व्यवस्थाविवरण 13

झूठे नबी

1 "अगर तेरे दरमियाने मां कोई नबी या सुपनु हेरने बालो बांदो भोइतां तीं कोई निशान या चमत्कार हिराए, 2 ते ज़ै निशान या चमत्कारे सबूत ठहरेइतां तै तीं सेइं ज़ोए, ‘एज्जा अस बखले देबतन पत्ती गेइतां तैन केरि पूज़ा केरम, ज़ैन करां तुस हुन्ना तगर अनज़ान राए,’ 3 तैखन तुस तैस नेबी या सुपनु हेरने बालेरे वचन पुड़ कधी ध्यान न देइयथ; किजोकि तुश्शो परमेशर यहोवा तुश्शी अज़मैइश केरनेरे लेई तैस इस्तेमाल केरेलो, ज़ैस सेइं ई पतो लग्गे, कि इनां मीं सेइं अपने सारे मन ते सारे प्राणे सेइं प्यार केरतन या नईं? 4 तुस अपने परमेशर यहोवाए पत्ती च़ेलथ, ते तैसेरो डर मेन्नथ, ते तैसेरे हुक्मन पुड़ च़ेलथ, ते तैसेरू वचन मेन्नथ, ते तैसेरी सेवा केरथ, ते तैस सेइं लिपटोरे रेइयथ। 5 ते एरहो नबी या सुपनु हेरने बालो ज़ै तुसन तुश्शे परमेशर यहोवा करां दूर केरे, ज़ैनी तुस मिस्र मुल्खे मरां कढोरेथ ते गुलैमरे घरे मरां छुटेवरेथ, तेरी तैस्से परमेशर यहोवारे बत्ती करां टपलानेरी गल ज़ोने बालो ठहरेलो, इस वजाई सेइं तै मारो गालो। इस तरीके सेइं तू अपने दरमियाने मरां एरी बुराई दूर केरि छ़ेडां।

6 "अगर तेरो सक्‍को ढ्ला, या मट्ठू, या कुई, या तेरी कौन्श, या जानरो ट्लारो तेरो कोई दोस्त शिखैलतां इन ज़ोइतां टपलाए, ‘एज्जा अस होरि देबतां केरि सेवा या पूज़ा केरम,’ ज़ैन न त तू न तेरे सियाने ज़ानते थिये, 7 चाहे तैना तुश्शे नेड़े रानेबाले आसे-पासेरे लोकां केरे, चाहे धेरतरे एक्‍की कूने करां लेइतां होरि कूने तगर दूर-दूरेरे रानेबालां केरे देबते भोन, 8 त तुस तैसेरी न मेन्नथ, ते न त तैसेरी गल शुनथ, ते न तैस पुड़ तरस खेइयथ, ते न नरमी हिरेइयथ, ते न तैस छ़ुपेइयथ; 9 तैस ज़रूर मैरथ; तैस मारने मां पेइले तेरो हथ उट्ठे, तैसेरे बाद सब लोकां केरे हथ खड़े भोन। 10 तैस पुड़ एरी घोड़ेईं बाथ कि तै मेरि गाए, किजोकि तैनी तू तेरे तैस परमेशर यहोवा करां टपलानेरी कोशिश कियोरीए, ज़ैने तू गुलैमरे घरे मतलब मिस्र मुल्खे मरां केढतां आनोरोस। 11 ते सब इस्राएली शुन्तां डरेले, ते एरू बुरू कम फिरी तेरे दरमियाने मां न केरेले।

12 "अगर तेरे कोन्ची नगरेरे बारे मां, ज़ैस तेरो परमेशर यहोवा तीं रानेरे लेई देते, एरी गल तेरे शुन्ने मां एज्जे, 13 कि किछ अधर्मी मड़देइं तेरे दरमियाने मरां निस्तां अपने नगरेरे रानेबालन इन ज़ोइतां टपलावरेन, ‘एज्जा अस होरि देबतां केरि सेवा केरम ज़ैन करां हुन्ना तगर अनज़ान राहोरेम,’ 14 त पुछ़ गण केरथ, ते तोप्पने, ते रोड़ेच़ारे पतो लेइयथ; ते अगर ई गल सच़ भोए, ते किछ भी शक न राए कि तेरे दरमियाने मां एरू भिट्टू कम कियूं गाते, 15 त ज़रूर तैस नगरेरे रानेबालन तलवारी सेइं मैरी छ़ेडथ, ते जानबर वगेरा तैना सब ज़ैन तैस मां भोए तैस तलवार सेइं सत्यानाश केरथ। 16 ते तैस मरां सारी लूट चौवकेरे मझ़ाटे अकोट्ठी केरतां तैस नगरे लूटी सने अपने परमेशर यहोवारे लेई मन्ना तिनको-तिनको होम केरतां फुक्‍कथ; ते तैन हमेशारे लेई उज़ड़ोरू राए, तैन फिरी बस्सवं न गाए। 17 ते कोई सत्यानाशेरि चीज़ तेरे हथ्थे न एज्जे; ज़ैस सेइं यहोवा अपने भड़कोरे कोपे करां च़ुप भोइतां ज़ेरि तैनी तेरे सियानन सेइं कसम खेवरी थी तेरही तीं सेइं दया केरतां सलूख केरे, ते महरबानी केरतां तीं गिनती मां बधाए। 18 इन तैखन भोल्हु ज़ैखन तू अपने परमेशर यहोवारे ज़ेत्रे हुक्म अवं अज़ तीं शुनाताईं तैन सेब्भन मन्नेलो, ते ज़ैन तेरे परमेशर यहोवारे नज़री मां ठीक तैन्ने केरेलो।