1 तैस मौके किछ लोक तैड़ी आए, तैना यीशु सेइं तैन गलील इलाकेरे लोकां केरे बारे मां ज़ोने लगे, ज़ैन केरो खून, रोमेरे गवर्नर पिलातुसे मन्दरे मां जानबरां केरे बलिदाने सेइं साथी मलेवरो थियो।

2 यीशुए तैन जुवाब दित्तो, "कुन तुस एन समझ़तथ कि तैन गलीलेरे लोकां केरो एत्रो बुरो हाल एल्हेरेलेइ भोवं, कि तैना बाकी गलीलेरे लोकन करां जादे पापी थिये? 3 अवं तुसन सेइं ज़ोताईं कि, अगर तुस भी पापन करां मन न फिराले त सब एन्च़रे नाश भोनेथ। 4 या कुन तैना अठारे ज़ने ज़ैन उन्ढो शीलोहेरो गुम्मट बिछ़ड़ोरो थियो, ते तैना सब तैस हैठ मेरि जे, ते तैना यरूशलेम नगरेरे होरि लोकन करां पापी थिये? 5 अवं तुसन सेइं सच़ ज़ोताईं, कि नईं बल्के अगर तुस भी पापन करां मन न फिराले त तुस सब एन्च़रे नाश भोइ गानेथ।"

6 तैसेरां बाद यीशुए तैन अक मिसाल देइतां ज़ोवं, "केन्चे मैन्हे अपनि बागी मां अक फैगेरो बुट लेवरो थियो, ते तैस बुट्टे पुड़ हर साल फल तोपने अव पन तैस फल न मैल्हो। 7 तैखन तैनी बागबने सेइं ज़ोवं, ‘हेर अवं ट्लाई सालां केरो देंतो इस फैगेरे बुट्टे पुड़ फल लेवरोईं तोपने, पन अज़ तगर एस पुड़ फल न मैल्हो एस केट्टी छ़ड एनी किजो रोड़ी ठार च़िकतां रख्खोरीए?’ 8 पन तैनी तैस जुवाब देइतां ज़ोवं, मीं निदतां एसेरे च़ेवरे पासन खाद छ़डनियें। 9 अगर फिरी भी फल न लगो त फिरी केट्टी देनोए।"*

10 एक्‍की आरामेरे दिहाड़े यीशु प्राथना घरे मां शिक्षा देने लगोरो थियो। 11 हेरा, तैड़ी अक कुआन्श थी ज़ै अठारे सालां केरि देंती भूतेरे सैइयेरे वजाई सेइं कुबड़ी भोवरी थी। तै सिद्धी न थी भोइ बटती। 12 यीशुए तै कुबड़ी कुआन्श लाही त एप्पू कां कुजाई ते ज़ोवं, "हे कुआन्श, तू अपनि तकलीफी करां छुटी जेई।" 13 ते यीशुए तैस कुआन्शी पुड़ हथ रख्खे ते तै लूशी बेझ़ोइं ते परमेशरेरी तारीफ़ केरने लगी। 14 पन प्राथना घरेरो प्रधान यीशु पुड़ नराज़ भोव कि, एनी ऐह कुआन्श, आरामेरे दिहाड़े किजो बझ़ाई ते ज़ोने लगो, "हफते मां शा दिहाड़े कम काज़ केरनेरे लेई आन, ते तैन्ने मां कोई बझ़ावरो भी लोड़चे, ते आरामेरी दिहैड़ी न।" 15 प्रभु यीशुए तैस जुवाब दित्तो, "हे पाखंडी लोकव कुन तुस आरामेरी दिहाड़ी अपने दांत या गधे खोलतां तैन पानी पियाने न नेथ? 16 त कुन एन रोड़ू न भोवं कि ज़ै कुआन्श बेज़्झ़ोइ तै अब्राहमेरे खानदाने मरांए, ज़ै अठारे सालां केरि देंती शैताने गुलैमी मां रख्खोरी थी त आरामेरे दिहाड़े ए कुआन्श छुटानी न थी?" 17 ज़ैखन यीशुए एना गल्‍लां ज़ोई त तैसेरे खलाफ ज़ोने बाले सेब्भी केरि बेइज़ती भोइ, ते सारे लोक यीशुए ज़ैना महिमारां कम्मां अपने हथेइं कियोरां थियां खुशी मनाने लगे।

18 तैखन यीशु तैन सेइं ज़ोने लगो, "परमेशरेरू राज़ कौस चीज़री ज़ेरूए अवं केस सेइं ज़ोईं? 19 तन शेरीएरे बीज़ेरू ज़ेरूए, ज़ैन एक्‍की मैन्हे एन्हतां अपनि बागी मां बेवं, पन ज़ैखन तैन बीज़ बेव गाते, तै उगतां सारे निक्‍के-निक्‍के बुट्टन केरां बड्डो भोते। ते अम्बरेरां च़ुड़ोलू भी तैस पुड़ बिशने लगां।"

