1 "हुनी, हे इस्राएल, ज़ैना-ज़ैना विधि ते नियम अवं तुसन शिखालनो चाताईं तैन्न शुना, ते तैन पुड़ च़ला; ज़ैस सेइं तुस ज़ींते राथ, ते ज़ै मुल्ख तुश्शे सियानां केरो परमेशर यहोवा तुसन देते तैस मां गेइतां तैसेरे अधिकारी भोइ गाथ। 2 ज़ै हुक्म अवं तुसन शुनाताईं तैस मां न त किछ बधेइयथ, ते न किछ घटेइयथ; तुश्शो परमेशर यहोवारे ज़ैना-ज़ैना हुक्म अवं तुसन शुनाताईं तैन्न तुस मेन्नथ। 3 तुसेईं त अपने एछ़्छ़न सेइं लाहेरूए कि बालपोर देबतेरे वजाई सेइं यहोवा कुन-कुन कियूं; मतलब ज़ेत्रे मैन्हु बालपोर देबते पत्ती जेवरे थिये तैन सेब्भन तुश्शे परमेशर यहोवा तुश्शे दरमियाने मरां सत्यानाश किये;✝ 4 पन तुस ज़ैना अपने परमेशर यहोवा सेइं साथी लिपटोरे राहोरेथ सब अज़ तगर ज़ींतेथ। 5 शुना, मीं त अपने परमेशर यहोवारे हुक्मेरे मुताबिक तुसन विधि ते नियम शिखालोरेन, कि ज़ैस मुल्खेरे अधिकारी भोनेरे लेई गातथ तैस मां तुस तैन केरे मुताबिक च़ला। 6 एल्हेरेलेइ तुस तैन्न धारण केरा ते मन्ना; किजोकि होरि मुल्खां केरे लोकां केरे सामने तुश्शी अक्ल ते समझ़ त इस्से सेइं बांदी भोल्ही, मतलब तैना इन सब हुक्मन शुन्तां ज़ोले, कि ज़रूर ई महान कौम अक्लमन्द ते समझ़दारे। 7 हेरा कौन एत्री महान कौमे ज़ेसेरो देबतो तैसेरे एत्रे नेड़े रहतो भोए ज़ेरो इश्शो परमेशर यहोवाए, ज़ैखन भी अस तैस पुकारतम? 8 फिरी कौन एत्री महान कौमे ज़ैस कां एरी धर्मी विधि ते नियम भोन, ज़ेरो कि ई सारो कानून ज़ैस अवं अज़ तुश्शे सामने रखताईं?

9 "इन बड़ू जादे ज़रूरीए कि तुस अपने बारे मां खबरदार राथ, ते अपने-अपने मनेरू ध्यान रखा, कोन्च एरू न भोए कि ज़ैना-ज़ैना गल्‍लां तुसेईं अपने एछ़्छ़न सेइं लेही तैन्न बिसरी गाथ, ते तैना ज़िन्दगी भरेरे लेई तुश्शे मने मरां च़ेलि गान; पन तुस तैन्न अपने मट्ठन ते पोट्लड़न शिखैलथ। 10 खास केरतां तैस दिहाड़ेरी गल्‍लां ज़ैस मां तुस होरेब पहाड़े कां अपने परमेशर यहोवारे सामने खड़े थिये, ज़ैखन यहोवा मीं सेइं ज़ोवरू थियूं, ‘तैन लोकन मीं कां अकोट्ठे केर कि अवं तैन्न अपने वचन शुनेई, ज़ैस सेइं तैना शिखन, ताके ज़ेत्रे दिहाड़े तैना धेरती पुड़ ज़ींते रान तेत्रे दिहाड़े मेरो डर मन्ते रान, ते अपने बाल-बच्‍चन भी एन्ने शिखालन।’ 11 तैखन तुस नेड़े गेइतां तैस पहाड़े करां बुन खड़े भोए, ते तैन पहाड़ अग्गी सेइं बलतू राव, ते तैसेरी लौ अम्बरे तगर पुज़ती थी, ते तैसेरे च़ेवरे पासे आंधरू ते बिदलार, ते बड़ो अंधकार भोवरो थियो। 12 तैखन यहोवाए तैस अग्गी मरां तुसन सेइं गल्‍लां की; तुसेईं ज़ोने बालेरी आवाज़ त शुनी, पन कोई शकल न लेइहोई; सिर्फ शब्दे शब्द शुनोए। 13 ते तैनी तुसन अपने करारेरे दश्शे वचन ज़ोइतां तैन केरो मन्नेरो हुक्म दित्तो; ते तैना घोड़ेरी दूई तेख्तन पुड़ लिखे। 14 ते मीं यहोवा तैस्से वक्ते तुसन विधि ते नियम शिखालनेरो हुक्म दित्तो, एल्हेरेलेइ कि ज़ैस मुल्खेरे अधिकारी भोनेरे लेई तुस पार गाने पुड़ आथ तैस मां तुस तैन मेन्नथ।

