1 "लेवी याजकां, बल्के सारे लेवी गोट्लां केरो, इस्राएली लोकन सेइं साथी कोई हिस्सो या अंश न भोए; तैन केरे खानेरे लेई तैना चीज़ां भोल्ही ज़ैना लोक च़ाढ़तन ते यहोवारो दित्तोरो हिस्सो भोल्हो। 2 तैन केरो अपने ढ्लां केरे दरमियाने मां कोई हिस्सो न भोल्हो; किजोकि अपने वचनेरे मुताबिक यहोवा तैन केरो अपनो हिस्सो ठहरोरोए। 3 ते चाहे बेछ़ी-दांत चाहे भैड्डां-छ़ेल्‍ली केरि मेलबलि भोन, तैसेरे केरनेबाले लोकां केरे तरफां याजकां केरू हक इन भोल्हु, कि तैना तैसेरे कंधे ते दूइयेईं खैखोड़ी ते पेट याजके देन। 4 तू तैस अपनि पेइली फसलरू अन्न, नंव्वों दाछ़रो रस, ते ताज़ो तेल, ते एपनी भैड्डां केरि तैना उन्ना देइयां ज़ैना पेइली बार केटोरी भोन। 5 किजोकि तेरे परमेशर यहोवाए तेरे सब गोट्लन मरां तैए च़ुनोरोए, कि तै ते तैसेरू खानदान हमेशा तैसेरे नंव्वेरी सेवा केरनेरे लेई हज़ार भोइ गान।

6 "फिरी कोई लेवी मैन्हु इस्राएली केरे बेस्तन मरां कोन्ची सेइं, ज़ैड़ी तै परदेशी केरो ज़ेरो रहतो भोए, अपने मनेरे बड़े इच्छाई सेइं तैस ठारी पुड़ गाए ज़ैस यहोवा च़ुनेलो, 7 त अपने सब लेवी ढ्लां केरो ज़ेरो, ज़ैना तैड़ी अपने परमेशर यहोवारे सामने हज़ार भोल्हे, तै भी तैसेरे नंव्वें सेइं सेवा केरे। 8 ते अपने सियांनां केरो हिस्सो कीमतरे अलावा तैस रोट्टरो हिस्सो भी तैन केरो ज़ेरो मैल्हे।

9 "ज़ैखन तू तैस मुल्खे मां पुज़स ज़ै तेरो परमेशर यहोवा तीं देते, तैखन तैट्ठेरे कौमां केरू ज़ेरू भिट्टू कम केरनू न शिख्खा। 10 तीं मां कोई एरहो न भोए ज़ै अपने बच्‍चन अपने वेदी केरे अग्गी मां भस्म केरतां च़ाढ़ने बालो, या एजने बाले वक्तेरे बारे मां ज़ोने बालो, या शुभ-अशुभ वक्तां केरो मन्नेबाले, या जैदू, या मन्ट्लां ज़ान्ने बालो, 11 या बाजीगर, या जैदू टूनो केरनेबालन करां पुछ़ने बाले, या भूत साधने बालो, या भूतां केरो बींझ़ांने बालो भोए। 12 किजोकि ज़ेत्रे एरां-एरां कम्मां केरतन तैना सब यहोवारे सामने अशुद्ध आन; ते इन्ने भिट्टां कम्मां केरे वजाई सेइं तेरो परमेशर यहोवा तैन्न तेरे सामनेरां कढने पुड़े। 13 तू अपने परमेशर यहोवारे सामने बेकसूर बनोरो रेइयां।

14 "तैना कौमां ज़ैन केरो अधिकारी तू भोनेबालो आस तैना लोक शुभ-अशुभ वक्तां केरे मन्ने बालन ते एजने बाले वक्तेरी गल्‍लां ज़ोने बालां केरि शुन्ने बालेन; पन तीं तेरे परमेशर यहोवाए एरू केरने नईं दित्तेरू। 15 तेरो परमेशर यहोवा तेरे दरमियाने मरां, मतलब तेरे ढ्लान मरां मेरो ज़ेरो अक नबी पैदा केरेलो; तू तैसेरी शुना, 16 इन तेरी तैस बिनतरे मुताबिक भोल्हु, ज़ै तीं होरेब पहाड़े कां सभारे दिहाड़े अपने परमेशर यहोवाए कां कियोरी थी, ‘मीं, न त अपने परमेशर यहोवारो शब्द फिरी शुन्नो पे, ते न तै बड़ी अग फिरी हेरनी पे, कोन्च एरू न भोए कि अवं मेरि गेई।’ 17 तैखन यहोवाए मीं सेइं ज़ोवं, ‘तैना ज़ैन किछ ज़ोतन ठीक ज़ोतन। 18 एल्हेरेलेइ अवं तैन केरे लेई तैन केरे ढ्लान मरां तेरो ज़ेरो अक नबी पैदा केरेलो; ते अपनु वचन तैसेरे ऐशी मां छ़डेलो; ते ज़ैस-ज़ैस गल्‍लरो अवं तैस हुक्म देइलो तैए तैन्न शुनालो। 19 ते ज़ै मैन्हु मेरू तैन वचन ज़ै तै मेरे नंव्वें सेइं ज़ोलो कबूल न केरेलो, त अवं तैसेरो हिसाब तैस करां घिन्नेलो। 20 पन ज़ै नबी घमण्ड केरतां मेरे नंव्वें सेइं कोई एरू वचन ज़ोए ज़ेसेरो हुक्म मीं तैस नईं दित्तोरो, या बखले देबतां केरे नंव्वें सेइं किछ ज़ोए, तै नबी मारो गालो।’ 21 ते अगर तू अपने मने मां ज़ोस, ‘ज़ैन वचन यहोवा नईं ज़ोवरू तैस अस कोस तरीके सेइं पिशानम?’ 22 त पिशान ई आहे कि ज़ैखन कोई नबी यहोवारे नंव्वें सेइं किछ ज़ोए; तैखन अगर तैस वचनेरे मुताबिक न भोए ते तैन पूरू न भोए, त तैन वचन यहोवा नईं ज़ोवरू; पन तैनी नेबे तै गल घमण्ड केरतां ज़ोवरीए, तू तैस करां न डेरां।