1 फिरी यीशु एक्‍की ठैरी प्राथना लोगोरो थियो केरने। ते ज़ैखन तैनी प्राथना की, त तैसेरे चेलन मरां एक्‍के ज़ोवं, "हे प्रभु, ज़ेन्च़रे यूहन्ना अपने चेलन प्राथना केरनि शिखालोरिये तेन्च़रे तू भी असन शिखाल।"

2 यीशुए तैन सेइं ज़ोवं, "ज़ैखन तुस प्राथना केरथ, त एन ज़ोइयथ,

‘हे बाजी, लोक तेरी आदर केरन किजोकि तू पवित्र परमेशर आस।

ते तेरू राज़ एज्जे।’

3 ‘इश्शी रोज़ेरी रोट्टी असन दे।

4 इश्शे पाप माफ़ केर,

किजोकि अस भी ज़ैना इश्शे खलाफ बुराई केरतन, तैन माफ़ केरतम।

अज़मैइशरे ज़िरिये असन पाप केरने न दे।’"

5 फिरी यीशुए तैन सेइं ज़ोवं, "फर्ज़ केरा तुसन मरां केन्चेरो अक दोस्त एध्धी राती अपने दोस्ते ज़ोए, ‘तू मीं ट्लाई रोट्टी दे। 6 किजोकि मेरो अक दोस्त बड़े दूरेरां हंठतो मेरे कां एवरोए, ते मेरे कां रोट्टी नईं, कि अवं तैस रोट्टी देइ सेखी।’ 7 ते तै तैसेरो दोस्त अन्तरां जुवाब दे, मीं दुख ने दे, हुनी त दार बन्दे, मीं कां मेरे बच्‍चे झ़ुलोरेन, ते अवं तीं रोट्टी न देइ सेखी। 8 अवं तुसन सेइं ज़ोताईं कि, अगर तै तैसेरो दोस्ते ते तैस रोट्टी न दे, त तैसेरो दोस्तेरे बार-बार मिन्नत केरने सेइं ज़रूर तैस रोट्टी देलो ते ज़ेत्री रोट्टी केरि तैस ज़रूरत भोल्ही देलो। 9 ते अवं तुसन सेइं ज़ोताईं, मग्गा त तुसन दित्तू गालू। ते तोप्पा, त तुसन मैल्ही गालू। ते दार गुड़काथ, त तुश्शे लेई खोल्‍लू गालू। 10 किजोकि ज़ै कोई मगते तै हासिल केरते, ते ज़ै कोई तोपते तैस मैल्ही गाते, ते ज़ै कोई दार गुड़काते त तैसेरेलेइ खोल्‍लू गाते। 11 तुसन मरां कौन ज़ेरो बाजी एरो भोए, कि ज़ैखन तैसेरू मट्ठू रोट्टी मग्गे त तैस घोड़ दे? या मछ़ली मग्गे, ते तै सप दे? 12 या ठूल मग्गे त तैस बिच़्च़ू दे? 13 ते तुस बुरे भोनेरे बावजूद भी अपने मट्ठन रोड़ी चीज़ां देनी ज़ानतथ त तुश्शो सुर्गेरो बाजी तैन, ज़ैना तैस करां मगतन पवित्र आत्मा किना देलो।"

14 फिरी तैनी एक्‍की लट्टे मरां भूतेरो सैयो कढो, ज़ैखन भूतेरो सैयो निस्सो, त तै लट्टो गल्‍लां लगो केरने, ते लोक हैरान रेइजे। 15 पन तैन मरां किछ मैन्हेईं ज़ोवं, "ऐह त भूतां केरे गुरू शैतानेरे मद्दती सेइं भूतां कढते।" 16 ते किछेईं अज़मानेरे लेई तैस करां कोई अक अम्बरेरो निशान मग्गो। 17 पन यीशुए तैन केरे मन्नां केरे खियाल ज़ैनतां तैन सेइं ज़ोवं, "ज़ैस-ज़ैस राज़्ज़े मां फूट पेचे, तैन राज़ बनोरू न राए, ते ज़ैस खानदाने मां फूट पेचे, तैन भी बनोरू न राए। 18 अगर शैतान अपनि खलाफत एप्पू केरे, त फिरी तैसेरू राज़ केन्च़रे रेइ सकते? फिरी तुस केन्च़रे ज़ोतथ कि अवं शैतानेरे मद्दती सेइं भूतां कढताईं। 19 अगर अवं शैतानेरी मद्दती सेइं भूतां कढताईं त तुश्शी औलाद केसेरे मद्दती सेइं कढती? तैन्ना तुश्शो फैसलो केरनेबाले हाकिम भोल्हे। 20 पन अगर अवं परमेशरेरे शेक्ति सेइं भूतां कढताईं त परमेशरेरू राज़ तुश्शे नेड़े पुज़ोरूए। 21 ज़ैखन कोई ज़ोरेबाले मैन्हु अपने घरेरो पेरहो केरते, त तैसेरू सब किछ बंच़ेरू रहते। 22 पन ज़ैखन तैस करां कोई निगर मैन्हु तैस पुड़ हमलो केरते त तैस अपने कब्ज़े मां केरतां तैसेरे सारे हथियार घिन्नी गाते ज़ैस पुड़ तैसेरो भरोसो थियो, ते तैसेरी सारी जेइदात लुटी गाते। 23 ज़ै मीं सेइं साथी नईं तै मेरे मुखालफे, ते ज़ै मीं सेइं साथी अकोट्ठू न केरे ते तै खिलारते।

