1 ज़ैखन यीशु त तैसेरे चेले यरूशलेम नगरेरे नेड़े आए, त तैखन ज़ैतून नंव्वेरे पहाड़ेरे नेड़े, बैतफगे त कने बैतनिय्याह ड्लाव्वन कां पुज़्ज़े। तैखन यीशुए अपने चेलन मरां दूईयन सेइं एन ज़ोइतां पेइले भेज़े कि, 2 "अपने सामनेबाले ड्लोंव्वे मां गाथ। तैड़ी पुज़ते तुसन अक गधेरो बच्‍चो बंधोरो मैल्हेलो, ज़ैस पुड़ कधी कोई नईं च़ढ़ोरो। तैस खोलतां इड़ी मीं कां आनां। 3 अगर तुसन कोई पुछ़े, ‘किजो एन केरने लग्गोरेथ?’ त तैस सेइं ज़ोइयथ, ‘प्रभुए एसेरी ज़रूरते।’ त तै अकदम गधेरे बच्‍चे तुसन सेइं साथी इड़ी भेज़ेलो।" 4 तैना दूई चेले तैस ड्लोंव्वे मां जे। तैड़ी गधेरो बच्‍चो एक्‍के घरेरे दारे बेइर बंधोरो लाव, त तैना तैस खोलने लग्गे। 5 ज़ैना तैड़ी खड़े थिये, तैन मरां किछ मैन्हेईं तैन पुछ़ू, "एन कुन केरने लग्गोरेथ, गधेरे बच्‍चे किजो खोलने लग्गोरेथ?" 6 ज़ेन्च़रां यीशुए अपने चेलन सेइं ज़ोवरू थियूं, तेन्च़रां तैनेईं तैन मैन्हन सेइं ज़ोवं। तैखन तैन मैन्हेईं चेले तैट्ठां गाने दित्ते। 7 यीशुएरे चेलेईं बच्‍चो यीशु कां एन्हतां यीशुए तैस पुड़ बिशालनेरे लेई, तैस पुड़ अपने लिगड़ां छ़डो। त यीशु तैस पुड़ बिश्शो (त तैना यरूशलेम नगरेरे पासे जो च़लने लग्गे)। 8 तैखन बड़े लोकेईं (तैसेरी इज़्ज़त केरनेरे लेई) अपना लिगड़ां बत्ती मां बिछ़ां त कने किछ मैन्हेईं पट्लनबाली डैलड़ी एन्हतां बत्ती मां बिछ़ेई। 9 ज़ैना यीशुएरे अग्री-अग्री त कने पत्ती-पत्ती च़लने लग्गोरे थिये, तैना खुशी सेइं ज़ोरे सेइं ज़ोने लग्गे, "होशाना! (परमेशरेरी तारीफ़ भोए) परमेशर तैस बरकत दे, ज़ै प्रभु-परमेशरेरे अधिकारे सेइं साथी एज्जी राओरोए!" 10 "परमेशर तीं आशिर्वाद दे, ज़ैखन तू इश्शे पड़दादे दाऊदेरू राज़ेरू ज़ेरू राज़* केरस! परमेशरेरी होशाना (तारीफ़) भोए, ज़ै उच्‍चे सुर्गे मां आहे!" 11 तैल्‍ला पत्ती, तैन लोकन सेइं साथी, यीशु यरूशलेम नगरे मां पुज़तां मन्दरे मां जेव। यीशु मन्दरे मां च़ेवरे पासन तक्‍कू कि ज़ैन तैड़ी भोइ राओरू थियूं। तै अपने 12 चेलन सेइं साथी नगरे मरां निस्तां, राती बिशनेरे लेई बैतनिय्याह ड्लोंव्वे जो वापस च़लो जेव, किजोकि ड्लोझ़ भोइ जेवरी थी।

12 त एग्री दिहाड़ी, ज़ैखन यीशु त तैसेरे चेले बैतनिय्याह ड्लोंव्वेरां निस्तां यरूशलेम नगरे जो वापस एज्जी राओरे थिये, तैखन यीशुए ढ्लुख लग्गी। 13 तै दूरेरां फैगेरो अक नीलो बुट लेइतां तैसेरे नेड़े जेव कि खाने जो शायद तैस मां किछ मैल्हे। पन, ज़ैखन तै बुट्टे कां जेव, त तैड़ी पट्लां केरे अलावा तैस किछ न मैल्हू, किजोकि तै फल्‍लेरो मौसम न थियो। 14 तैखन यीशुए तैस बुट्टे फिटकार देइतां तैस सेइं ज़ोवं, "हुन्नेरे पत्ती, तीं मां कोई फल कधी न लग्गेलो!" त तैसेरे चेले एन शुनी राओरे थिये।

