1 मूसे सारे इस्राएली लोकन कुजेइतां ज़ोवं, "हे इस्राएली लोकव, अवं ज़ैना-ज़ैना विधि ते नियम अज़ तुसन शुनाताईं तैन शुना, एल्हेरेलेइ कि तैन्न शिखतां ज़रूर तैन मन्ते राथ। 2 इश्शो परमेशर यहोवाए त होरेब पहाड़े पुड़ असन सेइं करार कियोरोए। 3 ई करार यहोवाए इश्शे बुज़ुर्गन सेइं नईं, बल्के असन सेइं कियोरो थियो, ज़ैना इड़ी अज़्ज़ेरे दिहाड़े ज़ींतेम। 4 यहोवाए तैस पहाड़े पुड़ अग्गी मरां तुसन लोकन सेइं आमने-सामने गल्‍लां की; 5 तैस अग्गरे डरे सेइं तुस पहाड़े पुड़ न च़ढ़े, एल्हेरेलेइ अवं यहोवारे ते तुश्शे मझ़ाटे तैसेरू वचन तुसन ज़ोनेरे लेई खड़ो राव। तैखन तैनी ज़ोवं,

6 "तेरो परमेशर यहोवा अवं आईं, ज़ैने तू मिस्र मुल्खे मरां केढतां आनोरोस, ज़ैड़ी तू गुलामेरो ज़ेरो रहतो थियो।

7 "मेरे अलावा होरि कोन्ची परमेशर केरतां न मेन्नां।

8 "तू अपने लेई कोई मूरती घड़ाई केरतां न बनेइयां, न कोन्चेरी शकल बनेइयां ज़ै अम्बरे मां, या धेरती पुड़, या धेरतरे पैनी मां भोए; 9 तू तैन कां न झुकां ते तैन केरि आराधना न केरां; किजोकि अवं तेरो परमेशर यहोवा जलन रखनेबालो परमेशर आईं, ते ज़ैना मीं सेइं बैर रखतन तैन केरे मट्ठन, पोट्लड़न, ते पड़पोट्लड़न भी सियानां केरि सज़ाह देताईं, 10 ते ज़ैना मीं सेइं प्यार केरतन ते मेरे हुक्मन मनतन तैन हज़ारन पुड़ अवं दया केरताईं।

11 "तू अपने परमेशर यहोवारू नवं बेफैइदू न घिन्ना; किजोकि ज़ै यहोवारू नवं बेफैइदू घिन्ने तै तैन्न बेकसूर न ठहरालो।

12 "तू थैकरी दिहाड़ी मेनतां पवित्र रेखां, ज़ेन्च़रे तेरे परमेशर यहोवाए तीं हुक्म दित्तोरोए। 13 हफतेरे शा दिहाड़े त मेहनत केरतां अपनु सब कम-काज़ केरनू; 14 पन सत्तोवं दिहाड़ी तेरे परमेशर यहोवारे लेई थैकरी दिहाड़ीए; तैस मां न तू कोन्ची किसमेरू कम-काज़ केरां, न तेरू मट्ठू, न तेरी कुई, न तेरो नौकर, न तेरी नौकरानी, न तेरो दांत, न तेरो गधो, न तेरो कोई जानबर, न कोई तेरे नगरे मां रानेबालो परदेशी; ज़ैस सेइं तेरो नौकर ते तेरी नौकरानी भी तेरो ज़ेरो आराम केरे। 15 ते ई गल याद रखनी कि मिस्र मुल्खे मां तू गुलाम थियो, ते तैट्ठां तेरो परमेशर यहोवाए तू ज़ोरेबाले हथ्थे ते अग्रोवं कियोरी पाखड़रे ज़िरिये केढतां आनोरोस; एल्हेरेलेइ तेरो परमेशर यहोवा तीं आरामेरे दिहाड़े मन्नेरो हुक्म देते।

16 "अपने अम्मा-बाजी केरि आदर केरां, ज़ेन्च़रे कि तेरे परमेशर यहोवाए तीं हुक्म दित्तोरोए; तैस सेइं ज़ै मुल्ख तेरो परमेशर यहोवा तीं देते तैस मां तेरी लम्मी उमर भोल्ही, ते तेरू भलू भोल्हु।

