1 अखमीरी तिहारेरी दिहाड़ी ज़ैस जो फ़सह ज़ोतन नेड़े एवरी थी। 2 प्रधान याजक ते शास्त्री मौको तोपने लेवरे थिये कि यीशु केन्च़रे मारम। किजोकि तैना लोकन करां डरते थिये।

3 ते शैतान यहूदा मां बेस्सी जेव तैस जो इस्करियोती भी ज़ोते थिये, ते तै यीशुएरे 12 चेलन मां गनो गातो थियो। 4 ते तै प्रधान याजकन ते प्राथना घरेरे किछ खास पुछ़ने गन्ने लोकन कां जेव ते तैन सेइं मुशोरो केरने लगो कि केन्च़रे सेइं यीशु तैन केरे हवाले केरि बटते। 5 तैना बड़े खुशी भोए ते तैस पेइंसे देनेरो वाधो कियो। 6 तैनी तैन केरि गल मन्नी ते मौको तोपने लगो, कि यीशु केन्च़रे सेइं तैन केरे हावाले केरे ते केन्ची पतो न लग्गे।

7 अखमीरी रोट्टरू तिहार नेड़े एवरू थियूं, ज़ैस फ़सह तिहारे मां गबड़ेरू बलिदान देनू ज़रूरी थियूं।✝ 8 यीशुए पतरस ते यूहन्ना एन ज़ोइतां भेज़े, "कि गाथ ते इश्शे लेई फ़सह तिहारेरी रोट्टी तियार केरा।" 9 चेलेईं पुछ़ू, "कि तू कोड़ि चातस कि अस तींजो फ़सह तिहारेरी रोट्टी तियार केरम?" 10 यीशुए तैन जुवाब दित्तो, "नगरे मां गाते तुसन अक मैन्हु मैलनोए ज़ै पैनेरो घड़ो घिन्तां च़लोरो भोनोए, तैस पत्ती गेइयथ ते ज़ैस घरे मां तै गालो तुस भी गेइयथ। 11 तैसेरे मालिके सेइं ज़ोइयथ कि गुरे ज़ोवरूए कि मेहमान कमरो कोड़ि आहे, ज़ैड़ी अवं अपने चेलन सेइं साथी फ़सह तिहारेरी रोट्टी खेइ सेखी? 12 तै तुसन दोपरे नेइतां अक बड्डो कमरो हिरालो ज़ै खूब रोड़ेच़ारे सज़ैवरो भोनोए तैड़ी इश्शे लेई तियारी केरथ।" 13 तैनेईं तैड़ी गेइतां सब किछ तेरहु लाव ज़ेरू तैनी ज़ोवरू थियूं, ते तैड़ी फ़सह तिहारेरी रोट्टी तियार की।

