1 फ़सहेरू तिहार त कने अखमीरी रोट्टरू तिहार दूई दिहाड़न पत्ती एजनेबालां थियां। प्रधान याजक त कने शास्त्री मौको तोपने लग्गोरे थिये कि अस यीशु केन्च़रां च़ुपच़ारे ट्लाम ते तैस मैरी छ़डम। 2 पन तैनेईं एप्पू मांमेइं ज़ोवं कि, "अस तिहारेरे दिहाड़न मां यीशुए कैद न केरम, किजोकि तैन दिहाड़न मां बड़े लोक च़ेवरे पासन भोतन, ते एरू न भोए कि यीशुएरे कैद भोनेरे वजाई सेइं लोकन मां दंगो फसाद भोइ गाए।"

3 यीशु बैतनिय्याह ड्लोंव्वे मां शमौन नंव्वेरे मैन्हेरे घरे मां थियो, ज़ैस पेइले कोढ़ेरो रोग थियो। ज़ैखन यीशु तैड़ी रोट्टी खेइ राओरो थियो, त तैखन अक कुआन्श संगमरमरे सेइं बनोरे भांडे मां इत्र एन्हतां यीशु कां आई, ज़ै बड़ो कीमती थियो त कने ज़ैस जो जटामासी ज़ोतन। तैसां तै इत्र बोतल ट्लोड़तां खोल्‍ली ते यीशुएरी इज़्ज़त केरनेरे लेई तैसेरे दोग्गे पुड़ इत्र उलटव। 4 पन किछ मैन्हु, ज़ैना तैड़ी खड़े थिये, तैस कुआन्शी हेरतां अपने दिले मां सेरकोइतां एप्पू मांमेइं ज़ोने लग्गे, "ऐह कुआन्श किजो एस बड़ी कीमतरो इत्र ज़ैया केरचे? 5 ऐह इत्र त एक्‍की सालेरी मज़दूरारे पेंइसन केरां भी जादे भाए मां बेच़तां, ते तैना पेइंसे गरीब मैन्हन देइ सकती थी!" ते तैना सेरकोइतां तैस सेइं डांटने लग्गे। 6 पन यीशुए तैन सेइं ज़ोवं, "एस छ़ेड्डी देथ! एस किजो तंग केरतथ? एसां त मीं सेइं भलियाई कियोरीए। 7 गरीब मैन्हु त हमेशा तुसन सेइं साथी रहतन। ज़ैखन भी तुस चाथ, तैखन तैन सेइं भलियाई केरि सकतथ, पन अवं तुसन सेइं साथी हमेशा न रालो। 8 ज़ैन किछ ऐह कुआन्श केरि सकती थी, तैन एसां कियूं। एसां मेरी जानी पुड़ इत्र लेइतां मेरे मरनेरां पेइली मेरी जान दबनेरे लेई तियार कियोरीए। 9 अवं तुसन सेइं सच़ ज़ोताईं कि सैरी दुनियाई मां ज़ैड़ी कोन्ची मेरे बारे मां खुशखबरी लोकन शुनाई गाली, तैड़ी ज़ैन कम एसां मीं सेइं कियोरूए तैन भी एसेरी यादी मां ज़ोवं गालू।"

10 तैल्‍ला पत्ती, यहूदा इस्करियोती, ज़ै 12 चेलन मरां अक थियो, प्रधान याजकन कां जेव कि तै यीशु ट्लुवानेरे लेई तैन केरि मद्दत केरे। 11 एन शुन्तां तैना बड़े खुश भोए, ते तैसेरे मद्दतरे लेई तैनेईं चैंदरे रुपेइये देनेरो वाधो कियो। एल्हेरेलेइ, तै ठीक मौके बलगने लगो कि यीशु केन्च़रां सेइं ट्लुवाए।

12 अखमीरी रोट्टरे तिहारेरी पेइली दिहाड़ी, ज़ैखन लोक फ़सहेरे तिहारेरे✝ गबड़े बलिदान केरते थिये, तैखन यीशुएरे चेलेईं तैस पुछ़ू, "तू कोड़ि चातस कि अस गेइतां तेरे लेई फ़सह तिहारेरी रोट्टी तियार केरम?" 13 तैखन यीशुए अपने दूई चेले एन ज़ोइतां भेज़े, "यरूशलेम नगरे मां गाथ, ते अक मैन्हु तुसन पैनेरो घड़ो छ़ुइतां मैल्हेलो, तैस पत्ती-पत्ती गेइयथ। 14 ते तै ज़ैस घरे मां गालो, तैस घरेरे मालिके सेइं तुस एन ज़ोइयथ कि, इश्शे गुरे ज़ोवरूए कि, ‘मेरे लेई तियार कियोरो मेहमान कमरो कोड़ि आहे, ज़ैड़ी अवं अपने चेलन सेइं साथी फ़सह तिहारेरी रोट्टी खेइ?’ 15 तैखन घरेरो मालिक तुसन दूइयोवं छती पुड़, तियार कियोरो, अक बड्डो कमरो हिरालो। तैड़ी इश्शे लेई रोट्टी तियार केरथ।" 16 ते चेले तैट्ठां निस्तां नगरे मां आए, त ज़ेन्च़रां यीशुए तैन सेइं ज़ोवरू थियूं, तेन्च़रां तैनेईं लावं। ते तैनेईं फ़सह तिहारेरी रोट्टी तियार की।

