1 "इनां तैना हुक्म, ते तैना विधि ते नियम आन ज़ैना तुसन शिखालनेरो हुक्म तुश्शे परमेशर यहोवाए दित्तोरोए, कि तुस तैन्न तैस मुल्खे मां मन्ना ज़ेसेरे अधिकारी भोनेरे लेई पार गाने पुड़ आथ; 2 ते तू ते तेरू मट्ठू ते तेरू पोट्लड़ू परमेशर यहोवारो डर मन्ते तैसेरी तैन सब विधन पुड़ ते हुक्मन पुड़, ज़ैना अवं तीं शुनाताईं, अपने ज़िन्दगी भर च़लतो रास, ज़ैस सेइं तेरी लम्मी उमर भोए। 3 हे इस्राएल, शुन, ते एरू केरनेरी एतिहात केर; एल्हेरेलेइ कि तेरू भलू भोए, ते तेरे सियानां केरे परमेशर यहोवारे वचनेरे मुताबिक तैस मुल्खे मां ज़ैड़ी दुद्ध ते मैछ़ेरी गड्डां* बेगतिन तुस बड़े भोइ गाथ।

4 "हे इस्राएल, शुन, यहोवा इश्शो परमेशरे, यहोवा अक्‍के आहे; 5 तू अपने परमेशर यहोवा सेइं अपने सारे मन, ते सारे प्राण, ते सैरी ताकती सेइं प्यार केरां। 6 ते इना हुक्म ज़ैना अवं अज़ तीं शुनाताईं तैना तेरे मने मां बनोरे रान 7 ते तू इन्न अपने बाल-बच्‍चन समझ़ेइतां शिखैलां, ते घरे मां बिश्शोरे, बत्तां च़लते, लेटते, उठते, इन केरि गलबात केरां। 8 ते इन्न अपने हथ्थे पुड़ निशानेरे शक्ली मां बन्धने, ते इना तेरे एछ़्छ़ी केरे मझ़ाटे टिकोवेंरू कम देन। 9 ते इन अपने-अपने घरेरे दारेरी देरबली पुड़ ते अपने फाटकन पुड़ लिखनू।"

10 "ज़ैखन तेरो परमेशर यहोवा तीं तैस मुल्खे मां पुज़ाए ज़ेसेरे बारे मां तैनी तेरे पूर्वज अब्राहम, इसहाक, ते याकूबे सेइं तीं देनेरी कसम खाइ, ते ज़ैखन तीं तैना बड्डां-बड्डां ते रोड़ां नगर, ज़ैना तीं नईं बनेवरां, 11 ते रोड़े-रोड़े चीज़न सेइं भरोरां घरां, ज़ैना तीं नईं भरोरां, ते बनेवरां खुहां, ज़ैना तीं नईं घड़ोरां, ते दाछ़री बागां ते ज़ैतूनेरे बुट, ज़ैना तीं नईं लेवरे, इना सब चीज़ां ज़ैखन तै दे, ते तू खेइतां रज़्ज़स, 12 तैखन खबरदार रेइयां, कोन्च एरू न भोए कि तू यहोवाए बिसरी गास, ज़ैनी तू गुलैमरे घरे मतलब मिस्र मुल्खे मरां केढतां आनोरोस। 13 अपने परमेशर यहोवारो डर मन्नो; तैसेरी सेवा केरनि, ते तैसेरे नंव्वेरी कसम खानी। 14 तुस अपने च़ेवरे पासां केरे मुल्खां केरे लोकां केरे देबतन पत्ती न गेइयथ; 15 किजोकि तेरो परमेशर यहोवा ज़ै तेरे दरमियाने मांए तै जलन रखनेबालो परमेशरे; कोन्च एरू न भोए कि तेरे परमेशर यहोवारो कोप तीं पुड़ भड़के, ते तै तीं धेरती पुड़ेरां नाश केरि छ़डे।

16 "तुस अपने परमेशर यहोवारी अज़मैइश न केरथ, ज़ेन्च़रे कि तुसेईं मस्सा मां तैसेरी अज़मैइश कियोरी✝ थी। 17 अपने परमेशर यहोवारे हुक्मन, कानूने, ते विधन, ज़ैना तैनी तीं दित्तोरेन, होशियारी सेइं मेन्नथ। 18 ते ज़ैन कम यहोवारे नज़री मां ठीक ते रोड़ू भोए तैन्ने केरथ, ज़ैस सेइं कि तेरू भलू भोए, ते ज़ैस रोड़े मुल्खेरे बारे मां यहोवा तेरे सियानन सेइं कसम खेवरीए तैस मां तू दाखल भोइतां तैसेरो अधिकारी भोइ गास, 19 कि तेरे सब दुश्मन तेरे सामनेरां दूर किये गान, ज़ेन्च़रां कि यहोवा ज़ोवरू थियूं।

20 "फिरी एजने बाले वक्ते मां ज़ैखन तेरे बच्‍चे तीं पुछ़न, ‘इना हदायतां ते विधि ते नियम, ज़ैन केरे मन्नेरो हुक्म इश्शो परमेशर यहोवाए तुसन दित्तोरोए, इन केरि कुन ज़रूरते?’ 21 तैखन अपने बच्‍चन सेइं ज़ोइयां, ‘ज़ैखन अस मिस्र मुल्खे मां फ़िरौनेरे गुलाम थिये, तैखन यहोवाए शेक्तिबाले हथ्थे सेइं अस मिस्रे मरां केढतां आने; 22 ते यहोवा इश्शे हेरते मिस्रे मां फ़िरौन ते तैसेरे सारे घराने दुख देनेबाले बड्डे-बड्डे निशान ते चमत्कार हिराए; 23 ते तैनी अस तैट्ठां केढतां आने, एल्हेरेलेइ कि असन इस मुल्खे मां पुज़ेइतां छ़डे, ज़ेसेरे बारे मां तैनी इश्शे सियानन सेइं कसम खेवरी थी, एस असन सौंफी दे। 24 ते यहोवाए असन इना सब विधि मन्नेरो हुक्म दित्तो, एल्हेरेलेइ कि अस अपने परमेशर यहोवारो डर मन्नम, ते एन्च़रां सेइं सदा इश्शू भलू भोए, ते तै असन ज़ींते रख्खे, ज़ेरू कि अज़्ज़ेरे दिहाड़े आम। 25 ते अगर अस अपने परमेशर यहोवारी नज़री मां तैसेरे हुक्मेरे मुताबिक इन सारे नियमन मन्ने मां एतिहात केरम, त ई इश्शे लेई धार्मिकता ठहरेली।’"