व्यवस्थाविवरण 9

इस्राएली लोकां केरे हुक्म ट्लोड़नेरे बारे मां ज़िक्र

1 "हे इस्राएल, शुन, अज़ तू यरदने पार एल्हेरेलेइ गाने बालोस, कि एरी कौमां ज़ैना तीं करां बेड्डी ते ताकतबरन, ते एरे बड्डे नगरन ज़ैन केरि दिवारां अम्बरे तगर उच्‍ची आन, अपने अधिकारे मां नेस। 2 तैन मां बड्डे-बड्डे ते लम्मे-लम्मे मैन्हु, मतलब अनाकवंशी रहतन, ज़ैन केरे बारे मां तू ज़ानतस, ते तैन केरे बारे मां तीं इन शुनोरूए, कि अनाकवंशी केरे सामने कौन रेइ सकते? 3 एल्हेरेलेइ अज़ तू इस गल्‍ली ज़ान, कि ज़ै तीं अग्री-अग्री भस्म केरनेबाली अग्गरो ज़ेरो पार गाने बालोए तै तेरो परमेशर यहोवाए; ते तै तैन नाश केरेलो, ते तै तैन्न तेरे सामने दबालो; ते तू यहोवारे वचनेरे मुताबिक तैन्न तैस मुल्खे मरां केढतां लूशी नाश केरेलो।

4 "ज़ैखन तेरो परमेशर यहोवा तैन्न तेरे सामनेरां कढेलो तैखन इन न सोचां, कि यहोवा तेरे धार्मिकतारे वजाई सेइं तू इस मुल्खेरो अधिकारी भोनेरे लेई आनोरोस, पन तैन कौमां केरे दुष्टेरे वजाई सेइं यहोवा तैन्न तेरे सामनेरां कढेलो। 5 तू ज़ै तैन केरे मुल्खेरो अधिकारी भोनेरे लेई गेई राहोरोस, इसेरी वजा तेरी धार्मिकता या मनेरी सच़्च़ाई नईं; तेरो परमेशर यहोवा ज़ै तैन कौमन तेरे सामनेरां कढते, तैसेरी वजा तैन केरि बुराई आहे, ते इन भी कि ज़ै वाधो तैनी तेरे पूर्वज अब्राहम, इसहाक, ते याकूबे सेइं कसम खेइतां कियोरो थियो, तैस तै पूरो केरनो चाते।

6 "एल्हेरेलेइ इन ज़ान कि तेरो परमेशर यहोवा, ज़ै तीं तै रोड़ो मुल्ख देते कि तू तैसेरो अधिकारी भोस, तैस तै तेरे धार्मिकतारे वजाई सेइं नईं देइ राहोरो; किजोकि तू त अक ढीठ कौम आस। 7 इस गल्‍ली याद रख ते कधी भी न बिसरां, कि सुनसान ठारी मां तीं कोस-कोस तरीके सेइं अपनो परमेशर यहोवा सरकेवरोए; ते ज़ैस दिहाड़े करां तू मिस्र मुल्खे मरां निस्सोरस ज़ांतगर तुस इस ठारी पुड़ न पुज़्ज़े तांतगर तुस यहोवा सेइं बगावत-बगावत केरते एवरेथ। 8 फिरी होरेब पहाड़े कां भी तुसेईं यहोवा सरकाव, ते तै सेरकोइतां तुसन नाश केरनो चातो थियो। 9 ज़ैखन अवं तैस करारेरी घोड़ेरी तेख्ती ज़ै यहोवाए तुसन सेइं कियोरो करार थियो आन्नेरे लेई पहाड़े पुड़ च़ेढ़ी जेवरो थियो, तैखन 40 दिहाड़े ते 40 रात पहाड़े पुड़ बा राव; ते मीं न त रोट्टी खाइ न पानी पियूं। 10 ते यहोवाए मीं अपने हथ्थेरी लिखोरी घोड़ां केरि दूईये तेख्ती दित्ती, ते तैना वचन ज़ैना यहोवाए पहाड़े पुड़ अग्गी मरां सभारे दिहाड़े तुसन सेइं ज़ोवरे थिये तैना सब तैन पुड़ लिखोरे थिये। 11 ते 40 दिहाड़े ते 40 रातां केरे बीते गाने पुड़ यहोवा घोड़ां केरि तैना दूई करारेरी तेख्ती मीं दित्ती। 12 ते यहोवाए मीं सेइं ज़ोवं, ‘उठ, इट्ठां जल्दी बुन गा; किजोकि तेरी प्रजारे लोक ज़ैना तीं मिस्रे मरां केढतां आनोरेन तैना बिगड़ी जेवरेन; ज़ैस बत्तां च़लनेरो हुक्म मीं तैन्न दित्तोरो थियो, तै तैनेईं जल्दी छ़ेडी दित्तोरीए; मतलब तैनेईं अकदम अपने लेई अक मूरती ढैलतां बनेवरीए।’

