व्यवस्थाविवरण 34

मूसेरी मौत

1 फिरी मूसा मोआबेरे अराबारे नबो पहाड़े पुड़, ज़ै पिसगारे एक्‍की च़ोटी ते यरीहोएरे सामने, च़ेढ़ी जेव; ते यहोवाए तैस दान नगरे तगरे गिलाद नंव्वेरे सारो मुल्ख, 2 ते नप्ताली एरहो सारो मुल्ख, ते एप्रैम ते मनश्शेरे मुल्ख, ते पश्चिमेरे समुन्दरे तगर यहूदारो सारो मुल्ख, 3 ते दक्षिण मुल्ख, ते सोअरे तगर यरीहो नंव्वेरो खजूरे बाले नगरेरी वादी, इन सब हिरावं। 4 तैखन यहोवाए तैस सेइं ज़ोवं, "ज़ैस मुल्खेरे बारे मां मीं अब्राहम, इसहाक, ते याकूबे सेइं कसम खेइतां ज़ोवरू थियूं, कि अवं इस तेरे खानदाने देइलो तै ईए आहे। मीं ई तीं सामने हिरावरोए, पन तू पार भोइतां तैड़ी गेई न बटेलो।" 5 तैखन यहोवारे ज़ोनेरे मुताबिक तैसेरो दास मूसो तैट्ठी मोआब मुल्खे मां मेरि जेव, 6 ते यहोवा तै मोआबेरे मुल्खे मां बेतपोरे सामने एक्‍की वैदी मां दब्बो; ते अज़्ज़ेरी दिहाड़ी तगर कोन्ची पतो नईं तैसेरी कब्र कोड़ि आहे। 7 मूसा अपनि मौतरे वक्ते 120 सालां केरो थियो; पन न त तैसेरी एछ़्छ़ी केरि लौ घट भोइ, ते न तैसेरी ताकत घटी। 8 ते इस्राएली मोआबेरे अराबा मां मूसेरे लेई 30 दिहाड़न तगर लेरां देते राए; तैखन मूसेरे लेई लेरां देने ते मातम केरनेरे दिहाड़े पूरे भोए।

मूसेरे ठारी पुड़ यहोशू

9 ते नूनेरू मट्ठू यहोशू अक्लमन्द आत्माई सेइं भेरतां थियो, किजोकि मूसे अपने हथ तैस पुड़ रखोरे थिये; ते इस्राएली तैस हुक्मेरे मुताबिक ज़ैना यहोवा परमेशरे मूसे दित्तोरे थिये तैसेरी मन्ते राए। 10 ते मूसेरो ज़ेरो इस्राएले मां एरहो कोई नबी न थियो, ज़ैस सेइं यहोवा आमने-सामने गल्‍लां की, 11 ते तै यहोवा फ़िरौन ते तैसेरे सेब्भी कम केरनेबालां केरे सामने, ते तैसेरे सारे मुल्खे मां, सब निशान ते चमत्कार केरने भेज़ोरो थियो, 12 ते तैनी सारे इस्राएली लोकां केरि नज़री मां मज़बूत हथ ते बड़ां-बडां कम्मां हिरां।