व्यवस्थाविवरण 20

जंगी मां गानेरो कानून

1 "ज़ैखन तू अपने दुश्मन्न सेइं जंग केरने जो गास, ते घोड़े, रथ, ते एप्पु करां जादे सेना लास, तैखन तैन करां न डेरां; तेरो परमेशर यहोवा ज़ैनी तू मिस्र मुल्खे मरां केढतां आनोरोस तै तीं सेइं साथीए। 2 ते ज़ैखन तुस जंग केरने लेई दुशमनां केरे नेड़े गाथ, तैखन याजक सेनारे नेड़े एइतां ज़ोए, 3 ‘हे इस्राएली लोकव शुना, अज़ तुस अपने दुश्मन्न सेइं जंग केरने जो नेड़े एवरेथ; तुस बेदिल न भोइयथ; तुस न डेरथ, ते न तुसन थर्क लग्गे, ते न तैन केरां सामने घबरेइयथ; 4 किजोकि तुश्शो परमेशर यहोवा तुश्शे दुश्मन्न सेइं जंग केरने लेई ते तुसन बच़ानेरे लेई तुसन सेइं साथी-साथी च़लते।’ 5 फिरी प्रधान सिपेहिन सेइं इन ज़ोए, ‘तुसन मरां कौने ज़ैनी नंव्वू घर बनेवरूए भोए ते तैसेरू समर्पण न भोए कियोरू? त तै अपने घरे जो वापस गाए, कोन्च एरू न भोए कि तै जंगी मां मेरि गाए ते होरो मैन्हु तैसेरू समर्पण केरे। 6 ते कौने ज़ैनी दाछ़री बाग लेवरी भोए, पन तैसेरे फल न भोए खेवरो? तै भी अपने घरे जो वापस गाए, एरू न भोए कि तै जंगी मां मारो गाए, ते होरो मैन्हु तैसेरो फल खाए। 7 फिरी कौने ज़ैनी कोन्ची कौन्शां सेइं ड्लाहेरी गल कियोरी भोए, पन तै ड्लाह बनेइतां न आनोरी भोए? तै भी अपने घरे जो वापस गाए, एरू न भोए कि तै जंगी मां मारो गाए, ते होरो मैन्हु तैस सेइं ड्लाह बनाए।’ 8 इसेरे अलावा प्रधान सिपेहिन सेइं इन भी ज़ोए, ‘कौन-कौन मैन्हु आहे ज़ै डरपोक ते कम दिल भोए, तै भी अपने घरे जो वापस गाए, एरू न भोए कि तैस हेरतां तैसेरे ढ्लां केरि भी हिम्मत ट्लुटी गाए।’ 9 ते ज़ैखन प्रधान सिपेहिन सेइं इन ज़ोई छ़डन, त तैखन तैन पुड़ सेनापति रखन।

10 "ज़ैखन तू कोन्ची नगरे सेइं जंग केरने जो तैसेरे नेड़े गास, तैखन पेइले तैस सेइं समझोतो केरनेरी खबर दे। 11 ते अगर तै समझोतो केरनेरे लेई मन्ने ते तेरे लेई अपने फाटक खोल्‍ले, तैखन ज़ेत्रे तैस मां भोन तैना सब तेरे अधीन भोइतां तेरे लेई निगरानी केरनेबाले ठहरन। 12 पन अगर तैना तीं सेइं समझोतो न केरन, पन तीं सेइं लड़नू चान, त तू तैस नगरे घेरां; 13 ते ज़ैखन तेरो परमेशर यहोवा तैस तेरे हथ्थे केरि दे तैखन तैसेरे सब मड़द तलवारी सेइं मारे गान। 14 पन कौन्शां ते बाल-बच्‍चे, ते जानबर वगेरा ज़ेत्री लूट पाट तैस नगरे मां भोए तैस अपने लेई रेखां; ते तेरे दुशमनां केरि लूट-पाट ज़ै तेरो परमेशर यहोवा तीं दे, तैन कम्मे मां आनू गाए। 15 एन्च़रां तैन नगरन सेइं बर्ताव केरनो ज़ैना तीं करां बड़ां दूर आन, ते ज़ैना इट्ठेरे कौमां केरे नगर नईं। 16 पन ज़ैना नगर इन लोकां केरां आन, ज़ैन केरो अधिकारी तेरो परमेशर यहोवा तीं बनानेबालोए, तैन मरां कोई प्राणी ज़ींतो न रेखां, 17 पन तैन केरो ज़रूर सत्यानाश केरनो, मतलब हित्ती, एमोरी, कनानी, परिज्जी, हिब्बी, ते यबूसी लोक, ज़ेन्च़रे कि तेरे परमेशर यहोवाए तीं हुक्म दित्तोरोए; 18 एरू न भोए कि ज़ेत्रां भिट्टां कम्मां तैना अपने देबतां केरि सेवाई मां केरते एवरेन, तेरहु केरनू तुसन भी शिखालन, ते तुस अपने परमेशर यहोवारे खलाफ पाप केरने लगथ।

19 "ज़ैखन तू जंग केरतां कोन्ची नगरे ज़ींतनेरे लेई तैस बड़े दिहाड़न तगर घेरो देस, तैखन तैसेरे बुट्टन पुड़ मैक्‍कु च़लेइतां तैन्न न केटथ, किजोकि तैन केरो फल तेरे खानेरे कम्मे एज्जेलो, एल्हेरेलेइ तैन्न न केटथ। कुन मैइदानेरो बुट कुन मैन्हुए कि तू तैस भी घेरो देइतां रख्खस? 20 पन ज़ैन बुट्टां केरे बारे मां तू इन ज़ानतस कि इन केरे फल खानेरे नईं, त तैन्न केटतां नाश केरां, ते तैस नगरेरे खलाफ तैस वक्ते तगर घेरो देइतां रेइयां ज़ांतगर तैन तेरे कैबू मां न एज्जी गान।