1 ते मूसे गेइतां इना गल्‍लां सब इस्राएली लोकन शुनेईं। 2 ते तैनी तैन सेइं इन भी ज़ोवं, "अज़ मेरी उमर 120 साल भोवरीए; ते हुन्ना अवं च़ेलि फिरी न सेखी; किजोकि यहोवा मीं सेइं ज़ोवरूए, कि तू इस यरदने पार न गेई बटेलो। 3 तीं करां अग्री पार गानेबालो तेरो परमेशर यहोवा ही आहे; तै तैन कौमन मां ज़ैना तेरे सामनेरां बरबाद केरेलो, ते तू तैन केरे मुल्खेरो अधिकारी भोल्हो; ते यहोवारे वचनेरे मुताबिक यहोशू तीं अग्री-अग्री पार गालो। 4 ते ज़ैस तरीके सेइं यहोवाए एमोरी लोकां केरो राज़ो सीहोन ते ओग ते तैन केरे मुल्ख नाश किये, तेन्च़रे तै तैन सेब्भी कौमन सेइं भी एरहु केरेलो। 5 ते ज़ैखन यहोवा तैन्न तुसन करां हारालो, तैखन तुस तैन सारे हुक्मां केरे मुताबिक तैन सेइं केरथ ज़ैना मीं तुसन शुनेवरेन। 6 तू हिम्मत केर ते मज़बूत भो, तैन करां न डर ते न घबरा; किजोकि तीं साथी च़लनेबालो तेरो परमेशर यहोवा आहे; तै तीं धोखो न देलो ते न शारेलो।"

7 तैखन मूसे यहोशू कुजेइतां सब इस्राएली लोकां केरे सामने तैस सेइं ज़ोवं, "तू हिम्मत केर ते मज़बूत भोइ गा; किजोकि इन लोकन सेइं साथी तैस मुल्खे मां तू गालो ज़ैस यहोवाए इन केरे दादे पड़दन सेइं कसम खेइतां देनेरे लेई ज़ोवरू थियूं; ते तू इन्न तैसेरो अधिकारी केरेलो। 8 ते तीं अग्री-अग्री च़लनेबालो यहोवा आहे; तै तीं साथी रालो, ते न तीं धोखो देलो ते न शारेलो; एल्हेरेलेइ डर न ते बेदिल न भोए।"

9 फिरी मूसे ईए कानून लिखतां लेवी याजकन, ज़ैना यहोवारे करारेरो सन्दूख छ़ूनेबाले थिये, ते इस्राएलेरे सब बुज़ुर्गन सौंफी दित्ते। 10 तैखन मूसे तैन्न हुक्म दित्तो, "सत-सत सालां केरे बीतने पुड़, मतलब छुटकारेरे साले मां झोफड़ी बाले तिहारे पुड़, 11 ज़ैखन सब इस्राएली तेरे परमेशर यहोवा तैस ठारी पुड़ ज़ैस तै च़ुनेलो अकोट्ठे भोन, तैखन ई कानून सब इस्राएली लोकन पेढ़तां शुनानो। 12 कुन मड़द, कुन कौन्शां, कुन निक्‍के बच्‍चे, कुन तुश्शे नगरन मां परदेशी, सब लोक अकोट्ठे केरने कि तैना शुन्तां शिखन, ते तुश्शे परमेशर यहोवारो डर मेनतां, इस कानूनेरे सारे वचन पुड़ अमल केरने मां एतिहात केरन, 13 ते तैन केरे बच्‍चे ज़ैनेईं इना गल्‍लां नईं शुनोरी तैना भी शुन्तां शिखन, कि तुश्शे परमेशर यहोवारो डर तैस वक्ते तगर मन्ते रान, ज़ांतगर तुस तैस मुल्खे मां ज़ींते राथ ज़ेसेरे अधिकारी भोनेरे लेई तुस यरदन पार गेई राहोरेथ।"

14 फिरी यहोवा परमेशरे मूसा सेइं ज़ोवं, "तेरे मरनेरे दिहाड़े नेड़े आन; तू यहोशू कुजा, ते तुस दूईये मिलापे बाले तेम्बु मां एइतां हज़ार भोथ कि अवं तैस हुक्म देईं।" तैखन मूसा ते यहोशू गेइतां मिलापे बाले तेम्बु मां हज़ार भोए। 15 तैखन यहोवा तैस तेम्बु मां बिदलारारे खम्भे मां भोइतां दर्शन दित्तू; ते बिदलारारो खम्भो तेम्बेरे दारे पुड़ ठहरी जेव।

