1 हे यहोवा, याद केर कि असन पुड़ कुन-कुन बीतोरूए;

इश्शे पासे नज़र केरतां इश्शी बदनामी हेर!

2 इश्शी विरासत परदेशी केरि भोइ ते इश्शां घरां बखले लोकां केरां भोआं।

3 अस अनाथ ते बाजी बगैर भोए;

इश्शी अम्मा विधवा भोइ जेई।

4 अस पानी मुल्‍ले घिन्तां पीतम,

असन कैड़ु भी मुल्‍ले मैलतन।

5 इश्शे मेट्टन पुड़ जुऊं रेखतां असन करां सखत मेहनत कराई गाती;

अस थेकी जेवरेम, असन आराम न मैल्हे।

6 असां एप्पु मिस्रेरे अधीन भोइ जे,

ते अश्शूरेरे भी अधीन भोए, ताके पेट भेरतां रोट्टी खाम।

7 इश्शे दादे-पड़दादेईं पाप कियो, ते मेरि जेवरेन;

पन तैन केरे अधर्मेरां कम्मां केरि सज़ाह असां झ़ैल्‍लने लगोरेम।

8 असन पुड़ गुलाम अधिकार रखतन;

तैन केरे हथ्थे करां कोई असन न छुटाए।

9 जंगले मां तलवारारी वजाई सेइं अस अपने प्राण खतरे मां छ़ेडतां खानेरी चीज़ां आनतम।

10 ढ्लुखरे अग्गरे वजाई सेइं,

इश्शी चमड़ी तंदूरेरी ज़ेरि काली भोइ जेवरीए।

11 सिय्योने मां कौन्शां,

ते यहूदा प्रदेशेरे नगरन मां दुश्मनेईं कुइयां भ्रष्ट की।

12 हाकिम हथ्थां केरे ताकती पुड़ टंगे;

ते बुज़ुर्गां केरि कोई भी आदर न कीजेई।

13 इश्शे जुवानन गुलामां केरि ज़ेरि चक्‍की च़लानी पेतीए;

ते बाल बच्‍चे लेकड़रो बोझ छ़ुइतां थरकतन।

14 हुनी नगरेरे फाटकन पुड़ बुज़ुर्ग मुकदमां केरो फैसलो केरनेरे लेई न बिश्शन,

न जुवाना केरू गीत शुनोए।

15 इश्शे मनेरी खुशी च़ली जेई,

इश्शू नच़नू मातमे मां बेदलोव।

16 इश्शे दोग्गे पुड़ेरू ताज झ़ेड़ी जेवं;

असन पुड़ अफ़सोस, किजोकि असेईं पाप कियोरोए!

17 इस वजाई सेइं इश्शो दिल कमज़ोर भोइ जेव,

इन्ने गल्‍लन सेइं इश्शी एछ़्छ़ी कैनी भोइ जेई,

18 किजोकि सिय्योन पहाड़ उज़ड़ी जेवरूए;

तैस मां गिद्दां घुमतन।

19 पन हे यहोवा, तू त हमेशा तगर तखते पुड़ बिशोरो रालो।

तेरू राज़ पीढ़ी-पीढ़ी बनोरू रालू।

20 तीं किजो अस हमेशारे लेई बिसरे,

ते किजो बड़े च़िरेरे लेई असां शारे?

21 हे यहोवा, असन अपने पासे फेर, तैखन अस फिरी सुधर्मेले।

पुराने ज़मानेरे ज़ेरे इश्शे दिहाड़े बेदलतां ज़ेरे पेइले थिये त तेरहे केर!

22 कुन तीं अस बिलकुल शारे?

कुन तू असन सेइं बड़ो क्रोधे आस?