1 फिरी यीशुए अपने चेलन अक होरि मिसाल दित्ती कि, "केन्ची अमीरेरो अक मुन्शी थियो, लोकेईं तैसेरी शकैइत तैसेरे मालिके सेइं लाई कि, ऐह तेरो माल बरबाद केरने लगोरोए। 2 मालिके तै कुजव ते ज़ोवं, ‘एन कुने ज़ैन अवं तेरे बारे मां शुन्ने लेवरोईं? सारे हिसाब-किताबे मां अज़्ज़ेरां बाद तू मेरो मुन्शी नईं रालो।’ 3 मुन्शे अपने दिले मां सोचू मेरो मालिक मेरे कम्मे करां मीं कढने लेवरोए, मीं मज़दूरी भी न केरोए ते शर्मारेमारे भीख भी न मैग्गोए। 4 ‘अवं ज़ानताईं कि, मीं कुन केरनूए इट्ठां कढनेरे बाद मीं लोक खुशी सेइं अपने घरे मां कबूल केरतन।’ 5 बस्सा तैनी अपने मालिकेरो अक कर्ज़दार तोपते, पेइले एक्‍की पुछ़ू तीं कां मेरे मालिकेरे केत्रे रुपेइयेन? 6 तैनी जुवाब दित्तो, ज़ैतूनेरे तेलेरे 100 पींपां केरि कीमते, तैनी ज़ोवं इना रां तेरां काकलां, ते बिशतां 50 पींपे बना। 7 फिरी तैनी मुन्शे होरि सेइं ज़ोवं, ‘तीं कां केत्रो कर्ज़ोए?’ तैनी ज़ोवं, ‘गेहुं केरि 100 बोरी*,’ तैनी ज़ोवं, ‘यां काकलां ते बिशतां 80 लिखी।’ 8 मालिके तैस बेइमान मुन्शेरी तारीफ़ की, एल्हेरेलेइ कि तैनी बेड़ि च़लैकी सेइं कम कियेरू थियूं। किजोकि इस दुनियारे लोक अपने लोकन सेइं सौदो केरनो परमेशरेरे लोकन करां बड़े हुशारी सेइं केरतन। 9 अवं तुसन सेइं ज़ोताईं कि दौलत खर्च़ केरतां इस दुनियारे लोकन दोस्त बनाथ, तुसन मरनेरां बाद हमेशारू घर मैल्हनूए। 10 ज़ै थोड़े ज़ेरे मां ईमानदैरी सेइं रहते ते हछे मां भी ईमानदार रहते। ज़ै थोड़े करां थोड़े मां भी बेइमाने तै हछ्छे मां भी बेइमाने। 11 बस्सा अगर तुस बेइमानेरे धन दौलती मां ईमानदार न भोए, त अपनि सच़्च़ी दौलत ज़ै सुर्गे मांए, कौन तुश्शे हवाले केरेलो? 12 अगर तुसेईं होरि केरे माले मां ईमानदार न भोए, त ज़ै तुश्शो अपनो माले कौन तुसन देलो? 13 कोई नौकर दूई मालिकां केरि सेवा एक्‍की वक्ते मां न केरि सके। न त एक्‍की सेइं दुश्मनी केरेलो ते होरि सेइं प्यार केरेलो, या एक्‍केरो बेनतां रालो त होरि न सुखालो। तुस परमेशरेरी ते दौलतरी, दूईयां केरि सेवा न केरि सकतथ।"

14 तैखन फरीसी लोक ज़ैना दौलतरे लालच़ी थिये, एन गल्‍लां शुन्तां यीशुएरी हासी बनाने लगे। 15 यीशु तैन जो ज़ोवं, "तुस तैना आथ ज़ैना लोकन मां अपनो आप बड़ो धर्मी हिरातन। पन परमेशर तुश्शे दिलेरी हालत ज़ानते किजोकि ज़ै चीज़ लोकां केरे लेई बड़ी बड्डीए ते तै परमेशरेरी नज़री मां भिट्टी आहे।"