13 "फिरी यहोवाए मीं सेइं इन भी ज़ोवं, मीं तैना लोक हेरे, तैना ढीठ कौमरे लोक आन; 14 एल्हेरेलेइ हुनी मीं तू न रोक, ताके अवं तैन्न नाश केरि छ़ेडी, ते धेरती पुड़ां तैन केरू नवं निशान मिटेई छ़ेडी, ते अवं तैन करां बधेइतां अक बड़ी ते ताकतबर कौम तीं सेइं पैदा केरेलो। 15 तैस वक्ते अवं मुड़तां पहाड़े पुड़ां उन्ढो ओस्सो, ते पहाड़ अग्गी सेइं फुकोई राहोरू थियूं ते मेरे दूईये हथ्थन मां करारेरी दूईये तेख्ती थी। 16 ते मीं हेरू कि तुसेईं अपने परमेशर यहोवारे खलाफ महापाप कियोरोए; ते अपने लेई अक बछ़ड़ू ढैलतां बनावं, ते जल्दी तै बत ज़ैस पुड़ च़लनेरो हुक्म यहोवाए तुसन दित्तोरो थियो तुसेईं शेरी छ़डी। 17 तैखन मीं तैना दूईये तेख्ती अपने दूईये हथ्थन मरां नेइतां शैरी, ते तुश्शी एछ़्छ़ी केरे सामने तैना ट्लोड़ी छ़ेडी। 18 तैखन तुश्शे तैस महा पापेरे वजाई सेइं ज़ैस केरतां तुसेईं यहोवारे नज़री मां बुराई की, ते तैस सरक दुवेवरी थी, अवं यहोवारे सामने तुत्तरेरे भारे झुको, ते पेइलू ज़ेरू, मतलब 40 दिहाड़े ते 40 रातन तगर, न त रोट्टी खाइ ते न पानी पियूं। 19 अवं त यहोवारे तैस कोपे ते जलजलाहटी सेइं डेरि जेवरो थियो, किजोकि तै तुसन सेइं खुश न भोइतां तुश्शो सत्यानाश केरने पुड़ थियो। पन यहोवाए तैस बार भी मेरी शुनी छ़डी। 20 ते यहोवाए हारूने पुड़ एत्रो सेरकोव कि तैसेरो भी सत्यानाश केरनो चाव; पन तैस्से वक्ते मीं हारूनेरे लेई भी प्राथना की। 21 ते मीं तैन बछ़ड़ू ज़ैस बनेइतां तुस पापी भोइ जेवरे थिये नेइतां अग्गी मां छ़ेडतां फुक्‍की दित्तू; ते फिरी तैन पिही-पिही एरू चूर-चूर केरतां छ़डू कि तैन धूड़रू ज़ेरू बारीक भोइ जेवं; ते तैसेरी तै मांज़न तैस दरियाए मां शारी ज़ै पहाड़ेरां निस्तां बुन बगतो थियो।

22 "फिरी तबेरा, ते मस्सा, ते किब्रोतहत्तावा मां भी तुसेईं यहोवा परमेशर सरकाव। 23 फिरी ज़ैखन यहोवाए तुस कादेशबर्ने मरां इन ज़ोइतां भेज़े, ‘गेइतां तैस मुल्खे मां ज़ै मीं तुसन दित्तोरोए अधिकारी भोइ गाथ,’ तैखन भी तुसेईं अपने परमेशर यहोवारे हुक्मेरे खलाफ खलाफत की, ते न त तैसेरो विश्वास कियो, ते न तैसेरी गल मन्नी। 24 ज़ेइसेरो देंतो*9:24 ज़ेइसेरो देंतो40 साल पेइले ज़ैखन मूसा इस्राएली लोक मिस्रे मरां कढे। अवं तुसन ज़ानताईं*9:24 अवं तुसन ज़ानताईं या परमेशर तुसन ज़ानते तैस दिहाड़े करां लेइतां तुस यहोवारी बगावत केरते राए।

25 "अवं यहोवारे सामने 40 दिहाड़े ते 40 रात तुत्तरेरे भारे पेवरो राव, किजोकि यहोवा ज़ोवरू थियूं, कि तै तुश्शो सत्यानाश केरेलो। 26 ते मीं यहोवा कां ई प्राथना की, ‘हे प्रभु यहोवा, अपने प्रजारे रूपे मां अपनो हिस्सो, ज़ैना तीं अपने महा कोपे करां छुटेवरन, ते ज़ैना तीं अपने ज़ोरेबाले हथ्थे सेइं मिस्रे मरां कढोरेन, तैन्न नाश न केर। 27 अपने दासन अब्राहम, इसहाक, ते याकूबे याद केर; ते इन लोकां केरे ढीठ, ते बुराई, ते पापे पुड़ नज़र न केर, 28 ज़ैस सेइं एरू न भोए कि ज़ैस मुल्खे मरां तीं असां केढतां आनोरेम, मिस्री लोक ज़ोन, कि यहोवा तैन्न तैस मुल्खे मां पुज़ेई न सको, ज़ैस देनेरो वाधो तैन्न सेइं कियोरो थियो, ते तैन सेइं बैर भी रखतो थियो, इस्से वजाई सेइं तैनी तैना सुनसान ठैरी मां एन्हतां मारे।’ 29 इना लोक तेरे लोक ते अपनो हिस्सो आन, ज़ैना तीं अपने शक्ति ते ताकतबर पाखड़रे ज़िरिये सेइं आनोरेन।"