इस्राएली लोकन वापस एजनेरो वचन
1 "फिरी ज़ैखन बरकत ते लानतरी इना सब गल्लां ज़ैना मीं तीं शुनेई तैना तीं पुड़ बीतन, ते तू तैन सब कौमां केरे दरमियाने मां रेइतां, ज़ैड़ी तेरो परमेशर यहोवा तीं पुज़ालो, इन गल्लन याद केरां, 2 ते अपने औलादी सने अपने सारे मने ते सारे प्राणे सेइं अपने परमेशर यहोवारे पासे फिरतां तैस कां वापस एज्जन, ते इन सब हुक्मां केरे मुताबिक ज़ैना अवं अज़ तीं शुनाताईं तैसेरी गल्लां मन्नस; 3 तैखन तेरो परमेशर यहोवा तीं गुलैमी मरां वापस आनेलो, ते तीं पुड़ दया केरतां तैन सब मुल्खां केरे लोकन मरां ज़ैन केरे दरमियाने मां तै तीं तितर-बितर केरतां फिरी अकोट्ठे केरेलो। 4 चाहे तेरे लोक धेरतरे कुने तगर छ़िंकोरे कि न भोन, तांभी तेरो परमेशर यहोवा तीं तैट्ठां एन्हतां अकोट्ठे केरेलो। 5 ते तेरो परमेशर यहोवा तीं तैस्से मुल्खे मां पुज़ालो ज़ेसेरे तेरे सियाने अधिकारी भोवरे थिये, ते तू फिरी तैसेरो अधिकारी भोल्हो; ते तै तेरी भलियाई केरेलो, ते तीं तेरे सियानन करां भी गिनती मां जादे बधालो। 6 ते तेरो परमेशर यहोवा तेरे ते तेरे खानदानेरे दिलेरो खतनो केरेलो, कि तू अपने परमेशर यहोवा सेइं अपने सारे मने ते सारे प्राणे सेइं प्यार केरस, ज़ैस सेइं तू ज़ींतो रास। 7 ते तेरो परमेशर यहोवा इन सब लानतरी गल्लां तेरे दुश्मन्न पुड़ भेज़ेलो ज़ैना तीं सेइं बैर केरतां तीं पत्ती पेले। 8 ते तू फिरेलो ते यहोवारी शुनेलो, ते इन सब हुक्मन मन्नेलो ज़ैना अवं अज़ तीं शुनाताईं। 9 ते यहोवा तेरे भलेरे लेई तेरे सब कम्मन मां, ते तेरे बच्चन, ते जानबरां केरे बच्चन, ते ज़मीनरी फसली बधालो; किजोकि यहोवा फिरी तीं पुड़ भलियाइरे केरनेरे लेई तेरहो आनन्द केरेलो, ज़ेरो तैनी तेरे सियानन पुड़ कियोरो थियो; 10 किजोकि तू अपने परमेशर यहोवारी शुन्तां तैसेरे हुक्मन ते विधन पुड़ ज़ैना इस कानूनेरी किताबी मां लिखोरेन मन्ते रान, ते अपने परमेशर यहोवारे पासे अपने सारे मने ते सारे प्राणे सेइं मन फिरान।
ज़िन्दगी या मौत
11 "हेरा, इना ज़ैना हुक्म अवं अज़ तीं शुनाताईं, तै न त तेरे लेई मुश्किले, ते न दूरन। 12 ते न त ई अम्बरे मां आहे, कि तू ज़ोस, ‘कौन इश्शे लेई सुर्गे पुड़ च़ेढ़तां तैस असन कां आने, ते असन शुनाए कि अस तैस मन्नम?’ 13 ते न ई समुन्दरे पारे, कि तू ज़ोस, ‘कौन इश्शे लेई समुन्दरे पार गाए, ते तैस असन कां आने, ते असन शुनाए कि अस तैस मन्नम?’ 14 पन इन वचन तेरे बड़े नेड़े, बल्के तेरे ऐशी ते मने मांए ताके तू इस पुड़ अमल केरतां च़लस।
15 "शुन, अज़ मीं तीं ज़िन्दगी ते मौत, नुकसान ते फैइदो हिरावरोए। 16 किजोकि अवं अज़ तीं हुक्म देताईं, कि अपने परमेशर यहोवाए सेइं प्यार केरनो, ते तैसेरे बत्तन पुड़ च़लनू, ते तैसेरे हुक्मन, विधन, ते नियमन मन्ने, ज़ैस सेइं तू ज़ींतो रास, ते बद्धतो गास, ते तेरो परमेशर यहोवा तैस मुल्खे मां तीं बरकत दे, ज़ेसेरो अधिकारी भोनेरे लेई तू गेई राहोरोस। 17 पन अगर तेरो मन भेटकी गाए, ते तू यहोवारी शुन्ने करां इन्कार केरस, ते भेटकतां बखले देबतन कां झुकतां तैन केरि सेवा केरने लग्गस, 18 त अवं तुसन अज़ ई खबरदारी देताईं कि इस मां कोई शक नईं सच़्च़े तुस नाश भोइ गाले; ते ज़ैस मुल्खेरे अधिकारी भोनेरे लेई तू यरदने पार गेइ राहोरोस, तैस मुल्खे मां तुस बड़े दिहाड़न तगर रेही बटेले। 19 अवं अज़ अम्बर ते धरती दूईयने तुश्शे सामने इस गल्लरे गवाह बनाताई, कि मीं ज़िन्दगी ते मौत, बरकत ते लानत तुश्शे सामने रख्खोरीए; एल्हेरेलेइ तू ज़िन्दगी अपनि बना, कि तू ते तेरू खानदान दूईये ज़ींते रान; 20 एल्हेरेलेइ अपने परमेशर यहोवा सेइं प्यार केरा, ते तैसेरी गल मन्ना, ते तैस सेइं पलैटोरे राथ; किजोकि तेरी ज़िन्दगरी लम्मी उमर ईए आहे, ते एरहु केरने सेइं ज़ै मुल्ख देनेरी कसम यहोवाए अब्राहम, इसहाक, ते याकूब, मतलब तेरे सियानन सेइं कियोरी थी तैस मुल्खे मां तू बस्सोरो रालो।"