व्यवस्थाविवरण 2

इस्राएली लोक सुनसान ठैरी मां भटकतन

1 "तैखन तैस हुक्मेरे मुताबिक, ज़ै यहोवा मीं दित्तोरो थियो, अस घुमतां च़ले जे, ते लाल समुन्दरेरे बत्तरे सुनसान ठारारे पासे जे; ते बड़े दिहाड़न तगर सेईर पहाड़ेरे बेइर-बेइर च़लते राए। 2 तैखन यहोवाए मीं सेइं ज़ोवं, 3 ‘तुसन लोकन इस पहाड़ेरे बेइर-बेइर च़लते बड़े दिहाड़े बीती जे, हुनी घुमतां उत्तरेरे पासे च़ला। 4 ते तू प्रजारे लोकन मेरे इना हुक्म शुना, कि तुस सेईरेरे रानेबाले अपने ढ्लाए एसावेरे लोकां केरि सरहद्दी मेइं भोइतां गाने पुड़ आथ; एल्हेरेलेइ तैना तुसन करां डेरि गाले। एल्हेरेलेइ तुस बड़े खबरदार राथ; 5 तैन सेइं लड़ाई न केरथ; किजोकि तैन केरे मुल्खे मरां अवं तुसन पव रखनेरे लेई ठार तगर न देइलो, किजोकि मीं सेईर पहाड़ एसावी लोकां केरे अधिकारे मां कियोरूए। 6 तुस तैन करां रोट्टी मुल्‍ले घिन्तां खेइ सकेले, ते रुपेइये देइतां खुहन मरां पानी भेरतां पी सकेले। 7 किजोकि तुश्शो परमेशर यहोवा तुश्शे हथ्थां केरे सब कम्मां केरे बारे मां तुसन बरकत देतो एवरोए; इस बड़े सुनसान ठैरी मां तुश्शू च़लनू फिरनू तै ज़ानते; इन 40 सालन मां तुश्शो परमेशर यहोवा तुसन सेइं साथी-साथी राहोरोए; ते तुसन कोन्ची चीज़री घटी नईं भोवरी।’ 8 ते अस सेईरे मां रानेबाले एसावेरे खानदानेरे लोकन मांमेइं भोइतां ज़ैना इश्शे रिश्तेदारन, अराबारेरे बत्तां, ते एलत ते एस्योनगेबेर नगरन पत्रोवं छ़ेडतां च़ले। फिरी अस मुड़तां मोआबेरे सुनसान ठैरारे बत्ती मांमेइं भोइतां च़ले।"

9 ते यहोवा मीं सेइं ज़ोवं, "मोआबी लोकन न सतेइयथ ते न तैन सेइं लड़ाई केरथ, किजोकि अवं तैन केरे मुल्खे मरां किछ भी तेरे अधिकारे मां न केरेलो किजोकि मीं आर नगर लूतेरे खानदानेरे लोकां केरे अधिकारे मां कियोरूए। 10 (पुराने दिहाड़न मां तैड़ी एमी लोक बस्सोरे थिये, ज़ैना अनाकी लोकां केरे ज़ेरे ताकतबर ते लम्मे-लम्मे ते गिनती मां बड़े थिये; 11 ते अनाकी लोकां केरे ज़ेरे तैना भी रपाई*2:11 रपाई मतलब दानव गने गाते थिये, पन मोआबी तैन जो एमी ज़ोतन। 12 ते पुराने दिहाड़न मां सेईरे मां होरी नंव्वेरे लोक बस्सोरे थिये, पन एसावी लोकेईं तैना तैस मुल्खे मरां कढे, ते अपने सामनेरां नाश किये ते तैन केरि ठारी पुड़ एप्पु बेस्सी जे; ज़ेन्च़रे कि इस्राएली लोकेईं यहोवारे दित्तोरे अपने अधिकारेरे मुल्खे मां कियूं।) 13 हुन्ना तुस लोक अग्रोवं च़ेलतां जेरेद दरियारे पार गाथ।" तैखन अस जेरेद दरियारे पार जे। 14 ते इश्शे कादेशबर्ने करां लेइतां जेरेद दरियारे पार भोने तगर 38 साल बीती जे, तैस दरमियाने मां यहोवारे कसमरे मुताबिक तैस पीढ़रे सब जंग लड़नेबाले डेरन करां बेइर नाश भोइ जे। 15 ते ज़ांतगर तैना नाश न भोए तांतगर यहोवारो हथ तैन्न डेरन मरां मिटानेरे लेई तैन केरे खलाफ बद्धतो राव।

