1 "अगर तू अपने परमेशर यहोवारे सब हुक्म, ज़ैना अवं अज़ तीं शुनाताईं, ध्याने सेइं पूरू केरनेरे लेई मन लेइतां तैसेरी शुनस, त तै तीं धेरतरी सेब्भी कौमन मां उच्‍चो केरेलो। 2 फिरी अपने परमेशर यहोवारे हुक्म मन्नेरे ज़िरिये सेइं इना सब आशिर्वाद तीं पुड़ पूरे भोल्हे। 3 धन भोस तू नगरे मां, धन भोस तू उडारे मां। 4 धन भोन तेरे बच्‍चे, ते तेरे ऊडारां केरि फसल, ते बछ़ी ते भैड्डां-छ़ेल्‍ली ते जानबरां केरे बच्‍चे। 5 धन भोए तेरी टोकरी ते तेरी कुनाई। 6 धन भोस तू अन्तर एइते बार, ते धन भोस* तू बेइर गाते बार।

7 "यहोवा एरू केरेलो कि तेरे दुश्मन ज़ैना तीं पुड़ हमलो केरेले तैना तीं करां हारेले; तैना एक्‍की बत्तां तीं पुड़ हमलो केरेले, पन तेरे सामनेरां सत बत्तन मांमेइं भोइतां नश्शेले। 8 तेरे गुदामन पुड़ ते ज़ेत्रे कम्मन मां तू हथ लाएलो तैन सेब्भन पुड़ यहोवा बरकत देलो; एल्हेरेलेइ ज़ै मुल्ख तेरो परमेशर यहोवा तीं देते तैस मां तै तीं बरकत देलो। 9 अगर तू अपने परमेशर यहोवारे हुक्मन मेनतां तैसेरी बत्तन पुड़ च़लस, त तै अपने कसमरे मुताबिक तीं अपने पवित्र लोक केरतां रखेलो। 10 ते धेरतरे सब लोक एन हेरतां, कि तींजो यहोवारो ज़ोतन, तीं करां डेरि गाले। 11 ते ज़ैस मुल्खेरे बारे मां यहोवा तेरे सियानन सेइं कसम खेइतां तीं देनेरे लेई ज़ोवरू थियूं, तैस मां तै तेरे बच्‍चां केरि, ते ज़मीनरी फसलरी, ते जानबर बधेइतां तेरी भलियाई केरेलो। 12 यहोवा तेरे लेई अपने अम्बरेरे रोड़े गुदाम खोलतां तेरी धेरती पुड़ झ़ड़ी देलो, ते तेरे सारे कम्मन पुड़ बरकत देलो; ते तू बड़े कौमन ओधार देलो, पन कोन्ची करां तीं ओधार आन्नू न पेलू। 13 ते यहोवा तीं पौंछ़ड़ नईं, पन क्रोड़ी ही ठहरालो, ते तू बुन नईं, पन बाहे रालो; अगर परमेशर यहोवारे हुक्म ज़ैना अवं अज़ तीं शुनाताईं, तू तैन्न मन्ने मां मन लेइतां एतिहात केरस; 14 ते ज़ैन वचना केरो अवं अज़ तीं हुक्म देताईं तैन मरां कोन्ची करां देइने या बांए मुड़तां बखले देबतन पत्ती न गेइयां, ते न तैन केरि सेवा केरस।

15 "पन अगर तू अपने परमेशर यहोवारे हुक्मन मन्नस ते तैसेरे सारे विधन ते हुक्मन पुड़ अमल केरने मां ज़ैना अवं अज़ शुनाताईं एतिहात न केरेलो, त इना सब लानतां तीं पुड़ एज्जेली। 16 लानती भोस तू नगरे मां, लानती भोस तू उडारे मां। 17 लानती भोए तेरी टोकरी ते तेरी कुनाई। 18 लानती भोन तेरे बच्‍चे, ते ज़मीनरी फसल, ते बेछ़ी ते भैड्डां-छ़ेल्‍ली केरे बच्‍चे। 19 लानती भोस तू अन्तर एइते बार, ते लानती भोस तू बेइर गाते बार।

