1 बड़े लोक धड़त घिन्ने बाले ते पापी लोक* यीशु कां एइतां तैसेरी गल्‍लां शुन्ने लगोरे थिये। 2 फरीसी ते शास्त्री लोक शिकायत केरतां ज़ोने लगे, "कि ऐह मैन्हु पापी लोकन सेइं तालमेल रखते, ते तैन सेइं साथी खाते पीते।"

3 यीशुए तैन अक मिसाल देइतां ज़ोवं। 4 "तुसन मां एरो कोई आहे ज़ैस कां 100 भैड्डां भोन ते तैन मरां अक हेरोए ते 99 भैड्डां तैड़ी ज़ेरे जंगले मां छ़ेडतां तोपने न गाए, ज़ांतगर तैस मैल्होरी नईं? 5 ते ज़ैखन ते तैस मैल्हे त खुशी सेइं कंधे पुड़ छ़ुइतां आने। 6 ते अपने घरे एइतां अपने दोस्तन ते भियालन कुजेइतां ज़ोए कि, ‘अज़ मीं सेइं साथी खुशी मनाथ, किजोकि अज़ मेरी हेरोरि भैड मैल्होरीए।’ 7 अवं तुसन सेइं ज़ोताईं कि, एन्च़रे 99 धर्मी ज़ैनेईं पेइले अपने पापन करां मन फिरावरो तैन करां जादे ज़ैखन अक पापी, पापन करां मन फिराते सुर्गे मां बड़ी खुशी बनाई गाचे।

8 "कुन एरी भी कोई कुआन्श भोल्ही ज़ैस कां चैंदरे दश सिक्‍के भोन ते अक हेरोए ते तै दीयो बैलतां घरे अन्तर धूनी न दे, ते ज़ांतगर मैल्हे न तांतगर तोप्ती न राए? 9 ते तोपनेरे बाद अपने पड़ोसन ते अपनि सहेलन कुजेइतां एन न ज़ोए कि, ‘एज्जा मीं सेइं साथी खुशी मनाथ किजोकि अज़ मेरो हेरोरो सिक्‍को मैल्होरोए।’ 10 बस्सा, अवं तुसन सेइं ज़ोताईं कि एक्‍की पैपेरे, पापन करां मन फिराने सेइं परमेशरेरे स्वर्गदूतां केरे सामने बड़ी खुशी मनाई गाचे।"

11 यीशुए फिरी होरि मिसाल दित्ती, "केन्ची मैन्हेरां दूई मट्ठां थियां। 12 तैन मरां निकड़े मट्ठे अपने बव्वे सेइं ज़ोवं, ‘हे बाजी जाईदाती मां ज़ै मेरो हिस्सो बनते तै मीं दे।’ तैनी दूईने हिस्सो बेंटतां दित्तो। 13 थोड़े दिहैड़ना पत्ती निकड़े मट्ठे अपनु सब किछ जेइदात होरि मुल्खे जो नी, ते बुरे कम्मन मां लुट्टाई। 14 ज़ैखन तैनी सब किछ मुकेइ छ़ड्डू त तैस मुल्खे मां बड़ो काल पेव, ते तैस कां खाने जो किछ न रावं। 15 तैखन तै तैस मुल्खेरे एक्‍की रानेबाले कां कम तोपने पुज़ो। तैनी तै अपने ऊडारन मां सूर च़ारनेरे कम्मे लाव। 16 तैड़ी तै बड़ो ढ्लुखोरो थियो, तै तैन शेइयां खाने मां राज़ी थियो ज़ैन सूर खाते थिये, किजोकि तैस केन्चे किछ खाने जो न दित्तू। 17 तैखन तैस समझ़ अई ते ज़ोने लगो, ‘मेरे बाजी केरे मज़दूर रेज़तां रोट्टी खातन, पन अवं इड़ी फाके लगोरोईं मरने। 18 मीं खड़े उठतां अपने बाजी कां गानूए ते तैस सेइं ज़ोनूए हे बाजी अवं परमेशरेरी नज़री मां ते तुश्शी नज़री मां पापी आईं। 19 हुनी अवं एस काबल त नईं, कि तुश्शू मट्ठू भोइ, पन मीं भी अपने मज़दूर मां रखा।’"

