1 फिरी इस्राएलेरे बुज़ुर्ग लोकन समेत मूसे आवामरे लोकन ई हुक्म दित्तो, "ज़ेत्रे हुक्म अवं अज़ तुसन शुनाताईं तैना सब मन्ना। 2 ते ज़ैखन तुस यरदन दरियाए पार भोइतां तैस मुल्खे मां पुज़थ, ज़ै तेरो परमेशर यहोवा तीं देते, तैखन बड्डे-बड्डे घोड़ खड़े केरने, ते तैन पुड़ चुन्नो लानो; 3 ते पार भोनेरां पत्ती तैन पुड़ इस कानूनेरे सारे वचन लिखने, एल्हेरेलेइ कि ज़ै मुल्ख तेरे सियाना केरो परमेशर यहोवा अपने वचनेरे मुताबिक तीं देते, ते ज़ैस मां दुद्ध ते मैछ़ेरी गड्डां* बेगतिन, तैस मुल्खे मां तू गेई सकस। 4 फिरी ज़ैन घोड़ां केरे बारे मां मीं अज़ हुक्म दित्तोरोए, तैन तुस यरदनेरे पार भोइतां एबाल पहाड़े पुड़ खड़ो केरथ, ते तैन पुड़ चुन्नो लेइयथ। 5 ते तैट्ठी अपने परमेशर यहोवारे लेई घोड़ां केरि अक वेदी बनेइयथ, तैन पुड़ कोई संदर न लेइयथ। 6 अपने परमेशर यहोवारी वेदी बगैर संदर लेवरे घोड़ां केरि बनेइतां तैस पुड़ तैसेरे लेई होमबलि च़ाढ़नी; 7 ते तैड़ी मेलबलि भी च़ैढ़तां रोट्टी खानी, ते अपने परमेशर यहोवारे सामने आनन्द केरनो। 8 ते तैन घोड़न पुड़ इस कानूनेरे सब वचन साफ तरीके सेइं लिखने।"

9 फिरी मूसे ते लेवी याजकेईं सारे इस्राएली लोकन सेइं इन भी ज़ोवं, "इस्राएली लोकव, च़ुप रेइतां शुना! अज़्ज़ेरे दिहाड़े तुस अपने परमेशर यहोवारी कौम भोए। 10 एल्हेरेलेइ अपने परमेशर यहोवारी गल मन्नी, ते तैसेरो ज़ै-ज़ै हुक्म ते विधि अवं अज़ तुसन शुनाताईं तैन केरे मुताबिक केरनू।"

11 फिरी तैस्से दिहाड़े मूसे कौमरे लोकन जो ई हुक्म दित्तो, 12 "ज़ैखन तुस यरदन दरियाए पार भोइ गाथ तैखन शिमोन, लेवी, यहूदा, इस्साकार, यूसुफ, ते बिन्यामीन, इना गिरिज्जीम पहाड़े पुड़ खड़े भोइतां आशिर्वाद शुनान। 13 ते रूबेन, गाद, आशेर, जबूलून, दान, ते नप्ताली, इना एबाल पहाड़े पुड़ खड़े भोइतां लानत शुनान। 14 तैखन लेवी लोक सब इस्राएली मड़दन सेइं ज़ोरे सेइं ज़ोन:

15 "लानती भोए तै मैन्हु ज़ै कोई मूरती कारीगिरे करां घड़ेइतां या बनेइतां छ़ेपोरी ठारी मां आबाद केरे, किजोकि इस सेइं यहोवा नफरत केरते।" तैखन सब लोक ज़ोन, "आमीन।"

16 "लानती भोए तै ज़ै अपने बाजी या अम्मा घटिया समझ़े।" तैखन सब लोक ज़ोन, "आमीन।"

17 "लानती भोए तै ज़ै कोन्ची होरेरी हद या नन्द हटाए।" तैखन सब लोक ज़ोन, "आमीन।"

18 "लानती भोए तै ज़ै काने बत्ती मरां टपलाए।" तैखन सब लोक ज़ोन, "आमीन।"

19 "लानती भोए तै ज़ै परदेशी, अनाथ, या विधवा कौन्शरो न्याय बिगाड़े।" तैखन सब लोक ज़ोन, "आमीन।"

20 "लानती भोए तै ज़ै अपनि सोवक अम्मा* सेइं कुकर्म केरे, किजोकि इस सेइं तैसेरे बाजी केरि बदनामी भोतीए।" तैखन सब लोक ज़ोन, "आमीन।"

21 "लानती भोए तै ज़ै कोन्ची किसमेरे जानबरे सेइं कुकर्म केरे।" तैखन सब लोक ज़ोन, "आमीन।"

22 "लानती भोए तै ज़ै अपनि बेइन, चाहे सकी भोए चाहे, बेबानी, तैस सेइं कुकर्म केरे।" तैखन सब लोक ज़ोन, "आमीन।"

23 "लानती भोए तै ज़ै अपनि शिखी सेइं कुकर्म केरे।" तैखन सब लोक ज़ोन, "आमीन।"

24 "लानती भोए तै ज़ै कोन्ची छ़ेपतां मारे।" तैखन सब लोक ज़ोन, "आमीन।"

25 "लानती भोए तै ज़ै बेकसूर मैन्हु मारनेरे लेई रिश्पत ने।" तैखन सब लोक ज़ोन, "आमीन।"

26 "लानती भोए तै ज़ै इन कानूनेरे वचन्न मेनतां पूरू न केरे।" तैखन सब लोक ज़ोन, "आमीन।"