14 ज़ैखन रोट्टी खानेरो मौको अव त यीशु अपने प्रेरितन सेइं साथी बिश्शोरे थिये।✝ 15 ते यीशुए तैन सेइं ज़ोवं, "मेरी ऐह बड़ी इच्छा थी, कि अपनो दुख झ़ैल्‍लने (मरने) करां पेइले एक्‍की बार फ़सह तिहारेरी रोट्टी तुसन सेइं साथी खेइ। 16 किजोकि अवं तुसन सेइं ज़ोताईं, कि अज़्ज़ेरां पत्ती तांतगर न किछ खेइ सेखी, ज़ांतगर परमेशरेरे राज़्ज़ेरू कम पूरू न भोए।" 17 फिरी यीशुए दाछ़रे रसेरो कटोरो ट्लातो ते परमेशरेरू शुक्र केरतां चेलन दित्तो ते ज़ोवं, "यांथ ते एप्पू मांमेइं बन्टा। 18 किजोकि अवं तुसन सेइं ज़ोताईं कि अज़्ज़ेरां पत्ती दाछ़रो ऐह रस फिरी तांतगर न पीलो ज़ांतगर परमेशरेरू राज़ न एज्जे।" 19 फिरी यीशुए रोट्टी ट्लाती ते परमेशरेरू शुक्र केरतां ट्लोड़ी ते तैसेरे टुक्ड़े बनेइतां अपने चेलन एन ज़ोइतां दित्ती, "कि ई मेरी जाने ज़ै तुश्शे लेई अवं देताईं ते तुस भी मेरी यादगैरी मां एन्ने केरते रेइयथ।" 20 एन्च़रे रोट्टी खानेरे बाद तैनी कटोरो ट्लातो ते चेलन कां दित्तो ते ज़ोवं, "कि ई कटोरो मेरो तैस खूनेरो नंव्वो करारे ज़ै तुश्शे लेई दित्तोरोए। 21 पन हेरा मीं ट्लुवांने बालो मीं सेइं साथी खाने लगोरो। 22 किजोकि मैन्हेरू मट्ठू त हुनी च़लोरोस ज़ेन्च़रे कि तैसेरेलेइ पेइले एन पक्‍कू भोरूए पन तैस मैन्हु पुड़ अफ़सोस ज़ेसेरे हथेइं तै गिरफ्तार भोए।" 23 एन शुन्तां तैना एप्पू मांमेइं पुछ़ने लगे, "असन मां एरो ज़ेरो कौने ज़ै एन कम केरेलो?"

24 तैन एस गल्‍ली पुड़ एप्पू मांमेइं बेंस भोइ कि असन मां बड्डो कौने? 25 यीशु तैन सेइं ज़ोवं, "गैर कौमन पुड़ तैन केरे राज़े राज़ केरतन, ते ज़ैन केरो तैन पुड़ अधिकारे भोते तैन जो भलियाई केरनेबाले ज़ोतन। 26 पन तुसन मां एरू लोड़े भोवरू, तुसन मां ज़ै बड्डोए तै निकड़ेरे बराबर बने ते ज़ै खास आहे तै सेवकेरे बराबर बने। 27 किजोकि बड्डो कौने? ज़ै तैस कां साथी बिशोरोए या तै ज़ै तैसेरो चेलोए? कुन तै तैस कां नईं बिशोरो? पन अवं त तुसन मां अक सेवकेरे बराबर आईं। 28 पन तुस तैना आथ ज़ैना मेरी अज़मैइशरे मौके बराबर मीं सेइं साथी रातथ। 29 ज़ेन्च़रे बाजी मीं अक राज़ दित्तोरूए अवं भी तुसन अक राज़ देताईं। 30 ताके तुस मेरे राज़्ज़े मां मीं सेइं साथी बिशतां खाथ पीथ, बल्के बडे-बडे शाही तखतन पुड़ बिशतां इस्राएलेरे 12 गोत्रां केरो न्याय केरेले।"

31 "शमौन, शमौन, खबरदार रा, शैताने परमेशरे करां अज़ाज़त मग्गोरीए कि तुसन सेब्भन परखे, कि रोड़े बुरे करां अलग केरे ज़ेन्च़रे ज़मीनदार गेहुंन करां झ़ाझ़ अलग केरते।✝ 32 पन मीं तेरे लेई प्राथना की, कि तू मीं पुड़ विश्वास केरनो न शारस, ज़ैखन तू मन फिरास त अपने विश्वासी ढ्लान मज़बूत केरां।" 33 पतरसे यीशु सेइं ज़ोवं, "हे परमेशर तीं सेइं अवं कैद भोने बल्के मरनेरे लेई भी तियार आईं।" 34 पन यीशुए ज़ोवं, "हे पतरस अवं तीं सेइं ज़ोताईं कि अज़ कुकड़े बांग देने करां पेइले तू मेरो ट्लाई बार इन्कार केरेलो कि अवं एस न ज़ैनी।"