24 "ज़ैखन केन्ची मैन्हु मरां भूत निसते त तैन शुक्‍कोरो ठैरन मां आराम तोपते ते ज़ैखन तैस तै आराम न मैल्हे त ज़ोते कि अवं वापस तैस्से घरे मां गालो ज़ैट्ठां अवं निसोरोईं। 25 ते तैखन तैन भूत वापस एइतां तैन घर साफ सुथरु रोड़ू लाते। 26 तैखन तै एप्पू सेइं साथी सत होरां भूतां साथी घिन्तां तैस मां अन्तर गेइतां बिशतन, ते तैस मैन्हेरो हाल पेइले हाले करां जादे बुरो भोते।"

27 ज़ैखन यीशु इना गल्‍लां ज़ोने लग्गोरो थियो, त भीड़ी मरां अक कुआन्श जोरे सेइं ज़ोने लगी, "धने तै कुआन्श ज़ैसां तीं ज़र्म दित्तू ते तू पालो।" 28 पन यीशुए ज़ोवं, "हाँ, पन धन आन तैना लोक ज़ैना परमेशरेरू वचन शुन्तन ते तैस पुड़ अमल केरतन।"

29 ज़ैखन हछे लोक भोने लगे त यीशु ज़ोवं, "इस ज़मानेरे लोक बुरेन, तैना निशान तोपतन, पन योनारे निशानेरे अलावा एन होरो कोई निशान न दित्तो गालो। 30 किजोकि ज़ेन्च़रे योना नबी नीनवेरे लोकन जो निशान बनो तेन्च़रे मैन्हेरू मट्ठू भी इस ज़मानेरे लोकां केरे लेई निशान बनेलू। 31 पन दक्षिणेरी रानी आदालतरे दिहाड़े इस ज़मानेरे लोकन दोषी बनाली, किजोकि तै बड़े दूरेरां सुलैमानेरे ज्ञानेरे बारे मां शुन्तां एवरी थी। ते इड़ी हेरा सुलैमाने करां भी बड्डोए। 32 नीनवेरे लोक आदालतरे दिहाड़े इस ज़मानेरे लोकन सेइं साथी खड़े भोइतां मुर्ज़म बनाले। किजोकि तैनेईं योनारे प्रचारे सेइं पापन करां मन फिरावरो थियो, पन इड़ी हेरा तै आहे, ज़ै योना करां भी बड्डोए।

33 "कोई मैन्हु दीयो बैलतां भांडे हैठ या ओड़कतां न छ़डे, बल्के उच्‍ची ठैरी रखतन ताके अन्तर एजनेबालन लौ भोए। 34 अछ़ जानेरे लेई दीयेरी ज़ेरिए, अगर तेरी अछ़ रोड़ीए, त तेरी जानी मां भी लौए, ते अगर तेरी अछ़्छ़े बुरीए त तेरी जान भी आंधरीए। 35 एल्हेरेलेइ खबरदार रेइयां, कोस्कोई एरू न भोए कि ज़ै लौ तीं मांए तै आंधरू न भोए। 36 अगर तेरी जानी मां लौए, त तैसेरो कोई भी हिस्सो आंधरो न भोए, त सब एरू भोल्हु, ज़ैखन दीयो चेमकतां लौ देते।"