20 "फिरी ज़ैस-ज़ैस कम्मे मां तू हथ लास, तैस मां यहोवा तांतगर तीं लानत देतो, ते डरातो ते धमकी देतो रालो, ज़ांतगर तू मिटी न गास, ते लूशी बरबाद न भोस; इन इस वजाई भोल्हु कि तू यहोवा शैरतां बुरू कम केरेलो। 21 ते यहोवा एरू केरेलो कि मरी तीं मां फैलतां तैस वक्ते तगर लगोरी राहेली, ज़ांतगर ज़ैस धेरतरे अधिकारी भोनेरे लेई तू गेई राहोरोस तैस पुड़ेरां तेरो अन्त न भोए। 22 यहोवा तीं क्षयरोगे सेइं, ते भुखार, ते दाह, ते बड़ी जलनी सेइं, ते काल,* ते शोह, ते गेरूई सेइं मारेलो; ते इना तैस वक्ते तगर तेरो पीछो केरेले, ज़ांतगर तेरो सत्यानाश न भोइ गाए। 23 ते तेरे क्रोड़ी पुड़ अम्बर पितलरू, ते तेरे पव्वन हैठ धरती लोंहेरी ज़ेरि भोइ गाली। 24 यहोवा तेरे मुल्खे मां पैनेरे बदले रेत ते धूड़ बखालो; तै अम्बरेरां तीं पुड़ इड़ी तगर बखेली कि तेरो सत्यानाश भोइ गालो।

25 "यहोवा तीं दुश्मन्न करां हारालो; ते तू एक्‍की बत्तां तैन केरो सामनो केरने जो गालो, पन तैन केरे सामनेरां तू सत्ते बत्तन मांमेइं नेश्शी गालो; ते धेरतरी सब रियासतन मां मारो-मारो फिरेलो। 26 ते तेरी लाश अम्बरेरां किसमां-किसमेरां च़ुड़ोलू, ते धेरतरे जानबरन खाने जो खूराक भोल्ही; ते तैन्न कोई कढने बालो न भोल्हो। 27 यहोवा तीं मिस्र मुल्खेरे फोड़े, ते बवासीर, ते ढ्लाड़, ते कैणी सेइं एरहो दुखी केरेलो, कि तू ठीक न भोइ सकेलो। 28 यहोवा तीं पागल ते कानो केरि देलो, ते तेरो मन बड़ो डेरि गालो; 29 ते ज़ेन्च़रे कानो आंधरे मां तोपते तेरहो तू दीसां तोपतो फिरेलो, ते तेरू कम-काज़ कामयाब न भोल्हु; ते तू सदा सिर्फ ज़ुलम झ़ैलतो ते लुटोतो रालो, ते तेरो कोई छुटानेबालो न भोल्हो। 30 तू कौन्शी सेइं ड्लाहेरी गल लाएलो, पन होरो मड़द तैस भ्रष्ट केरेलो; घर तू बनालो, पन तैस मां न बेस्सी बटेलो; दाछ़री बाग तू लाएलो, पन तैसेरे फल न खेइ सकेलो। 31 तेरो दांत तेरी एछ़्छ़ी केरे सामने मारो गालो, ते तू तैसेरू मास खेइ न बटेलो; तेरो गधो तेरी एछ़्छ़ी केरे सामने लूटी मां च़लो गालो, ते तीं फिरी न मैल्हेलो; तेरी भैड्डां-छ़ेल्‍ली तेरे दुश्मना केरे हथ्थे लेगि गान, ते तेरे तरफां तैन केरो कोई छुटानेबालो न भोल्हो। 32 तेरां मट्ठां-कुइयां होरि मुल्खां केरे लोकां केरे गुलाम भोल्हे, ते तैन चावे सेइं तकते-तकते तेरी एछ़्छ़ी रेही गैली; ते तेरी किछ पेश न च़लेली। 33 तेरी ऊडारां केरि फसल ते तेरी सारी कमाई अक अनज़ान मुल्खेरे लोक खाले; ते सदा तू सिर्फ ज़ुलम झ़ैलतो ते पीहोतो रालो; 34 इड़ी तगर कि तू तैन गल्‍लां केरे वजाई ज़ैना तू अपनि एछ़्छ़ी सेइं लाहेले पागल भोइ गालो। 35 यहोवा तेरे ज़ैंधन ते ज़ंघन मां, बल्के बुना करां बह तगर भी बे आलाज़ फोड़े केढतां तीं दुखी केरेलो।

