1 पन हुनी यहोवा ज़ोते, "मेरे दास याकूब, ते मेरे च़ुनोरे इस्राएल, मेरी शुन! 2 तेरो बनानेबालो यहोवा ज़ैनी गर्भे मां तेरी रच़ना की, ते ज़ै तेरी मद्दत केरेलो, तै इन ज़ोते; हे मेरे दास याकूब, ते हे मेरे ट्लारे यशूरून*, डर न! 3 किजोकि अवं खुशक धेरती पुड़ पानी ते शुकोरी ज़मीनी मां पैनेरी गड्डां बगेइलो; अवं तेरे खानदाने पुड़ ते तेरी औलादी पुड़ बरकत देलो।✝ 4 तैना मजनू बुट्टेरे ज़ेरे बेडोले ज़ैना पैनेरे बन्ने घासे मां भोतन। 5 कोई ज़ोलो, ‘अवं यहोवारो आईं,’ ते कोई अपनु नवं याकूब रखेलो, ते कोई अपने हथ्थे पुड़ लिखेलो, ‘अवं यहोवारो आईं,’ ते कोई अपनु कुलेरू नवं इस्राएल ज़ोलो।"

6 "यहोवा, ज़ै इस्राएलेरो राज़ोए, मतलब सेना केरो यहोवा ज़ै तैसेरो छुटानेबालोए, तै एन ज़ोते; अव्वें सेभन करां पेइलो आईं; ते अव्वें आखरी तगर रेइलो, मेरे अलावा कोई परमेशर नईं।✝ 7 ज़ैखन करां मीं पुराने ज़माने करां मैन्हु ठहराव, तैखन करां कौन भोव ज़ै मेरो ज़ेरो तैस प्रचार केरे, या ज़ोए या मेरे लेई रच़े ते ज़ैन किछ भोनेबालूए तैन्न पेइलू ज़ोए? 8 न डरा ते घबराथ; कुन मीं एना गल्‍लां पुराने ज़माने मां तुसन पुड़ बैंदी की? तुसां मेरे गवाह आथ। कुन मेरे अलावा कोई होरो परमेशरे? नईं, मेरे अलावा कोई चट्टान नईं, अवं कोन्ची होरि न ज़ैनी।"

9 ज़ैना मूरती घेड़तां बनातन, तैना सारे कि सारे बेकारन, ते ज़ैन चीज़न मां तैना आनन्द तोपतन तैन सेइं कोई फैइदो न भोल्हो; ज़ैना तैन केरे गवाह न एप्पु किछ लहन, ते न किछ समझ़न, एल्हेरेलेइ तैन शरमिन्दा भोनू पेनूए। 10 केनि देबतो ते बेफल मूरती बनेवरीए? 11 हेर, तैसेरे सेभी मूरती पूज़ा केरनेबालन शरमिन्दा भोनू पेनूए, मूरती बनानेबाले कारीगिर त मैन्हु आन; तैना सब अकोट्ठे भोइतां खड़े भोन; त तैना डेरि गाले; तैन शरमिन्दा भोनू पेनूए। 12 लुहार सन्दर आनते ते मूरतन मां तैन सेइं कम केरते, ते हथोड़े सेइं तियार केरते, अपने ताकती सेइं तैस बनाते; फिरी तै नियन्नो भोइ गाते ते तैसेरी ताकत घटतीए, तै पानी भी न पीए ते तै थकते। 13 ट्लखान सूत लेइतां तिखे हथियारे सेइं निशान देते ते रन्दे सेइं कम केरते, तै परकारे सेइं लकीर देते, इन्सानेरी शक्ली मां ढालते ते तैस मैन्हेरे ज़ेरे खूबसूरत बनाते ताके लोक तैस घरे मां रखन। 14 तै गैइड़ कटतो या जंगलेरे बुट्टन मरां किसमे-किसमेरे बंज़ेरे बुट च़ुनतां हेरगेश केरते, तै गैइड़ेरे बुट लाते ज़ै झ़ेड़रे पैनी सेइं बेडोते। 15 तैखन तै मैन्हु केरे बालनेरे कम्मे एइते तै तैन मरां फुक्‍की भी छ़डते ते अग बैलतां रोट्टी पकाते; तैस्से सेइं तै देबतो भी बनेइतां तैस कां झुकते; ते मूरती बनेइतां तैसेरे सामने मथ्थो टेकतां पूज़ा केरतन। 16 तैसेरो अक हिस्सो त तै अग्गी मां फुकते ज़ैस सेइं तै अपने लेई रोट्टी बनाते ते मास भी ट्लाड़ते ते रेज़्ज़तां खाते फिरी एप्पु तपेइतां ज़ोते, "आहा अवं गर्म भोइ जेव, मीं अग लाहोरीए!" 17 फिरी बच़ोरे हिस्से मरां अक मूरती बनाते ज़ै तैसेरो देबतोए तैसेरे सामने झुकतां तैसेरी पूज़ा केरते ते तैस कां प्राथना केरतां ज़ोते तू मीं बच़ा किजोकि तू मेरो देबतोस।✝ 18 तैना किछ न ज़ानन ते न किछ समझ़ रखन तैन केरि एछ़्छ़न पुड़ पड़दो पेवरोए; एल्हेरेलेइ तैना लेही न बटन, तैन केरो दिल सखते तैना सेमझ़ी न सखन। 19 कोई इस पुड़ ध्यान न केरे, ते न कोन्ची एत्रू ज्ञान या समझ़े रहतीए कि तै ज़ोई सके, "मीं तैसेरो अक हिस्सो फुकोरोए ते तैसेरे मूरन पुड़ रोट्टी बनाई; ते मास ट्लैड़तां खेवरूए; फिरी कुन अवं तैसेरे बच़ोरे हिस्से सेइं भिट्टी चीज़ बनेई? कुन अवं लेकड़ी कां झुकी?" 20 एरहो मैन्हु मांज़न खाते; भटकोरे अक्लरे वजाई सेइं तै भेटकी जेव; ते न तै अपनो आप बच़ेइ सखे, ते न इन ज़ोई सखे, "कुन इन ज़ैन मेरे देइने हथ्थे मांए झूठ नईं?"