15 तैल्‍ला पत्ती, तैना फिरी यरूशलेम नगरे मां पुज़्ज़े, त यीशु मन्दरेरे अंगने मां जेव। तैड़ी लोक जानबरां केरू त कने मन्दरे मां च़ाढ़नेरू सामान घिन्नेरू त कने बेच़नेरो कारोबार केरि राओरे थिये। यीशु तैन्न बेइर कढने लगो, ते तैनी तैड़ी पेइंसे बदलनेबालन* केरे मेज़न त कने कबूतर बेच़नेबालन केरि कुर्सी उलटेइ दित्ती। 16 त मन्दरेरी ठैरी मां केन्ची बेच़नेरे लेई कोई चीज़ एन्हतां च़लने न दित्तू। 17 तैखन यीशुए तैन लोकन शिक्षा देइतां ज़ोवं, "परमेशरेरी किताबी मां एस मन्दरेरे बारे मां एन लिखेरूए कि परमेशरे ज़ोवं, मेरू मन्दर सैरी कौमां केरे लोकां केरे लेई प्राथनारू घर भोल्हु! पन तुसेईं लोकेईं इन मन्दर डैकू केरो अड्डो बनोरोए।" 18 एन शुन्तां प्रधान याजक त कने शास्त्री लोक यीशु कत्ल केरनेरो मौको तोपने लग्गे। पन तैना यीशु करां डरते थिये, किजोकि सारे लोक तैसेरी शिक्षाई शुन्तां हैरान भोते थिये। 19 ज़ैखन ड्लोझ़ भोइ, त यीशु त तैसेरे चेले (रात गुज़ारनेरे लेई) नगरेरां बेइर च़ेलि जे।

20 एग्री दिहाड़े, झ़ेज़्झ़ां यीशु त तैसेरे चेले तैट्ठां यरूशलेम नगरे जो च़ले त तैनेईं तै फैगेरो बुट लाव, ज़ैस यीशुए पेइले फिटकार दित्तोरो थियो। तै बुट ज़ीलन तगर शुक्‍की जेवरो थियो। 21 पतरसे तै गल याद आई कि यीशुए एस बुट्टे फिटकार दित्तोरो थियो, त तैनी यीशु सेइं ज़ोवं, "हे गुरू, तक! ऐह फैगेरो बुट ज़ैस तीं फिटकार दित्तोरो थियो, शुक्‍की जेवरोए! (एन केन्च़रां भोवं)" 22 यीशुए अपने चेलन जुवाब दित्तो, "तुस परमेशरे पुड़ विश्वास रखा। 23 अवं तुसन सेइं सच़ ज़ोताईं कि ज़ै कोई एस पहाड़े सेइं ज़ोए, ‘तू उखड़तां समुन्दरे मां बिछ़ड़ी गा,’ त एन्च़रां ज़ोइतां अपने दिले मां शक न केरे, पन विश्वास केरे कि ‘ज़ैन अवं ज़ोताईं तैन भोइ गालू,’ त तैसेरेलेइ तैन्ने भोल्हु। 24 एल्हेरेलेइ अवं तुसन सेइं ज़ोताईं कि, ज़ैखन तुस प्राथना केरतां परमेशरे करां ज़ैन भी मगेले, त विश्वास केरा कि तुसन तैन ज़रूर मैल्ही गालू, तैखन परमेशरे करां तैन तुसन दित्तू गालू। 25 ते ज़ैखन कधी तुस खड़े भोइतां परमेशरे कां प्राथना केरतथ, त अगर तुसन केन्ची सेइं गिलो भोए, त पेइले तुस तैस माफ़ केरा, ताके तुश्शो सुर्गेरो बाजी भी तुश्शे पाप माफ़ केरे। 26 अगर तुस होरि लोकन माफ़ न केरथ, त तुश्शो बाजी परमेशर भी, ज़ै सुर्गे मां आहे, तुश्शे पाप माफ़ न केरेलो।"

27 तैल्‍ला पत्ती, यीशु त तैसेरे चेले फिरी यरूशलेम नगरे मां आए। ज़ैखन यीशु मन्दरेरे अंगने मांमेइं हंठने लग्गोरो थियो, त तैखन प्रधान याजक त कने शास्त्री त कने यहूदी लोकां केरे बुज़ुर्ग तैस कां आए, त तैस सवाल पुछ़ने लग्गे, 28 "तू एन कम्मां* कोस अधिकारे सेइं केरतस, त कने एन कम्मां केरनेरो तीं केनि अधिकार दित्तोरोए?" 29 पन यीशुए तैन सेइं ज़ोवं, "अवं भी तुसन अक सवाल पुछ़ताई। मीं तैसेरो जुवाब देथ, तैखन अवं भी तुसन ज़ोलो कि अवं एन कम्मां कोस अधिकारे सेइं केरतईं। 30 मीं जुवाब देथ। यूहन्ना ज़ै बपतिस्मो देनेबालो थियो, तैस बपतिस्मो देनेरो अधिकार कोट्ठां मैल्हो, परमेशरेरी तरफां मैल्हो या मैन्हु केरि तरफां?" 31 तैखन तैना एप्पू मांमेइं गलबात केरने लग्गे कि, "अगर अस ज़ोम कि, ‘परमेशरेरी तरफां मैल्हो,’ त एनी पुछ़नूए कि, ‘फिरी तुसेईं तैसेरो विश्वास की न कियो?’ 32 पन अस एन भी नईं ज़ोई सकम कि, ‘यूहन्ना अधिकार, मैन्हु केरि तरफां मैल्हो,’ किजोकि असन लोकां केरो डर आहे कि तैना असन पुड़ क्रोध केरले, किजोकि सारे लोक समझ़ते थिये कि सच़्च़े यूहन्ना नबी आए।" 33 एल्हेरेलेइ तैनेईं यीशु ऐह जुवाब दित्तो कि, "असन नईं पतो।" यीशुए तैन सेइं ज़ोवं, "अवं भी तुसन सेइं न ज़ोईं कि अवं एन कम्मां कोस अधिकारे सेइं केरतईं।"