36 "यहोवा तीं तैस राज़े समेत, ज़ैस तू एप्पु पुड़ ठहरालो, तेरे ते तेरे सियाना केरे लेई एक्‍की बेखली कौमी मां पुज़ालो; ते तैसेरे दरमियाने मां रेइतां तू लकड़ी ते घोड़ां केरे होरे देबतां केरि सेवा ते पूज़ा केरेलो। 37 ते तैन सब कौमन मां ज़ैन केरे दरमियाने मां यहोवा तीं पुज़ालो, तैट्ठेरे लोकां केरे लेई तू हैरान भोनेरो, ते मसाल ते लानतरी वजाह समझ़ो गालो। 38 तू उडारे मां बीज़ बड़ू त नेलो, पन फसल थोड़ी ज़ेरि अकोट्ठी केरेलो; किजोकि टिट्टां तैस खालां। 39 तू दाछ़री बागां लेइतां तैन मां कम त केरेलो, पन तैन केरे दाछ़रो रस पी न बटेलो, बल्के फल भी न ट्लोड़ी बटेलो; किजोकि कीड़े तैन्न खाले। 40 तेरे सारे मुल्खे मां ज़ैतूनेरे बुट त भोल्हे, पन तैन केरो तेल तू अपने जानी पुड़ लेई न बटेलो; किजोकि तैना झ़ेड़ी गाले। 41 तेरां मट्ठां-कुइयां त भोल्हां, पन तैना तेरां न राहेलां; किजोकि तैना गुलैमी मां च़ेलि गालां। 42 तेरे सब बुट ते तेरी ज़मीनी फसल टिट्टां खालां। 43 ज़ै परदेशी तेरे दरमियाने मां रालो तै तीं करां बद्धतो गालो; ते तू एप्पु करां कमज़ोर भोतो गालो।

44 "तै तीं ओधार देलो, पन तू तैस ओधार न देइ सकेलो; तै त क्रोड़ी ते तू पौंछ़ड़ ठहरेलो। 45 तू ज़ैना अपने परमेशर यहोवारे दित्तोरे हुक्मन ते विधन मन्नेरे लेई तैसेरी न शुनेलो, इस वजाई सेइं इना सब लानतां तीं पुड़ एज्जेली, ते तीं पत्ती पेवरे रहेली, ते तीं ट्लाले, ते आखरी मां तू बरबाद भोइ गालो। 46 ते तैना तीं पुड़ ते तेरे खानदाने पुड़ हमेशारे लेई बनोरे रेइतां निशान ते चमत्कार ठहरेले;

47 "तू ज़ै सब चीज़ां हेछी भोने पुड़ भी आनन्द ते खुशी सेइं अपने परमेशर यहोवारी सेवा न केरेलो, 48 इस वजाई सेइं तीं ढ्लुखोरो, ट्लिशोरो, नग्गो, ते तीं सब चीज़न करां दूर रेइतां अपने तैन दुशमनां केरि सेवा केरनि पेली ज़ैन यहोवा तेरे खलाफ भेज़ेलो; ते ज़ांतगर तू नाश न भोइ गास तांतगर यहोवा तेरे मेट्टू पुड़ लोंहेरू जुऊं छ़डेलो। 49 यहोवा तेरे खलाफ दूरेरां, बल्के धेरतरे पासेरां तेज़ उडरने बाले उकाबेरी ज़ेरि अक कौम ज़ै च़ाढ़ेलो ज़ेसेरी बोली तू न समझ़ेलो; 50 तैस कौमरे लोकां केरो सलूख सखत भोल्हो, तैना न त बुढां केरू तुत्तर हेरतां आदर केरेले, ते न बच्‍चन पुड़ दया केरेले; 51 ते तैना तेरे जानबरां केरे बच्‍चन ते धेरतरी फसल इड़ी तगर खेइ गाले कि तू नाश भोइ गालो; ते तै तेरे लेई न अन्न, ते न नंव्वों दाछ़रो रस, ते न ताज़ो तेल, ते न बछ़ड़ां, न गबड़ां शारेलो, इड़ी तगर कि तू नाश भोइ गालो। 52 ते तै तेरे परमेशर यहोवारे दित्तोरे सारे मुल्खेरे सब फाटकन मां तीं घेरेलो; तैना तेरे सब फाटकां केरे अन्तर तीं तैस वक्ते तगर घेरेले, ज़ांतगर तेरे सारे मुल्खे मां तेरी उच्‍ची-उच्‍ची ते मज़बूत दिवारन ज़ैन पुड़ तू भरोसो केरेलो बिछ़ड़न न। 53 तैखन घिरे गाने ते तैस मुसीबतरे वक्ते ज़ैस मां तेरे दुश्मन तीं छ़डेले, तू अपने ज़र्म दित्तोरे मट्ठां कुइयां केरू मास ज़ैन तेरो परमेशर यहोवा तीं देलो खाएलो। 54 ते तीं मां ज़ै मड़द सिद्धो ते बड़ो शरीफ भोए तै भी अपने ढ्लाए, ते अपने प्राण ट्लारे, ते अपने बच़ोरे बच्‍चन तरस खेइतां न नज़र न केरेलो; 55 ते तै तैन मरां कोन्ची भी अपने बच्‍चां केरे मासे मरां ज़ै तै खालो तुसन किछ न देलो, किजोकि घिरे गानेरे ते तैस दुखे मां, ज़ैस मां तेरे दुश्मन तेरे सारे नगरन मां तीं घेरी छ़डेले, तैस कां किछ न रालू। 56 ते तीं मां ज़ै कौन्श इड़ी तगर सिद्ध ते शरीफ भोए कि शरीफ भोनेरे ते सिद्धी भोनेरे वजाई सेइं तल्‍ले पुड़ पव रखते भी डरती भोए, तै भी अपने जानी करां ट्लारे मुन्श, ते मट्ठे ते कुइये, 57 अपनो दुद्ध पीते, बल्के अपने ज़ावरे बच्‍चन बेरहम नज़री सेइं तकेली, किजोकि घिरे गाने ते तैस मुसीबतरे वक्ते ज़ैस मां तेरे दुश्मन तीं तेरे नगरन मां घेरतां रखेले, तैना सब चीज़ां केरि कमी भोनेरे वजाई सेइं तैन्न छ़ुपेइतां खाएली।