16 तैखन यहोवा परमेशरे मूसे सेइं ज़ोवं, "ज़ेन्च़रे तेरे पूर्वज मरे तेन्च़रे तू भी मरने बालोस; ते इना लोक उठतां तैस मुल्खेरे बखले देबतन पत्ती ज़ैन केरे दरमियाने मां तैना गेइतां राले व्यभिचार केरनेबाले भोइ गाले, ते मीं शैरतां तैस करारे ट्लोड़ेले ज़ै मीं तैन सेइं कियोरो थियो। 17 तैस वक्ते मेरो कोप इन पुड़ भड़केलो, ते अवं भी इन्न शैरतां इन करां अपनु तुत्तर छ़ुपालो, ते इना शिकार भोइ गाले; ते बेड़ि आफतां ते क्लेश इन पुड़ एज्जेले, इड़ी तगर कि इना तैस वक्ते ज़ोले, ‘कुन इना आफतां असन पुड़ इस वजाई त न एई, किजोकि इश्शो परमेशर इश्शे दरमियाने मां न राव?’ 18 तैस वक्ते अवं तैन सब बुरैई केरे वजाई सेइं ज़ैना इना बखले देबतां केरे पासे फिरतां केरेले पक्‍कू तैन करां अपनु तुत्तर छ़ुपालो। 19 एल्हेरेलेइ हुनी तुस इन गीत लिखा, ते तू इन इस्राएली लोकन शिखैलतां याद करा, एल्हेरेलेइ कि इन गीत तैन केरे खलाफ मेरी गवाही भोए। 20 ज़ैखन अवं इन्न तैस मुल्खे मां पुज़ेइलो ज़ैस देनेरी मीं एन केरे दादे पड़दन सेइं कसम कियोरी थी, ते ज़ैस मां दुद्ध ते मैछ़ेरी गड्डां* बेगतिन, ते खाते-खाते इन केरू पेट भेरोई गाए, ते इना हट्टे-कट्टे भोइ गाले; तैखन इना बखले देबतां केरे पासे फिरतां तैन केरि सेवा केरने लग्गेले, ते मेरी अनादर केरतां मेरे करारे ट्लोड़ेले। 21 बल्के हुन्ना भी ज़ैखन अवं इन्न तैस मुल्खे मां ज़ेसेरे बारे मीं कसम खेवरीए पुज़ेवरे नईं, मीं पतोए, कि इना कुन-कुन सोचने लगोरेन; एल्हेरेलेइ ज़ैखन बड़े जादे आफतां ते क्लेश इन पुड़ एज्जेले, तैखन इन गीत इन पुड़ गवाही देलू, किजोकि इन केरि औलाद इस कधी भी न बिसरेली।" 22 तैखन मूसे तैस्से दिहाड़े इन गीत लिखतां इस्राएली लोकन शिखालू।

23 ते यहोवाए नूनेरे मट्ठे यहोशू ई हुक्म दित्तो, "हिम्मत केर ते मज़बूत भोए; किजोकि इस्राएली लोकन तैस मुल्खे मां तू पुज़ालो ज़ै तैन्न देनेरी मीं तैन सेइं कसम खेवरीए; ते अवं एप्पु तीं साथी रेइलो।"

24 ज़ैखन मूसे इस कानूनेरे वचन शुरू करां आखरी तगर किताबी मां लिखे, 25 तैखन तैनी यहोवारो सन्दूख छ़ूनेबाले लेवी लोकन हुक्म दित्तो, 26 "कानूनेरे इस किताबी नेइतां अपने परमेशर यहोवारे करारेरो सन्दूखे कां रख, कि ई तैड़ी तीं पुड़ गवाही देती राए। 27 किजोकि तेरी बगावत ते जिद मीं पतोए; हेरा मेरे ज़ींते ते साथी रहते भी तुस यहोवाए सेइं बगावत केरते राए; फिरी मेरे मरनेरां पत्ती भी किजो न केरेले! 28 तुस अपने गोट्लां केरे सब बुज़ुर्गन ते अपने प्रधान्न मीं कां अकोट्ठे केरा, कि अवं तैन्न इना वचन शुनेइतां तैन केरे खलाफ अम्बर ते धरती दूईयने गवाह बनेइलो। 29 किजोकि मीं पतोए कि मेरे मरनेरां बाद तुस बिलकुल बिगड़ी गाले, ते ज़ैस बत्ती पुड़ च़लनेरो हुक्म मीं तुसन शुनाव तैस भी तुस शारेले; ते आखरी दिहाड़न मां ज़ैखन तुस तैन कम केरतां ज़ैन यहोवारी नज़री मां बुरू आहे, अपनि बनेवरी चीज़ां केरि पूज़ा केरतां तैस क्रोधे कराले, तैखन तुसन पुड़ आफत एज्जेली।"

30 तैखन मूसे इस्राएली लोकां केरि सारी सभाई इस गीतेरे वचन शुरू करां आखरी तगर ज़ोइतां शुनाए।