले? अस न ज़ानम कि कुन?" 19 यीशुए एन ज़ैनतां, कि एना मीं पुछ़नू चातन, "कुन तुस मेरी इस गल्‍लरे बारे मां एप्पू मांमेइं गलबात केरने लगोरेथ, कि एस गल्‍लारो कुन मतलबे, थोड़े च़िरेरां पत्ती मीं न लाहेले, ते फिरी थोड़े च़िरेरां पत्ती लाहेले? 20 अवं तुसन सेइं सच़-सच़ ज़ोताईं, कि तुस लेरां देले ते शोग बनाले, पन दुनियारे लोक खुशी भोल्हे, पन ज़ैखन तुस मीं दुबारां लाहेले त तुश्शो दुख, खुशी मां बेदलोई गानोए। 21 ज़ैखन कुआन्श बच्‍चो ज़ातीए त तैस बड़ी तकलीफ भोतीए, किजोकि तैसेरे दुखेरी घड़ी नेड़े पुज़ोरीए, पन ज़ैखन बच्‍चो ज़र्मते त एस खुशी मां कि दुनियाई मां अक मैन्हु पैदा भोवरोए अपनि तकलीफ बिस्सरी गाचे। 22 ते तुसन भी हुन्ना तेरही तकलीफे, पन अवं तुसन सेइं फिरी मिलेलो, ते फिरी तुश्शे मने मां खुशी भोल्ही, ते खुशी तुसन करां कोई न नेही सकेलो। 23 तैस वक्ते तुस मीं कोई किछ न पुछ़ेलो, अवं तुसन सेइं सच़-सच़ ज़ोताईं, तुस मेरे नंव्वे सेइं बाजी करां ज़ैन किछ मगथ, तै तुसन देलो किजो तुस मेरे चेलेथ। 24 तुसेईं मेरू नवं घिन्तां हुना तगर बाजी करां किछ नईं मगोरू, मगेले त तुसन मैल्ही गालू, ते तुश्शी खुशी पूरी भोल्ही।"

दुनियाई पुड़ ज़ींत

25 "अवं तुसन एना गल्‍लां मिसाल देइतां ज़ोताईं, पन तै वक्त एवरोए कि अवं कहैन्न मां फिरी न ज़ोइलो, पन रोड़े च़ारे बाजेरे बारे मां तुसन सेइं गल्‍लां केरेलो। 26 तैस वक्ते तुस मेरू नवं घिन्तां प्राथना केरेले, अवं इन न ज़ोईं, कि तुश्शे लेई बाजी सेइं बिनती केरि। 27 किजोकि बाजी परमेशर तुसन सेइं एप्पू प्यार केरते, एल्हेरेलेइ कि तुसेईं मीं सेइं प्यार कियो, ते तुसेईं विश्वास कियोरोए कि अवं परमेशरेरी तरफां एवरोईं। 28 अवं बाजी करां दुनियाई मां एवरोईं, हुनी दुनियाई मरां भोइतां वापस बाजी कां च़लोरोईं।"

29 तैसेरे चेलेईं ज़ोवं, "हुन्ना तू साफ-साफ गल लगोरोस केरने, ते कोई मिसाल देइतां न ज़ोस। 30 हुन्ना असेईं बुझ़ू कि तीं सब किछ पत्तोए, ते ज़रूरत नईं कि कोई तीं पुछ़े, असां विश्वास केरतम कि तू परमेशरे करां एवरोस।" 31 यीशुए तैन सेइं ज़ोवं, "हुनी तुस विश्वास केरतथ! 32 हेरा, तै वक्त एज्जी राओरोए बल्के पुज़ोरोए, कि तुस सब नेशतां अपने-अपने बत्तां गानेथ, ते अवं अकैल्‍लो शारनोईं पन फिरी भी अवं अकैल्‍लो नईं, किजोकि मेरो बाजी मीं सेइं साथीए। 33 मीं तुसन एना गल्‍लां एल्हेरेलेइ ज़ोई, ताके तुसन शान्ति मैल्हे, किजो तुस मेरे चेलेथ, तुस दुनियाई मां मुसीबत त उठाताथ, पन हिम्मत रखा, मीं शैताने पुड़ ज़ींत हासिल कियोरीए, ज़ै इस दुनियाई पुड़ राज़ केरते।"