58 "अगर तू इन कानूनेरे सारे वचना केरे मुताबिक केरने मां, ज़ैना इस किताबी मां लिखोरेन, एतिहात केरतां तैस काबले इज़्ज़त ते डरेरे काबल नव्वेंरे, ज़ै यहोवा तेरे परमेशरेरो आहे डर न मन्नस, 59 त यहोवा तीं ते तेरे खानदाने भयानक-भयानक सज़ाह देलो, तै दुष्ट, ते बड़े दिहाड़े रानेबाले रोग ते भारी-भारी सज़ाह भोल्ही। 60 ते तै मिस्र मुल्खेरे तैन सब रोगन फिरी तीं पुड़ लाएलो, ज़ैन करां तू डरतो थियो; ते तैना तीं लगोरे राले। 61 ते ज़ेत्रे रोग वगेरां सज़ाह इस कानूनेरी किताबी मां नईं लिखोरे, तैन सेब्भन भी यहोवा तीं इड़ी तगर देलो, कि तेरो सत्यानाश भोइ गालो। 62 ते तू ज़ै अपने परमेशर यहोवारे हुक्म न मन्नेलो, इस वजाई सेइं अम्बरेरे तारां केरो ज़ेरो बेशुमार भोनेरे बदले तीं मां थोड़े मैन्हु रेही गाले। 63 ते ज़ेन्च़रे हुन्ना यहोवा तुश्शी भलियाई ते तरक्‍की भोने सेइं खुश भोते, तेन्च़रे तैखन तैस तुश्शो नाश बल्के सत्यानाश केरने सेइं खुश भोल्हो; ते ज़ैस धेरतरे अधिकारी भोनेरे लेई तुस गेई राहोरेथ तैस पुड़ तुस ढ्लूड़े गाले। 64 ते यहोवा तीं धेरतरे इस कूने करां लेइतां तैस कूने तगर सब मुल्खां केरे लोकन मां तितर-बितर केरेलो; ते तैड़ी रेइतां तू अपने सियाने अनज़ाने काठ ते घोड़ां केरे बखले देबतां केरि सेवा केरेलो। 65 ते तैन कौमन मां तीं कधी सुख न मैल्हेलू, ते न तेरे पव्वन ठिकानो मैल्हेलो; किजोकि तैड़ी यहोवा एरहु केरेलो कि तेरो दिले घबरालो, ते तेरी एछ़्छ़ी धुंधली पेई गाली, ते तेरो मन परेशान रालो; 66 ते तीं ज़िन्दगरी रोज़ शक भोल्ही; ते तू रात-दिहाड़ी थरकतो रालो, ते तेरी ज़िन्दगरो कोई भरोसो न रालो। 67 तेरे मने मां ज़ै डर टिकोरो रालो, ते तेरी एछ़्छ़न ज़ैन किछ लेइहोतू रालू, तैसेरे वजाई सेइं तू झ़ेझ़ां ओशा छ़ेडतां ज़ोलो, ‘ड्लोझ़ कैखन भोल्ही!’ ते ड्लवझ़ी ओशा छ़ेडतां ज़ोलो, ‘झ़ेझ़ कैखन भोल्ही!’ 68 ते यहोवा तीं किश्तन पुड़ च़ेढ़तां मिस्र मुल्खे मां तैस बत्ती मरां वापस आनेलो, ज़ेसेरे बारे मां मीं तीं सेइं ज़ोवरू थियूं, कि तै फिरी तेरे हेरने मां न एज्जेलो; ते तैड़ी तुस अपने दुश्मना केरे हथ्थे गुलाम मड़द कौन्श भोनेरे लेई बिकनेरे लेई त भोल्हे, पन तुश्शो कोई गाक न भोल्हो।"