15 "एल्हेरेलेइ तुस अपने बारे मां बड़े खबरदार रेइयथ। किजोकि ज़ैखन यहोवा तुसन सेइं होरेब पहाड़े पुड़ अग्गी मरां गल्‍लां की, तैखन तुसेईं कोई शकल न लाही, 16 कोन्च एरू न भोए कि तुस बिगड़तां चाहे मड़द चाहे कौन्शरे, 17 चाहे ज़मीनी पुड़ च़लनेबाले कोन्ची जानबर, चाहे अम्बरे मां उडरने बाले कोन्ची च़ुड़ोलोवें,

18 "चाहे ज़मीनी पुड़ पेटेरे भारे च़लनेबाले कोन्ची जीपे, चाहे धेरतरे पैनी मां रानेबाली कोन्ची मेछ़लरे शक्लरी कोई मूरती घेड़तां बनाथ, 19 या ज़ैखन तुस अम्बरेरे पासे तेकतां, दिहाड़ो, चाँदनी, ते तारन, मतलब अम्बरेरे सारे तारन, तैखन टेपलोइतां तैन कां झुकतां तैन केरि सेवा केरने लगथ, ज़ैना तुश्शे परमेशर यहोवा दुनियारे बाकी लोकां केरे लेई रखोरेन। 20 पन तुस यहोवा लोंहेरे भट्ठेरे ज़ेरे* मिस्र मुल्खे मरां केढतां आनोरेथ, एल्हेरेलेइ कि तुस तैसेरे प्रजारे रूपे मां अपनो हिस्सो भोथ, ज़ेरू अज़ बांदू आहे। 21 फिरी तुश्शे वजाई सेइं यहोवा मीं सेइं सेरकोइतां ई कसम खई, ‘तू यरदनेरे पार न गेइ बटेलो, ते ज़ै रोड़ो मुल्ख इस्राएली केरे परमेशर यहोवा तैन्न, तैन केरो अपनो हिस्सो केरतां देते, तैस मां तू न गेइ सकेलो।’ 22 बल्के मीं इस्से मुल्खे मां मरनू आहे, अवं त यरदने पार न गेइ सेखी; पन तुस पार गेइतां तैस रोड़े मुल्खेरे अधिकारी भोइ गाथ। 23 एल्हेरेलेइ अपने बारे मां तुस खबरदार राथ, कोन्च एरू न भोए कि तुस तैस करारे बिसरतां, ज़ै तुश्शे परमेशर यहोवा तुसन सेइं कियोरो थियो, कोन्ची होरि चीज़री मूरती घड़ाई केरतां बनाथ, ज़ैन तुश्शे परमेशर यहोवाए तुसन ठाकेरूए। 24 किजोकि तुश्शो परमेशर यहोवा भस्म केरनेबैली अग्गरो ज़ेरोए; तै जलन रखनेबालो परमेशरे।

25 "अगर तैस मुल्खे मां रहंते-रहंते बड़े दिहाड़े बीतने पुड़, ते तुसन मट्ठां पोट्लड़ां पैदा भोने पुड़, तुस बिगड़तां कोन्ची चीज़रे शक्लरी मूरती घेड़तां बनाथ, ते इस तरीके सेइं अपने परमेशर यहोवारी हर बुराई केरतां तैस सरकाथ, 26 त अवं अज़ अम्बर ते धेरती तुश्शे खलाफ गवाह केरतां ज़ोताईं, कि ज़ैस मुल्खेरे अधिकारी भोनेरे लेई तुस यरदने पार गाने पुड़ भोथ तैस मां तुस जल्दी बिलकुल नाश भोइ गाले; ते बड़े दिहाड़े न राले, पन पूरे तरीके सेइं नाश भोइ गाले। 27 ते यहोवा तुसन मुल्ख-मुल्खेरे लोकन मां तितर-बितर केरेलो, ते ज़ैन कौमन मां यहोवा तुसन पुज़ालो तैन मां तुस थोड़े रेइ गाले। 28 ते तैड़ी तुस मैन्हु केरे बनावरे लेकड़रे ते घोड़ेरे देबतां केरि सेवा केरेले, ज़ैना न लान, ते न शुन्न, ते न खान, ते न शींघन। 29 पन तैड़ी भी अगर तुस अपने परमेशर यहोवा तोपेले, त तै तुसन मैल्ही गालो, शर्त ई आहे कि तुस अपने पूरे मने सेइं ते अपने सारे प्राणे सेइं तैस तोपथ। 30 आखरी दिहाड़न मां ज़ैखन तुस मुसीबती मां पेथ, ते इना सब आफतां तुसन पुड़ एज्जन, तैखन तुस अपने परमेशर यहोवारे पासे फिरथ ते तैसेरी गल मेन्थ; 31 किजोकि तेरो परमेशर यहोवा दया केरनेबालो परमेशरे, तै तुसन न त शारेलो ते न नाश केरेलो, ते ज़ै करार तैनी तेरे सियानन सेइं कसम खेइतां कियोरो थियो तैस न बिसरेलो।