17 ज़ैखन ड्लोझ़ भोइ, त यीशु अपने 12 चेलन सेइं साथी मेहमान कमरे मां अव। 18 ज़ैखन तैना बिशतां रोट्टी खेइ राओरे थिये, त यीशुए तैन सेइं ज़ोवं, "अवं तुसन सेइं सच़ ज़ोताईं कि तुसन मरां अक, ज़ै मीं सेइं साथी रोट्टी खेइ राओरोए, मीं धोखे सेइं ट्लुवालो।" 19 एन शुन्तां तैना सारे चेले उदास भोए, ते तैना अक-अक केरतां यीशु सेइं पुछ़ने लग्गे, "कुन अवं आईं? कुन अवं आईं?" 20 यीशुए तैन सेइं ज़ोवं, "तै तुसन बारहन मरां अक आए, ज़ै मीं सेइं साथी बिशतां इश्शी एक्‍की थैली मां रोट्टी खेइ राओरोए। 21 ज़ेन्च़रां मैन्हेरू मट्ठू यानी मेरे बारे मां परमेशरेरी किताबी मां लिखेरूए, तेन्च़रां अवं मारो गानोईं। अफ़सोस! (किजोकि तैस मैन्हु बड़ी सज़ाह मैल्‍लनीए एजने बालीए) ज़ेसेरे वजाई सेइं मैन्हेरू मट्ठू यानी अवं ट्लुवाव गानोईं! अगर तै मैन्हु ज़र्मोरो न भोथो, त तैसेरे लेई तैन भलू थियूं।"

22 ज़ैखन यीशु त तैसेरे चेले फ़सहेरी रोट्टी खेइ राओरे थिये,✝ यीशुए अक रोट्टी ट्लेइतां परमेशरेरू शुक्र केरतां ट्लोड़ी। तैल्‍ला पत्ती, तैनी तै अपने चेलन दित्ती, ते तैन सेइं ज़ोवं, "ट्लाथ ते खाथ। ई मेरो जिसम आहे।" 23 फिरी यीशुए दाछ़रे रस्सेरो कटोरो ट्लेइतां परमेशरेरू शुक्र कियूं। तैल्‍ला पत्ती, तैनी तै अपने चेलन दित्तो, ते तैनेईं सैरेईं पीयो। 24 तैखन तैनी तैन सेइं ज़ोवं, "ऐह दाछ़रे रस मेरो खून आहे, ज़ै परमेशर त कने लोकां केरे मझ़ाटे नव्वों करार बनाते, ज़ै बड़े लोकां केरे मैफरे लेई बगाव गालो। 25 अवं तुसन सेइं सच़ ज़ोताईं कि अवं दाछ़रो रस तैस दिहाड़ी तगर फिरी कधी न पीलो, ज़ांतगर परमेशरेरे राज़्ज़े मां अवं नंव्वो दाछ़रे रस पीं। 26 तैल्‍ला पत्ती, यीशु त कने तैसेरे चेले परमेशरेरू भजन ज़ोइतां, यरूशलेम नगरेरे बेइर ज़ैतून नंव्वेरे पहैड़ी पुड़ च़ले जे।"

27 तैखन यीशुए अपने चेलन सेइं ज़ोवं, "तुस सारे मीं छ़ेडतां नश्शेले, किजोकि परमेशरेरी किताबी मां लिखोरू कि, ‘अवं पुहाले मैरेलो ते तैसेरी भैड्डां इरां उरां नेश्शी गैली।’✝ 28 पन अवं मेरतां मुड़दन मरां फिरी ज़ींतो भोनोईं। तैल्‍ला पत्ती, अवं तुसन करां पेइले गलील इलाके जो गालो त तैड़ी तुस मीं लाहेले।" 29 तैखन पतरसे यीशु सेइं ज़ोवं, "अगर सारे तीं छ़ेडतां नश्शेले त नश्शन, पन अवं कधे न नश्शेलो।" 30 यीशुए पतरसे सेइं ज़ोवं, "अवं तीं सेइं सच़ ज़ोताईं कि अज़्ज़ेरी राती कुकड़ेरे दूई बार बांग देने करां पेइले, तू ट्लाई बार मेरो इन्कार केरेलो कि तू मीं न ज़ानस।" 31 पन पतरसे मना ज़ोरे सेइं यीशु सेइं ज़ोने लगो, "अगर मीं तीं सेइं साथी मरनू भी पे, त फिरी भी अवं तेरो इन्कार कधी न केरेलो।" एन्च़रां होरि चेलेईं भी ज़ोवं।