20 यीशुए फिरी ज़ोवं, "अवं परमेशरेरे राज़्ज़ेरी मसाल केस सेइं देईं? 21 तैन खमीरेरू ज़ेरूए, ज़ैन केन्ची कुआन्शां आनू, ते हछे अट्टे मां मलाव ते सारू अट्टू खमीर बेनि ज़ोवं।"

22 यीशु अपने चेलन सेइं साथी यरूशलेम नगरे मांमेइं गांते बार नगरन मां ते ड्लाव्वन मां शिक्षा देंतो च़लोरो थियो। 23 केन्चे यीशु पुछ़ू, "हे प्रभु कुन थोड़े ज़ेरे लोक हमेशारी सज़ाही करां बच़ेले?" यीशु तैन सेइं ज़ोवं। 24 "परमेशरेरे राज़्ज़े मां सुन्कड़े दारेरां बत्तां गानेरी कोशिश केरा, किजोकि अवं तुसन सेइं ज़ोताईं कि बड़े लोक अन्तर गानेरी कोशिश केरेले पन न गेइ सकेले। 25 ज़ैखन घरेरो मालिक एक्‍की बार दार बंद केरि छ़डते, त तुस बेइर खड़ खड़े दार गुड़काते, ते बिनती केरते राथ कि, ‘हे प्रभु इश्शे लेई दार खोल्‍ल,’ ते तै तुसन जुवाब देते कि अवं तुसन न ज़ैनी तुस कौन आथ ते कोट्ठां एवरेथ? 26 तैखन तुस ज़ोले कि, ‘असेईं तीं सेइं साथी खेवरू पीयोरू नईं, ते तीं इश्शे अंगने मां असन शिक्षा नईं दित्तोरी।’ 27 पन तै तुसन सेइं ज़ोलो, ‘अवं तुसन न ज़ैनी तुस कौन आथ, ते कोट्ठां एवरेथ हे बेइमानव मीं करां दूर भोथ।’ 28 ज़ैखन तुस अब्राहम, इसहाक ते याकूब ते सब नेबन परमेशरेरे राज़्ज़े मां सामने लाहेले ते अपनो आप बेइरोवं कढते लाहेले, त लेरां देते ते दंत च़ापते राले। 29 लोक पूर्बेरां ते पछमेरां ते उत्तर ते दक्षिणेरे देंते यानी दुनियारे सारे लोकन मरां लोक परमेशरेरे राज़्ज़ेरी धामी मां एइते लाहेले। 30 ते हेरा किछ एरेन कि ज़ैना पेइले आन, तैना पत्रोवं भोनेन ते ज़ैना पत्रोवं आन, तैना पेइले भोनेन।"

31 तैखने किछ फरीसी लोक यीशु कां आए ते ज़ोने लगे, "इट्ठां निस ते च़लो गा, किजोकि हेरोदेस तीं मारने चाते।" 32 पन यीशुए तैन ज़ोवं, तैस मैन्हु सेइं ज़ै लौअरो ज़ेरो आहे, गेइतां तैस सेइं ज़ोथ कि, "अवं अज़ ते कालां भूतां केरो सैयो कढने ते बिमारन बज़्झ़ांनेरू कम केरने लगोरोईं ते एन कम ट्लेइ दिहाड़न मां मीं पूरू केरनूए। 33 बस्सा मीं अज़ ते कालां ते ट्लेईदी मीं सफर केरनूए, किजोकि नबी सिर्फ यरूशलेम नगरे मां मारे गाले।

34 "हे यरूशलेमे नगरेरे लोकव, हे यरूशलेम नगरेरे लोकव, तुसेईं केत्रे नबी कत्ल किये, ज़ैना बड़े पेइले तुसन कां आए, ते ज़ैना तुसन कां भेज़े तैन घोड़ेईं बेई, मीं केही फेरेईं सोचू कि यरूशलेम नगरी तेरे बच्‍चन अकोट्ठे केरि ज़ेन्च़रे कुकड़ी अपने बच्‍चन अपने फंघन हैठ रखचे, पन तुस राज़ी न भोए। 35 हेरा तुश्शू घर तुश्शे लेई छ़ड्डू गाते, ते अवं तुसन सेइं ज़ोताईं कि तुस मीं केन्ची तरीके भी न लेही सकेले, ज़ांतगर तुसन एन ज़ोनेरो मौको न एज्जेलो, धने तै ज़ै प्रभुएरे नंव्वे सेइं एइते।"