16 "ज़ैखन सब जंग लड़नेबाले मरते-मरते लोकां केरे दरमियाने मरां नाश भोइ जे, 17 तैखन यहोवाए मीं सेइं ज़ोवं, 18 ‘हुनी मोआबेरे सरहद्दी, मतलब आर नगर पार केर; 19 ते ज़ैखन तू अम्मोनी लोकां केरे सामने गेइतां तैन केरे नेड़े पुज़स, तैखन तैन्न न सतेइयथ ते तैन सेइं न छ़ेड़थ, किजोकि अवं अम्मोनी लोकां केरे मुल्खे मरां किछ भी तेरे अधिकारे मां न केरेलो, किजोकि मीं तै लूतेरे खानदानेरे अधिकारे मां कियोरोए। 20 (तै मुल्ख भी रपाई लोकां केरो गनो गातो थियो, किजोकि पुराने वक्ते मां रपाई, ज़ैन जो अम्मोनी जमजुम्मी ज़ोते थिये, तैना तैड़ी रहते थिये; 21 तैना भी अनाकी लोकां केरे ज़ेरे ताकतबर ते लम्मे-लम्मे ते गिनती मां बड़े थिये; पन यहोवाए तैना अम्मोनी लोकां केरे सामनेरां नाश किये, ते तैनेईं तैना तैस मुल्खे मरां कढे, ते तैन केरि ठारन पुड़ एप्पु राने लग्गे; 22 ज़ेन्च़रे कि तैनी सेईरेरे रानेबाले एसावी लोकां केरे सामनेरां होरी नंव्वेरे लोक नाश किये, ते तैनेईं तैना तैस मुल्खे मरां कढे, ते अज़ तगर तैन केरि ठारी पुड़ तैना एप्पु रहतन। 23 तेरहे अव्वी लोकन, ज़ैना गाज़ा नगरे तगर ड्लाव्वन मां बस्सोरे थिये, तैन्न कप्तोरी लोकेईं ज़ैना कप्तोरे लोकन मरां निस्सोरे थिये नाश किये, ते तैन केरि ठारी पुड़ एप्पु राने लगे।) 24 हुनी तुस लोक उठतां अग्रोवं च़ला, ते अर्नोन नालेरे पार च़ला: शुन, अवं मुल्खे सने हेशबोनेरे राज़े एमोरी सीहोने तेरे हथ्थे मां केरताईं; एल्हेरेलेइ तैस मुल्खे अपने अधिकारे मां केरनो शुरू केरा, ते तैस राज़े सेइं लड़ाई केरा। 25 ते ज़ेत्रे लोक धेरती पुड़ रहतन तैन सेब्भी केरे मने मां अवं अज़्ज़ेरे दिहाड़े करां तेरे वजाई सेइं डर ते थर्क लगनी लेइलो; तैना तेरी खबर शुन्तां तेरे डरके मारे थरकेले ते दुखी भोल्हे।’

सीहोन राज़ेरी हार

26 "एल्हेरेलेइ मीं कदेमोत नंव्वेरे सुनसान ठैरी करां हेशबोनेरे राज़े सीहोने कां मेल मिलापेरी इना गल्‍लां ज़ोने जो दूत भेज़े: 27 ‘मीं अपने मुल्खे मांमेइं भोइतां गाने दे; अवं आम बत्ती पुड़मेइं च़लतो गेइलो, ते देइने ते बांए पासे न मुड़ेलो। 28 तू रुपेइये नेइतां मीं खानेरी चीज़ां देइयां, कि अवं खेइ, ते पानी भी रुपेइये नेइतां मीं देइयां, कि अवं पीं; सिर्फ मीं पव-पव च़ले गाने दे, 29 ज़ेरो सेईरेरे रानेबाले एसावी लोकेईं ते आर नगरेरे रानेबाले मोआबी लोकेईं मीं सेइं कियूं, तेरहु तू भी मीं सेइं केर, एन्च़रां अवं यरदने पार भोइतां तैस मुल्खे मां पुज़ेलो ज़ै इश्शो परमेशर यहोवा असन देते।’ 30 पन हेशबोनेरे राज़े सीहोने अस अपने मुल्खे मांमेइं भोइतां च़लने न दित्ते; किजोकि तुश्शे परमेशर यहोवाए तैसेरो दिल सखत ते तैसेरो मन ज़िद्दी कियोरो थियो, एल्हेरेलेइ कि तैस तुश्शे हथ्थे मां केरे, ज़ेरू कि अज़ बांदू आहे। 31 ते यहोवाए मीं सेइं ज़ोवं, ‘शुन, अवं मुल्खे सने सीहोन राज़े तेरे कब्ज़े मां केरने पुड़ आईं; तैस मुल्खे अपने अधिकारे मां केरनो शुरू केर।’ 32 तैखन सीहोन अपनि सैरी सेनाई समेत निस्सी अव, ते इश्शो मुकाबलो केरतां लड़ाई केरनेरे लेई यहस नगरे तगर च़ेढ़तां अव। 33 ते इश्शो परमेशर यहोवाए तै इश्शे ज़िरिये हाराव, ते असेईं तैसेरे मट्ठन ते सारे सेनाई सने मैरी छ़डो। 34 ते तैस वक्ते असेईं तैसेरे सारे नगर निये, ते एक्‍की-एक्‍की बस्सोरे नगरेरी कौन्शन ते बाल-बच्‍चन समेत इड़ी तगर सत्यानाश कियूं कि कोई न छ़डो; 35 पन जानबर असेईं अपने लेई ने, ते तैन नगरां केरि लूट भी असेईं नेवरीए ज़ै असेईं ज़ींतोरी थी। 36 अर्नोनेरे नालेरे पासेबाले अरोएर नगरे करां लेइतां, ते तैस नालेरे नगरे करां लेइतां, गिलादे तगर कोई नगर एरू उच्‍चु न राव ज़ैन इश्शे सामने रेइ सके; किजोकि इश्शे परमेशर यहोवाए सब इश्शे कब्ज़े मां कियूं। 37 पन अस अम्मोनी लोकां केरे मुल्खेरे नेड़े, बल्के यब्बोक दरियारे उस पार ज़ेत्रो मुल्खे, ते पहाड़ी मुल्खेरे नगर ज़ैड़ी गाने करां इश्शे परमेशर यहोवाए असन ठाकेरू थियूं, तैड़ी अस न जे।"