16 "मूसेरे कानून ते नेबी केरि गल्‍लां यूहन्ना बपतिस्मो देनेबाले तगर रेइ, ते फिरी परमेशरेरे राज़्ज़ेरी खुशखबरी शुनाने लगे ते हर कोई तैस मां दाखल भोनेरी बड़ी कोशिश केरने लगोरेन। 17 पन धरती अम्बर टेली गालू पन परमेशरेरे कानूने मरां अक बिंदी भी न मिटेली। 18 ज़ै कोई अपनि कुआन्श शैरतां होरि सेइं ड्लाह बनाते तै तैस सेइं बदमाशी केरते ते ज़ै शैरोरी कुआन्शी सेइं ड्लाह बनाते तै भी बदमाशी केरते।"

19 "अक मैन्हु बड़ो अमीर थियो, ते तै बैंगनी लिगड़ां लातो थियो, ते बड़ां माघां लिगड़ां लातो थियो। ते रोज़ एश अशरती मां मसत रहतो थियो। 20 अक बड़ो गरीब मैन्हु ज़ेसेरू नवं लाज़र थियूं, तैसेरे दारे कां एन्हतां रखोरो थियो, तैसेरी सारी जान खेराड़ेइं सेइं भेरतां थी। 21 तै चातो थियो, कि अमीर मैन्हेरे टुक्ड़ेइं सेइं अपनु पेट भेरि, पन तैड़ी कुतरां एइतां थियां ते तैना तैसेरां खेरड़ां भी च़टतां थियां। 22 फिरी एरू भोवं कि तै गरीब लाज़र मेरि जेव ते स्वर्गदूतेईं तै छ़ुइतां अब्राहमे कां पुज़व, ते अमीर मैन्हु भी मेरि जेव ते तै देब्बी छ़डो। 23 ज़ैखन तैनी पातालेरे दुखे मां अपनि एछ़्छ़ी घैड़ी? त दूरेरां तैनी अब्राहम ते तैस कां नेड़े लाज़र लाव। 24 तै चिन्डां मैरतां ज़ोने लगो, ‘हे बाजी अब्राहम मीं पुड़ दया केर, एस लाज़रे भेज़ ते ऐह अपनि अंगलोइ पैनी सेइं सेलतां मेरे ज़िभी पुड़ लाहे, किजोकि अवं अग्गी मां तड़फने लेवरोईं।’ 25 पन अब्राहमे ज़ोवं, ‘मट्ठां याद केर तीं त अपनि जुवैनी मां सब रोड़ी चीज़ां मैल्ही ते इस लाज़रे सिर्फ बुरी चीज़ां मैल्ही, पन ऐह हुन्ना इड़ी आरामे मांए ते तू तकलीफी मां आस। 26 ते एन गल्‍लां केरे अलावा इश्शे ते तुश्शे मझ़ाटे अक बड्डी खाईए, ताके ज़ै कोई पार गानू चाए न गेइ सखे ते ज़ै वार एजनू चाए न एज्जी सखे।’ 27 तैनी मैन्हे ज़ोवं, हे बाजी अब्राहम, अवं ज़ोवले हथ केरतां ज़ोताईं कि, तू लाज़रे दुनियाई मां मेरे बाजी केरे घरे भेज़। 28 तैड़ी मेरे पंच़ ढ्ला आन ते तै तैन हदायत दे कि, एरू न भोए ते तैना भी इस अग्गी मां एज्जन। 29 पन अब्राहमे तैस ज़ोवं, ‘तैन केरि हदायतरे लेई तैन कां मूसेरो कानूने ते नेबी केरि किताबां त आन तैना तैन शुन्न ते मन्न।’ 30 तैनी मैन्हे ज़ोवं, ‘नईं हे बाजी अब्राहम अगर कोई मुड़दन मरां ज़ींतो भोइतां गाए त तैना ज़रूर पापन करां मन फिराले।’ 31 पन अब्राहम तैस सेइं ज़ोवं, ‘अगर तैना मूसेरी ते नेबी केरि न शुनी ते अगर कोई मुड़दन मरां ज़ींतो भोइतां गाए त तैना तैसेरू भी याकीन न केरेले।’"