1 ज़ै आशिर्वाद परमेशरे मूसा अपनि मौती करां पेइले इस्राएली लोकन दित्तो तै ई आहे। 2 तैनी ज़ोवं,

"यहोवा सीनै पहाड़े पुड़ेरां अव, ते सेईर सेइं तैन केरे लेई निस्सो;

तैनी पारान पहाड़े पुड़ेरां अपनु तेज हिरावं,

ते लखेइं पवित्रन मांमेइं अव,

तैसेरे देइने हथ्थे सेइं तैन केरे लेई अग्गरी ज़ेरि विधि निस्सी।

3 तै पक्‍को लोकन सेइं प्यार केरते;

तैसेरे सब पवित्र लोक तेरे हथ्थे मां आन;

तैना तेरे पव्वन कां बिश्शोरे रहतन,

अक-अक तेरे वचन्न सेइं फैइदो उठाते।

4 मूसे असन कानून दित्तो, ते तै याकूबेरे मेण्डलरो अपनो हिस्सो भोव।

5 ज़ैखन आवामरे खास-खास मड़द, ते इस्राएली केरे गोट्ल अक भोइतां अकोट्ठे भोए,

तैखन तै यशूरूने* मां राज़ो भोव।

6 "रूबेन न मरे, बल्के ज़ींतो राए, फिरी भी तैसेरे मैन्हु थोड़े भोन।"

7 ते यहूदा पुड़ ई आशिर्वाद भोव ज़ै मूसे ज़ोवं,

"हे यहोवा तू यहूदारी शुन,

ते तैस तैसेरे लोकन कां पुज़ा।

तै अपने लेई एप्पु अपने हथ्थन सेइं लड़ो,

ते तूए तैसेरे मुखालफां केरे खलाफ तैसेरो मद्दतगार भोस।"

8 फिरी लेवी एरे बारे मां तैनी ज़ोवं,

"तेरे तुम्मीम ते ऊरीम तेरे भक्ते कां आन, ज़ै तीं मस्सा मां परखो,

ते ज़ैस सेइं साथी मरीबा नंव्वेरे नागे पुड़ तेरी गलबात भोइ;

9 तैनी त अपने अम्मा-बाजी केरे बारे मां ज़ोवं, ‘अवं तैन्न न ज़ैनी;’

ते न त तैनी अपने ढ्ला अपने मन्ने, ते न अपना मट्ठां पिशाना।

किजोकि तैनेईं तेरी गल्‍लां मेन्नी, ते तैना तेरे करारे पुड़ अमल केरन।

10 तैना याकूबे तेरो नियम, ते इस्राएले तेरो कानून शिखालेले;

ते तीं अग्गर धुप ते तेरी वेदी पुड़ पूरो जानबर होमबलि केरेलो।

11 हे यहोवा, तैसेरी जाईदाती पुड़ बरकत दे, ते तैसेरे हथ्थां केरि सेवा कबूल केरां;

तैसेरे मुखालफन ते बैर केरनेबालां केरे पिठी पुड़ एन्च़रे बह, कि तैना फिरी खड़े न भोइ सकन।"

12 फिरी तैनी बिन्यामीनेरे बारे मां ज़ोवं,

"यहोवारो तै ट्लारो मैन्हु, तैस कां निडर भोइतां बास केरेलो;

ते तै सैरी दिहैड़ी तैस पुड़ सैयो केरेलो,

ते तै तैसेरे कंधे केरे दरमियाने मां रहते।"

13 फिरी यूसुफेरे बारे मां तैनी ज़ोवं;

"इसेरो मुल्ख यहोवा करां बरकत हासिल केरे

मतलब अम्बरेरां कीमती चीज़ां ते ओश,

ते तैन डुग्घू पानी ज़ैन बुन्हे,

14 ते दिहाड़ेरे पकावरे कीमती फल,

ते ज़ैना कीमती चीज़ां हर महीने उगतिन,

15 ते पुराने पहाड़ां केरि रोड़ी चीज़ां,

ते सनातन पहाड़ां केरि कीमती चीज़ां,

16 ते धरती ते ज़ैना कीमती चीज़ां तैस मां भेरोरिन,

ते ज़ै झ़ल्‍लोवं मां रहतो थियो तैसेरी खुशी।

इन सेब्भी केरे बारे मां यूसुफेरे दोग्गे पुड़,

मतलब तैसेरे दोग्गेरे तैलू पुड़ ज़ै अपने ढ्लान करां अलग भोवरो थियो बरकते बरकत भोए।

