Lucas 5

18 किछ मैन्हेईं अक अधरंगी मैन्हु खट्टी पुड़ छ़ुइतां आनोरोए थियो, ते तैना कोशिश लगे केरने कि एस अन्तर नेइतां यीशु कां पुज़ाम। 19 पन अन्तर एत्री तंगी थी कि तैना अन्तर न गेइ सके फिरी तैनेईं तैस घरेरी छत पुट्टी ज़ैस घरे मां यीशु थियो, ते खट्टां सने तै अधरंगी मैन्हु अन्तर यीशुएरे तुत्तरे अगर उसालो। 20 यीशुए तैन केरो विश्वास हेरतां ज़ोवं, "हे दोस्त तेरे पाप माफ़ भोए।" 21 शास्त्री ते फरीसी लोक सोचने लगे, "ऐह कौन मैन्हु आहे, ज़ै परमेशरेरी तुहीन केरते, परमेशरेरे अलावा कौन पाप माफ़ केरि सकते?" 22 यीशुए तैन केरि गल्‍लां बुझ़ी ते तैन जुवाब दित्तो, "तुस अपने-अपने मने मां एन्च़रां किजो सोचने लग्गोरेथ? 23 कुन ज़ोनू सुखतुए, ‘तेरे पाप माफ़ भोए,’ या एन ज़ोनू ‘उठ, ते च़ल फिर?’ 24 पन तुसन पतो लग्गे, मैन्हेरे मट्ठे ज़मीनी पुड़ पाप माफ़ केरनेरो अधिकारे," फिरी यीशुए तैस बिमारे जो ज़ोवं, "अपनि खट सल्‍ल ते घरजो च़लो गा।" 25 तै अधरंगी बिमार मैन्हु सेब्भी केरे सामने ते खड़े उठो ते ज़ैस खट्टी पुड़ तै झ़ुलतो थियो, अपने दोग्गे पुड़ छ़ुइतां परमेशरेरी बडीयाई केरतो-केरतो घरजो च़लो जेव।