21 हे याकूब, हे इस्राएल, एना गल्‍लां याद केर, तू मेरो दास आस, मीं तू बनेवरोस; हे इस्राएल, तू मेरो दास आस, अवं तीं न बिसरेलो। 22 मीं तेरे पाप काले बिदलारारे ज़ेरे मिटाए मेरे पासे फिरी वापस एज्जा, किजोकि मीं तू छुटेवरोस।

23 हे अम्बर उच्‍ची आवाज़ी सेइं ज़ो, किजोकि यहोवा एन कम कियोरूए; हे धेरतरे डुग्घी ठाराव, जयजयकार केरा; हे पहाड़व, ते हे जंगल, हे जंगलेरे बुट्टव ज़ोरे सेइं गीत ज़ोथ! किजोकि यहोवा याकूब छुटेवरोए ते इस्राएले मां अपनि महिमा बांदी कियोरीए।

24 यहोवा, तेरो मुक्ति देनेबालो, ज़ैनी तू गर्भे मां बनाव, तै इन ज़ोते, "अवं यहोवा सेभी केरो बनानेबालो आईं ज़ैनी अकैल्‍ले अम्बर ते धरती अपने शेक्ति सेइं बनाई। 25 अवं झूठे लोकां केरे ज़ोवरे निशान बेकार केरताईं ते एजने बाले वक्तेरे बारे मां ज़ोनेबालन बेवकूफ बनाताई ते ज़ै अक्लमन्दन पत्रोवं हटाते तैन केरि पंडताई अवं बेवकूफ बनाताई;✝ 26 ते अपने दासेरी गल्‍लां पूरी केरताईं ते अपने दूतां केरि योजना कामयाब केरताईं; ज़ै यरूशलेमेरे बारे मां ज़ोते, ‘तै फिरी बसाई गाली’ ते यहूदा प्रदेशेरे नगरां केरे बारे मां तैना फिरी बनाए गान ते अवं तैन केरे खण्डरन सुधारन। 27 ज़ै डुग्घे समुन्दरे सेइं ज़ोते कि शुक्‍की गा, कि अवं तेरे दरिया खुशक केरतां छ़डेलो।✝ 28 अवं भी तैन मरां अक आईं ज़ै कुस्रूएरे बारे मां ज़ोते, ‘तै मेरो रखोरो पुहाले ते मेरी मर्ज़ी पूरी केरेलो; यरूशलेमेरे बारे मां ज़ोते, तै बसाई गाली, ते भवनेरे बारे मां कि तेरी मुनीयाद रखी गाली।’" ✝