लूका 22

पतरसेरो इन्कार

54 ज़ैखन तैनेईं यीशु ट्लातो तैस तैट्ठां नेइतां महायाजकेरे घरे नियो, पतरस भी पत्पती बल्हे-बल्हे तैरां जेव।✝22:54 मत. 26:57-58,69-75;मरक. 14:53-54,66-72;यूह. 18:12-18,25-27. 55 तैनेईं अंगने मां अग बालोरी थी ते सब बिशतां अग तपने लोरे थिये ते पतरस भी तैन मां थियो। 56 ते अक कुआन्श अग्गी कां बिशोरी तकने लेवरी थी ते पतरसेरां तेकतां ज़ोने लगी, "कि ई मैन्हु भी तैस सेइं साथी थियो।" 57 पन पतरसे इन्कार केरतां ज़ोवं, "हे कुआन्शे अवं एस न ज़ैनी ऐह कौने।" 58 थोड़ी सैइत्रां पत्ती होरे एक्‍के पतरसेरां तेकतां ज़ोवं, "तू भी तैन्ना केरो साथिस।" पन पतरसे ज़ोवं, "नईं अवं नईं।" 59 कोई एक्‍की घैंटेरे बाद केन्चे होरे बड़े याकीने सेइं ज़ोवं, "ई मैन्हु पक्‍को तैस सेइं साथी थियो, किजोकि ऐह भी गलीली आहे।" 60 पन पतरसे इन्कार केरतां ज़ोवं, "अवं एस न ज़ैनी तू कुन ज़ोतस?" हेजू पतरसे ऐह गल ज़ोने लगोरो थियो, त कुकड़े बांग दित्ती। 61 ते प्रभुए फिरतां पतरसेरे पासे तक्‍कू ते पतरसे परमेशरेरी तै गल याद आई, ज़ै तैनी पतरसे सेइं ज़ोवरी थी, "कि अज़ कुकड़े बांग देने करां पेइले तू मेरो ट्लाई बार इन्कार केरेलो।" 62 ते पतरस बेइर गेइतां ज़ोरे-ज़ोरे लेरां देने लगो।