37 ज़ैखन तै एना गल्‍लां ज़ोने लगोरो थियो, त केन्चे फरीसे यीशु कां मिन्नत की, कि मीं सेइं साथी रोट्टी खा, ते यीशु तैसेरे घरे जेव ते तैसेरे कां गेइतां रोट्टी खाने बिश्शो। 38 फरीसी एन हेरतां हैरान भोव, कि ऐह बगैर हथ-पव धोने रोट्टी खांने बिश्शी जेव। 39 पन प्रभुए फरीसी सेइं ज़ोवं, "हे फरीसाव तुस कटोरो, ते थाली बेइरमेईं त बड़ी साफ केरतथ, पन तुश्शे अन्तर ज़ुलम ते लालच़ भेरतांए। 40 हे बेअक्ल, ज़ैनी बेइरियोवं हिस्सो बनावरोए, तैनी आंट्लेइयों हिस्सो नईं बनेवरो? 41 बस्सा एन्त्री चीज़ दान केरा, त हेरा, सब किछ तुश्शे लेई साफ भोइ गालू। 42 पन हे फरीसाव, तुसन पुड़ अफ़सोस! तुस पुतनेरो ते ज़ीरेरो ते कने सेब्ज़ारो दशोवं हिस्सो देतथ, पन तुस न्याय केरने करां त परमेशरेरे प्यारे करां दूर रातथ, लोड़तू थियूं कि दशोवं हिस्से सेइं साथी इन भी केरेथे। 43 हे फरीसाव, तुसन पुड़ अफ़सोस! तुस लोक चातथ कि प्राथना घरन मां तुसन एग्री कुर्सन पुड़ बिशालन ते बज़ारन मां लोक तुसन कां झुकतां नमस्कार केरन। 44 पन हे फरीसाव तुसन पुड़ अफ़सोस! तुस तैन छ़ेपोरी कब्रां केरे ज़ेरेथ, ज़ैन पुड़ लोक च़लतन, पन तैन पतो न भोए।"

45 तैखन शास्त्री लोकन मरां एक्‍के तैस जुवाब दित्तो, "हे गुरू एना गल्‍लां ज़ोइतां तू इश्शी तुहीन लगोरोस केरने।" 46 यीशुए ज़ोवं, "हे शास्त्री लोकव, तुसन पुड़ अफ़सोस! तुस मैन्हन पुड़ त एत्रो भारो लदतथ ज़ै छ़ूनो असुखतो भोते ते पन एप्पू अपने कानूने मन्नेरी कोशिश भी न केरथ। 47 तुसन पुड़ अफ़सोस! तुस नेबी केरि कब्रां बनातथ ते तुश्शे दादे-पड़दादेईं तैना मारोरे थिये। 48 बस्सा, तुस शहातथ कि तुस अपने दादे-पड़दादां केरे कम्मां केरि पूरी तैइद केरतथ, किजोकि तैनेईं त नबी कत्ल कमाए ते तुस तैन नेबी केरि कब्रां बनातथ। 49 एल्हेरेलेइ प्रभु परमेशरेरी अक्लां ज़ोवं, नबी त प्रेरित तैन कां भेज़नेन तैना तैन मरां किछ कत्ल केरेले ते किछन सताले। 50 बस्सा ई कौम सारे नेबी केरे खूनेरे ज़ै दुनियारे शुरू करां देंतो बगेवरोए ज़िमेवार भोल्ही। 51 हाबिलेरे खूने करां देंतो ते जकर्याहेरे कत्ले तगर ज़ै तुसेईं मन्दरेरे ते बलिदान केरनेरे ठारारे मझ़ाटे मन्दरेरे अंगने मां कत्ल कियोरो थियो। अवं ज़ोताईं कि ऐह कौम तैन केरे खूनेरी ज़िमेवार भोल्ही। 52 पन हे फरीसाव तुसन पुड़ अफ़सोस! तुसेईं शास्त्री लोकेईं चाबी त अपने कब्ज़े मां रख्खी, पन तुस एप्पू भी दाखल न भोए ते ज़ैना दाखल भोनू चाते थिये तैना भी रोके।" 53 ज़ैखन यीशु तैट्ठां निस्सी जेव त शास्त्री ते फरीसी लोकेईं तै घेरो ते सरकरे मारे च़ेवरे पासना बड़े असुखते सवाल पुछ़ने लगे। 54 ताके यीशुएरे ज़बानरां एरी गल निस्से ज़ैस सेइं लोक तैस पुड़ गलती लांन।