17 "तू कत्ल न केरां।

18 "तू व्यभिचार न केरां।

19 "तू च़ोरी न केरां।

20 "तू अपने पड़ोसेरे खलाफ झूठी गवाही न देइयां।

21 "तू न केन्चेरे कौन्शरू लालच़ केरां, ते न केन्चेरे घरेरू लालच़ केरां, न तैसेरे उडारेरू, न तैसेरे नौकरेरू, न तैसेरी नौकरैनरू, न तैसेरे दांत या गधेरू, न तैसेरी कोन्ची होरि चीज़रू लालच़ केरां।" 22 इन्ना वचन यहोवा तैस पहाड़े पुड़ अग, ते बिदलार, ते बड़े आंधरेरे मझ़ाटे मरां तुश्शी सारी मेण्डली सेइं पुकैरतां ज़ोए; ते इस करां जादे होरू किछ न ज़ोवं। ते तैन्न तैनी घोड़ां केरि दूई तेख्तन पुड़ लिखतां मीं दित्ते।

23 "ज़ैखन पहाड़ अग्गी सेइं बलने लगोरू थियूं ते तुसेईं तै शब्द आंधरे मरां एइतो शुनो, तैखन तुस ते तुश्शे गोट्लां केरे सब खास-खास मड़द ते तुश्शे बुज़ुर्ग मीं कां आए; 24 ते तुस ज़ोने लगे, ‘इश्शे परमेशर यहोवाए असन अपनु तेज ते अपनि महिमा हिरेवरीए, ते असेईं तैसेरो शब्द अग्गी मरां एइतो शुनोरोए; अज़ असेईं हेरू कि अगर परमेशर मैन्हन सेइं गल्‍लां केरते फिर भी मैन्हु ज़ींतो रहते। 25 हुनी अस किजो मेरि गाम? किजोकि एत्री बेड्डी अग्गी सेइं अस भस्म भोइ गामेले; ते अगर अस अपने परमेशर यहोवारो शब्द फिरी शुनम, तैखन त मेरि गामेले। 26 किजोकि सारे प्रैणन मरां कौन एरहो आहे ज़ै इश्शो ज़ेरो ज़ींतो ते अग्गी मरां ज़ोते परमेशरेरो शब्द शुन्तां ज़ींतो बच़े? 27 एल्हेरेलेइ तू नेड़े गा, ते ज़ैन किछ इश्शो परमेशर यहोवा ज़ोए तैस शुन; फिरी ज़ैन किछ इश्शो परमेशर यहोवा ज़ोए तैस असन सेइं ज़ोइयां; ते अस तैस शुनमेले ते तैस मनमेले।’"

28 "ज़ैखन तुस मीं सेइं इना गल्‍लां ज़ोइ राहोरे थिये तैखन यहोवाए तुश्शी गल्‍लां शुनी; तैखन तैनी मीं सेइं ज़ोवं, ‘इन लोकेईं ज़ैना-ज़ैना गल्‍लां तीं सेइं ज़ोवरिन तैना मीं शुनोरिन; तैनेईं ज़ैन किछ ज़ोवं तैन ठीके ज़ोवं। 29 रोड़ू भोथू कि तैन केरो मन सदा एरहो बनोरो राए, कि तैना मेरो डर मेनतां मेरे सब हुक्मन पुड़ च़लते रान, ज़ैस सेइं तैन केरि ते तैन केरे खानदानेरी हमेशा भलियाई भोती राए! 30 एल्हेरेलेइ तू गेइतां तैन सेइं ज़ो, कि अपने-अपने डेरन जो वापस गाथ। 31 पन तू इड़ी मीं कां खड़ो रह, ते अवं तैना सारे हुक्म ते विधि ते नियम ज़ैन तीं तैन्न शिखालने भोल्हे तीं सेइं ज़ोइलो, ज़ैस सेइं तैना तैस मुल्खे मां ज़ेसेरो अधिकार अवं तैन्न देने पुड़ आईं मनन।’ 32 एल्हेरेलेइ तुस अपने परमेशर यहोवारे हुक्मेरे मुताबिक केरने मां एतिहात केरा; न त देइने मुड़नू ते न बांए। 33 ज़ैस बत्ती पुड़ च़लनेरो हुक्म तुश्शे परमेशर यहोवाए तुसन दित्तोरोए तैस सारे बत्ती पुड़ च़लते राथ, कि तुस ज़ींते राथ, ते तुश्शू भलू भोए, ते ज़ैस मुल्खेरे तुस अधिकारी भोल्हे तैस मां तुश्शी लम्मी उमर भोए।"