20 "बस्सा, तैनी तै मुल्ख शारो ते वापस अपने बाजी कां च़लो, ते हेजू तै बड़े दूरे थियो, ते तैसेरे बाजे तै लाव ते तैसेरे बाजी तैस पुड़ बड़ो तरस अव, ते तै दौड़तो अपने मट्ठे कां जेव, ते तैन गले लाव ते बड़ो खुशी भोव। 21 मट्ठे अपने बाजी सेइं ज़ोवं, ‘हे बाजी अवं परमेशरेरी नज़री मां ते तुश्शी नज़री मां पापी आईं। हुनी अवं एस काबल त नईं कि, अपने आपे जो तुश्शू मट्ठू ज़ोई।’ 22 पन बाजे अपने नौकरन सेइं ज़ोवं, ‘लूश केरा ते सेब्भन करां पेइले रोड़ां लिगड़ां एस मट्ठे लुवाथ, ते एसेरे हथ्थे आंवठी ते पव्वन बूट लुवाथ। 23 ते अक जानबर मारो ते बड़ी धाम बनेइतां बड़ी खुशी मनाई। 24 किजोकि मेरू मट्ठू ज़ैन ज़ेन्च़रे मेरि जेवरू थियूं, अज़ ज़ींतू भोवरूए, हेरोरू थियो, ते मैल्होरूए।’ बस्सा तैना खुशी मनाने लगे।"

25 "तेइस बड्डू मट्ठू ज़ैन ऊडारे मां कम केरतां घरजो एवरू थियूं ज़ैखन तै घरे नेड़े पुज़ो त तैनी गीतां केरि त नच़नेरी शौर शुनी। 26 तैनी अक नौकर कुजव ते तैस पुछ़ू, ‘ऐह शौर कीजेई लगोरी भोने?’ 27 नौकरे तैस सेइं ज़ोवं, ‘तेरो निकड़ो ढ्ला वापस घरे एवरोए ते तेरे बाजे अक जानबर मैरतां धाम बनोरीए, किजोकि तै ठीक ठाक घरे पुज़ोरोए।’ 28 पन तैस मैन्हेरू बड़ू मट्ठू नाराज़ भोवं ते अन्तर घरे मां भी न लगू एजने, पन तैसेरो बाजी बेइर अव, ते तैस मिठांनेरी कोशिश की, कि घरे अन्तर एज्जे। 29 बडे मट्ठे अपने बाजी सेइं ज़ोवं, ‘हेरा अवं केत्रे सालां केरि देंती तुश्शी सेवा केरने लगोरोईं, ते कधे तुश्शो हुक्म नईं मरोड़ोरो ते तुसेईं कधे कोई छ़ेड़ू नईं दित्तोरोए कि अवं भी अपने दोस्तन सेइं खुशी मनेईं। 30 पन ज़ैखन तुश्शू निकड़ू मट्ठू अपनु सब किछ लुटेइतां वापस अऊं, त तैसेरेलेइ जानबर मारो ते अक बड़ी धाम बनाई।’ 31 तैसेरो बाजी ज़ोने लगो, ‘मेरा मट्ठां तू त मीं कां आस ते ज़ैन किछ मीं कांए तैन सब तेरूए। 32 पन असेईं खुशी मनानी ज़रूरी थी किजोकि तेरो ऐह निकड़ो ढ्ला ज़ै ज़ेन्च़रे मेरि जेवरो थियो, अज़ ज़ींतो भोवरोए, हेरोरो थियो ते अज़ मैल्होरोए।’"