17 तै बहादरे, मन्ना बेछ़रो ज़ेठोए, ते तैसेरां शिंगां जंगली दांतेरां ज़ेरां आन;

तैन सेइं तै मुल्खे-मुल्खेरे लोकन, बल्के धेरतरे पासेरे सब मैन्हेइं धकेलेलो;

तैना एप्रैमेरे लखेइं, ते मनश्शेरे हज़ारेईं आन।"

18 फिरी जबूलूनेरे बारे मां तैनी ज़ोवं,

"हे जबूलून, तू बेइर निसते बार,

ते हे इस्साकार, तू अपने डेरन मां आनन्द केर।

19 तैना मुल्खे-मुल्खेरे लोकन पहाड़े पुड़ कुजाले;

तै तैड़ी धर्म जग देले;

किजोकि तैना समुन्दरेरू धन,

ते रेती मां छ़ेपोरी कीमती चीज़न सेइं फैइदो उठाले।"

20 फिरी गादेरे बारे मां तैनी ज़ोवं,

"धन तै आहे ज़ै गादे बद्धाते!

गाद त शेरनरो ज़ेरो रहते,

ते पाखड़ी, बल्के क्रोड़रे तैलू तगर छ़िन्दते।

21 ते तैनी पेइलो अंश त अपने लेई च़ुनो,

किजोकि तैड़ी प्रधानेरे काबल हिस्सो रखोरो भोतो थियो;

तैखन तैनी आवामरे खास-खास-मड़दन सेइं साथी एइतां यहोवारो ठहरावरो धर्म,

ते इस्राएले सेइं साथी भोइतां तैसेरे कानून मन्नो।"

22 फिरी दानेरे बारे मां तैनी ज़ोवं,

"दान त बाशाने सेइं छालां मारनेबाले शेरेरो बच्‍चोए।"

23 फिरी नप्ताली एरे बारे मां तैनी ज़ोवं,

"हे नप्ताली, तू ज़ै यहोवारे खुशी सेइं रज़्ज़ोरोस,

ते तैसेरी बरकती सेइं भरपूर भोवरोस,

तू पश्चिम ते दक्षिणेरे मुल्खेरो अधिकारी भोस।"

24 फिरी आशेरेरे बारे मां तैनी ज़ोवं,

"आशेरे बच्‍चां केरे बारे मां बरकत हासिल केरे;

तै अपने ढ्लान मां ट्लारो रालो,

ते अपने पव तेले मां डोबेलो।

25 तेरे बुट लोंहेरे ते पितलरे भोल्हे,

ते ज़ेन्च़रे तेरे दिहाड़े तेरही तेरी ताकत भोए।"

26 "हे यशूरून, परमेशरेरो ज़ेरो होरो कोई नईं,

तै तेरी मद्दत केरनेरे लेई अम्बरे पुड़,

ते अपनो कोप हिरातो

अम्बरे पुड़ सुवार भोइतां च़लते।

27 हमेशारो परमेशर तेरे लेई छ़पनेरी ठारे,

ते बुन हमेशारी पाखड़ी।

तै दुश्मन्न तेरे सामनेरां कढेलो,

ते ज़ोते, तैन्न सत्यानाश केर।

28 ते इस्राएल निडर बस्सोरो रहते,

अन्न ते नंव्वे दाछ़रे रसेरे मुल्खे मां याकूबेरी ठारन* अकैल्‍लो रहते;

ते तैसेरे बेइयें अम्बरेरां ओश पेती रहतीए।

29 हे इस्राएल, तू कुन ही धन आस!

हे यहोवाए करां मुक्ति हासिल कियोरी आवाम तेरे बराबर कौने?

तै त तेरी मद्दतरे लेई ढाल,

ते तेरे प्रतापेरे लेई तलवारे;

तेरे दुश्मन तेरी तारीफ़ केरेले,

ते तू तैन केरि उच्‍ची ठारन* ढ्लेन्च़ेलो।"