35 यीशुए तैन सेइं ज़ोवं, "कि ज़ेइस मीं तुस खुशखबरी शुनाने, बगैर बेटवे, बूटां ते झोलेरे बगैर भेज़ोरे थिये त तुस केन्ची चीज़रे घटी भोइ?" तैनेईं ज़ोवं, "केन्ची चीज़री नईं।" 36 यीशु तैन सेइं ज़ोवं, "पन हुनी ज़ैस कां बेटवो भोए ते साथी रख्खे ते एन्च़रे झोलो भी ते ज़ैस कां तलवार न भोए तै अपनु कोट बेच़तां भी तलवार घिन्ने। 37 अवं तुसन सेइं ज़ोताईं कि ई गल्‍ले ज़ै पवित्रशास्त्रे मां लिखोरीए, कि तै पूरी भोए। तै बुरे लोकन सेइं साथी गनो जेव! एल्हेरेलेइ मेरे बारे मां लिखोरी गल्‍लां पूरी भोने लेवरिन।" 38 तैनेईं ज़ोवं, "हे प्रभु हेर इड़ी दूई तलवारन।" तैनी तैन सेइं ज़ोवं "बेड़ि आन।"

39 फिरी तै बेइर निस्सो ते ज़ेन्च़रे तैसेरो दस्तूर थियो, तै ज़ैतून पहाड़े पुड़ जो च़लो जेव ते तैसेरे चेले भी तैस सेइं साथी च़ले जे। 40 तैस ठैरी पुज़तां तैनी तैन सेइं ज़ोवं, "प्राथना केरा ताके तुस अज़मैइशी मां न पेथ।" 41 यीशुए तैन करां थोड़े ज़ेरे अग्गर गेइतां ज़ैधू केरे भारे बिशतां प्राथना केरने लगो। 42 "हे बाजी अगर तेरी मर्ज़ी भोए त ई दुखेरो कटोरो मीं करां दूर केर, पन फिरी भी मेरी मर्ज़ी पूरी न भोए बल्के तेरी मर्ज़ी पूरी भोए।" 43 तैखन तैनी अम्बरेरां अक स्वर्गदूत लाव ज़ै तैस शक्ति देतो थियो। 44 ते तै परेशान भोइतां होरि जादे दिले सेइं प्राथना केरने लगो ते तैसेरो पसीनो ज़ेन्च़रे कि खूनेरे बडे-बडे तेप्पु तल्‍ले झ़ड़ते थिये। 45 प्राथना केरनेरे बाद यीशु अपने चेलन कां वापस अव ते तैना गम्मेरे मारे झ़ुलोरे मैल्हे। 46 यीशुए तैन सेइं ज़ोवं, "तुस किजो झ़ुल्‍लोरेथ उठा ते प्राथना केरा ताके अज़मैइशी मां न राथ।"

47 हेजू यीशुए गल ज़ोने लगोरो थियो, त मैन्हु केरो अक जथो तैड़ी पुज़ो ते बारहन मरां अक ज़ेसेरू नवं यहूदा थियूं, तैन सेइं अग्री-अग्री थियो, ते तै यीशु फुम्मड़ी देने अगर अव। 48 पन यीशुए तैस सेइं ज़ोवं, "यहूदा कुन तू एक्‍की फुम्मड़ी सेइं मीं मैन्हेरे मट्ठे ट्लुवातस?" 49 ज़ैखन यीशुएरे सैथेईं एन सब हेरू त तैनेईं ज़ोवं, "हे प्रभु कुन अस तलवार च़लाम?" 50 ते तैन मरां एक्‍के महायाजकेरे नौकरे पुड़ तलवारां च़लाई ते तैसेरो तैनी कन्न उड़ाव। 51 पन यीशुए जुवाब दित्तो, "बस्सा बड़ू भोइ जेवं।" ते यीशुए तैसेरो कन्न तैखने हथ लेइतां बझ़ाव। 52 तैखन यीशुए प्रधान याजकन ते मन्दरेरे सिपाही ते बुज़ुर्ग ज़ैन तैस गिरफ्तार केरने एवरे थिये तैन जो ज़ोवं, "तुस कुन तलवारां ते डण्डे घिन्तां मीं डैकू बुझ़तां ट्लाने एवरेथ? 53 ज़ेइस अवं तुसन सेइं साथी मन्दरे मां भोतो थियो, त तुसेईं मीं सेइं हथ न लाव, पन ई त तुश्शे आंधरेरे मौकेरो अधिकारे।"

