1 यहोवारी तारीफ़ केरा!

केत्रो धने तै मैन्हु ज़ै यहोवारो डर मन्ते,

ते तैसेरे हुक्मन सेइं बड़ो खुशी भोते!

2 तैसेरी औलाद मुल्खे मां ताकतबर भोल्ही,

ते सच़्च़े लोकां केरि औलादी बरकत मैल्हेली।

3 धन-दौलत तैसेरे घरे मां रहतीए;

ते तैसेरी धार्मिकता हमेशा बनोरी रहतीए।

4 सच़्च़े लोकां केरे लेई आंधरे मां लौ निसतीए।

तै अनुग्रह केरनेबालो, दया केरनेबालो ते धर्मी भोते।

5 ज़ै मैन्हु दया केरते ते ओधार देते,

ते ईमानदैरी सेइं अपना कम्मां केरते, तैसेरू कल्याण भोते।

6 तै त सदा तगर अटल रालो;

धर्मी मैन्हेरी हमेशा याद राली।

7 तै बुरी खबरी करां न डरे;

तैसेरो दिल यहोवा पुड़ भरोसो रखने सेइं कायम रहते।

8 तैसेरो दिल सम्भालोरोए, एल्हेरेलेइ तै न डरेलो,

बल्के अपने दुश्मन्न पुड़ नज़र केरेलो।

9 तैनी बड़ू जादे ज़रूरतमन्दन दान दित्तू,

ते तैसेरो धर्म सदा बनोरो रालो,

ते तैसेरू शिंग* आदरी सेइं उच्‍चु कियूं गालू।

10 दुष्ट इन हेरतां सेरकोलो;

तै दंत च़ैपती-च़ैपती गेली गालो;

दुष्टां केरि खुवैइश पूरी न भोल्ही।✝