32 "ज़ैखन करां परमेशरे मैन्हु पैदा केरतां धेरती पुड़ रखोरोए तैखन करां लेइतां तू अपने पैदा भोनेरे दिहाड़न तगरेरि गल्‍लां पुछ़, ते अम्बरेरे एक्‍की पासेरां होरि पासे तगरेरि गल्‍लां पुछ़, कुन एत्री बड्डी गल कधी भोवरी या शुन्ने मां एवरीए? 33 कुन कोई कौम कधी परमेशरेरी गल्‍लां अग्गी मरां एइती शुन्तां ज़ींती राई, ज़ेन्च़रे कि तीं शुनी? 34 फिरी कुन परमेशरे ते कोन्ची कौमी होरि कौमरे मझ़ाटेरां कढनेरे लेई कमर केस्तां अज़मैइश, ते निशान, ते चमत्कार, ते जंग, ते ज़ोरे बालो हथ, ते अग्रोवं कियोरी पाखड़ी सेइं एत्रां बड्डां डरानेबालां कम्मां कियां, ज़ेन्च़रे तुश्शे परमेशर यहोवाए मिस्रे मां तुश्शे हेरते कियां? 35 इन सब तीं हिरावं जेवं, एल्हेरेलेइ कि तू बुझ़स कि यहोवा ही परमेशरे; तैसेरे अलावा होरो कोई अथ्थी नईं। 36 अम्बरे मरां तैनी तीं अपनि आवाज़ शुनाई कि तीं शिक्षा दे; ते धेरती पुड़ तैनी तीं अपनि बड़ी अग हिराई, ते तैसेरे वचन अग्गी मरां एइते तीं शुने। 37 ते तैनी ज़ै तेरे सियानन सेइं प्यार कियो, इस वजाई सेइं तैन केरे बाद तैन केरू खानदान च़ुनू, ते साथी भोइतां तू अपने बड़े ताकतरे ज़िरिये मिस्रे मरां एल्हेरेलेइ केढतां आनो, 38 कि तीं करां बड्डी ते ताकतबर कौमन तेरे सामनेरां केढतां तीं तैन केरे मुल्खे मां पुज़ाए, ते तैस तुश्शी विरासत केरे, ज़ेरू अज़ लेइहोते; 39 एल्हेरेलेइ अज़ ज़ान, ते अपने मने मां याद भी रख, कि बह अम्बर मां ते बुन धेरती पुड़ यहोवा ही परमेशरे; ते कोई होरो नईं। 40 ते तू तैसेरी विधि ते हुक्मन ज़ैना अवं अज़ तीं शुनाताईं मेन्नां, एल्हेरेलेइ कि तेरू ते तेरे बाद तेरे खानदानेरू भी भलू भोए, ते ज़ै मुल्ख तेरो परमेशर यहोवा तीं देते तैस मां तेरे दिहाड़े बड़े बल्के हमेशारे लेई भोन।"

41 तैखन मूसे यरदनेरे पार पूर्वेरे पासे ट्लाई नगरां अलग कियां, 42 एल्हेरेलेइ कि ज़ै कोई बगैर ज़ाने ते बगैर पेइले करां बैर रख्खे कोन्ची अपने सैथी मैरी छ़डे, तै तैन मरां कोन्ची नगरे मां नश्शे, ते नेशतां ज़ींतो राए, 43 मतलब रूबेनी लोकां केरू बेसेर नगर ज़ैन सुनसान ठैरी मां समथर मुल्खे मांए, ते गादी लोकां केरू गिलादेरे रामोत, ते मनश्शेई लोकां केरू बाशानेरू गोलन।

44 फिरी ज़ै कानून मूसे इस्राएली लोकन दित्तो तै ई आहे, 45 इन्ना तैना हदायतां ते नियम आन ज़ैना मूसे इस्राएली लोकन तैस वक्ते ज़ोइतां शुनाए ज़ैखन तैना मिस्रे मरां निसते थिये, 46 मतलब यरदनेरे पार बेतपोरेरे सामनेरी वैदी मां, एमोरी केरो राज़ो हेशबोनेरे रानेबाले सीहोनेरे मुल्खे मां, ज़ै राज़ो तैनेईं मिस्रे मरां निस्सनेरां पत्ती मारो। 47 ते तैनेईं तैसेरे मुल्ख, ते बाशानेरे राज़े ओगेरो मुल्ख, अपने कब्ज़े मां केरी छ़डो; यरदनेरे पार दिहाड़ो निस्सनेरे पासे रानेबाले एमोरी केरे राज़ां केरे इना मुल्ख थिये। 48 ई मुल्ख अर्नोनेरे नालेरे पासेबाले अरोएर करां लेइतां सिय्योन पहाड़े, ज़ैस जो हेर्मोन भी ज़ोतन, 49 तैस पहाड़े तगरेरो सारो मुल्ख, ते पिसगारे ढलानेरे बुनीयें अराबारे समुन्दरे तगर, यरदने पार पूर्वे पासेरो सारो अराबा आहे।