54 ज़ैखन तैनेईं यीशु ट्लातो तैस तैट्ठां नेइतां महायाजकेरे घरे नियो, पतरस भी पत्पती बल्हे-बल्हे तैरां जेव।✝ 55 तैनेईं अंगने मां अग बालोरी थी ते सब बिशतां अग तपने लोरे थिये ते पतरस भी तैन मां थियो। 56 ते अक कुआन्श अग्गी कां बिशोरी तकने लेवरी थी ते पतरसेरां तेकतां ज़ोने लगी, "कि ई मैन्हु भी तैस सेइं साथी थियो।" 57 पन पतरसे इन्कार केरतां ज़ोवं, "हे कुआन्शे अवं एस न ज़ैनी ऐह कौने।" 58 थोड़ी सैइत्रां पत्ती होरे एक्‍के पतरसेरां तेकतां ज़ोवं, "तू भी तैन्ना केरो साथिस।" पन पतरसे ज़ोवं, "नईं अवं नईं।" 59 कोई एक्‍की घैंटेरे बाद केन्चे होरे बड़े याकीने सेइं ज़ोवं, "ई मैन्हु पक्‍को तैस सेइं साथी थियो, किजोकि ऐह भी गलीली आहे।" 60 पन पतरसे इन्कार केरतां ज़ोवं, "अवं एस न ज़ैनी तू कुन ज़ोतस?" हेजू पतरसे ऐह गल ज़ोने लगोरो थियो, त कुकड़े बांग दित्ती। 61 ते प्रभुए फिरतां पतरसेरे पासे तक्‍कू ते पतरसे परमेशरेरी तै गल याद आई, ज़ै तैनी पतरसे सेइं ज़ोवरी थी, "कि अज़ कुकड़े बांग देने करां पेइले तू मेरो ट्लाई बार इन्कार केरेलो।" 62 ते पतरस बेइर गेइतां ज़ोरे-ज़ोरे लेरां देने लगो।

63 ज़ैने मैन्हेईं यीशु अपने कब्ज़े मां कियोरो थियो, तैना तैसेरी हासी बनाते थिये ते कने तैस बाते थिये। 64 तैना यीशुएरी एछ़्छ़न पुड़ पट्टी बेन्धतां बाते थिये ते पुछ़ते थिये, "भविष्यिवाणी केर ते ज़ो केनि बाहोरिए?" 65 ते तैनेईं एन्च़रे होरि भी बेड़ि गल्‍लां ज़ोई ते तैसेरी तुहीन की।

66 झ़ेझ़ां बुज़ुर्ग लोक ते प्रधान याजक ते शास्त्री लोकेईं यीशु अपने महासभाई मां आनो, 67 ते ज़ोने लगे, "अगर तू मसीह आस त ज़ो!" यीशुए तैन सेइं ज़ोवं, "अगर अवं तुसन ज़ोईं भी त तुस मेरू याकीन न केरेले। 68 ते अगर अवं तुसन पुछ़ी त तुस जुवाबे न देले। 69 पन अज़्ज़ेरां बाद मैन्हेरू मट्ठू परमेशरेरे देइने पासे बिशोरू लाहेले।" 70 एस गल्‍ली पुड़ तैना सब ज़ोने लगे, "तू परमेशरेरू मट्ठू आस?" यीशुए जुवाब दित्तो, "तुस एप्पू मींजो ज़ोतथ कि तू आस?" 71 तैनेईं ज़ोवं, "हुनी असन होरि शाहादतां केरि कुन ज़रूरीए? किजोकि असेईं एसेरी ज़बान शुनेरूए।"