32 तैल्‍ला पत्ती, यीशु ते तैसेरे चेले गतसमनी नंव्वेरे एक्‍की बागी मां जे, ते तैड़ी यीशुए अपने किछ चेलन सेइं ज़ोवं, "इड़ी बिश्शोरे राथ, ज़ांतगर अवं प्राथना न केरि।" 33 फिरी यीशुए पतरस ते याकूब ते यूहन्ना एप्पू सेइं साथी बागी मां अग्गर निये, ते तैड़ी तै बड़े परेशान भोने ते कने घबराने लगो। 34 ते तैखन यीशुए तैन सेइं ज़ोवं, "मेरो दिल बड़ो उदास आहे, इड़ी तगर कि अवं मरनेबालोईं। तुस इड़ी बलगा, ते बींझ़े राथ।"

35 फिरी तै बागी मां थोड़ो ज़ेरे अग्गर गेइतां, तल्‍ले मां ज़ैन्धु केरे भारे बिशतां प्राथना केरने लगो कि अगर भोइ सके त ऐह दुखेरी घड़ी मीं पुड़ेरां टेली गाए। 36 ते तैनी प्राथनाई मां एन ज़ोवं, "बैपू! हे मेरे बाजी, तुसन करां सब किछ भोइ सकते। एस दुखेरो कटोरो मीं करां दूर केरा। फिरी भी ज़ैन अवं चाताईं तैन नईं, पन ज़ैन तुस चातथ तैन्ने भोए।"

37 फिरी तै अपने ट्लाई चेलन कां वापस अव, त तैना झ़ुल्‍लोरे मैल्हे, ते तैनी तैना बींझ़ाए, त तैनी शमौन-पतरसे सेइं ज़ोवं, "हे शमौन, कुन तू झ़ुल्‍लोरोस? कुन तू अक घड़ी भी बींझ़ो न रेइ सकस?" 38 तैखन यीशुए तैन सैरन सेइं ज़ोवं, "बींझ़े ते प्राथना केरते राथ ताके तुस अज़मैइशी मां न पेथ। तुस त अज़मैइश रोकनी चातथ, पन तुसन कां रोकनेरी ताकत नईं।"

39 ते यीशु फिरी अपने चेलन करां थोड़े दूर च़लो जेव, त ज़ैना गल्‍लां तैनी पेइले ज़ोइतां प्राथना कियोरी थी, तैन्नां गल्‍लां दुबारां ज़ोइतां प्राथना की। 40 ते फिरी वापस एइतां हेरू कि तैना चेले झ़ुल्‍लोरेन, किजोकि तैन एत्री निड्ली थी, कि तैन केरि एछ़्छ़ी भी न थी लेवरी खुलने। ज़ैखन यीशुए तैना बींझ़ाए, त तैना शरमाने लग्गे कि यीशुए कुन जुवाब देम! 41 फिरी ट्लेइयोवं बार गेइतां यीशुए प्राथना की ते वापस एइतां फिरी तैन सेइं ज़ोवं, "कुन तुस हेजू झ़ुल्‍लोरेथ! बड़ू आहे! हुनी घड़ी एज्जी जेवरी! हेरा, मैन्हेरू मट्ठू (यानी अवं) पापी मैन्हु केरे हथ्थन मां ट्लुवेइयोव गानोईं। 42 उठा, च़लम। हेरा! मीं ट्लुवानेबालो नेड़े पुज़्ज़ी जेवरोए!"

43 यीशु एन्ने ज़ोई राओरो थियो कि अकदम यहूदा ज़ै 12 चेलन मरां अक थियो, एप्पू सेइं साथी मैन्हु केरि अक बड्डी भीड़ एन्हतां तैड़ी पुज़्ज़ी जेव, ज़ैन कां तलवारां ते डण्डे थिये। तैना प्रधान याजक ते शास्त्री लोक ते कने यहूदी लोकां केरे बुज़ुर्गां केरि तरफां यीशु कैद केरनेरे लेई भेज़ोरे थिये।✝ 44 यीशुएरो ट्लुवानेबालो यहूदा तैड़ी पुज़ने करां पेइले, तैन मैन्हन जो निशान दित्तोरो थियो कि ज़ैस अवं फुम्मड़ी देलो तैए यीशु आहे, तैस ट्लेइतां ध्याने सेइं नेइयथ। 45 ज़ैखन यहूदा ते मैन्हु केरि भीड़ बागी मां आई, त तैनी अकदम यीशु सेइं ज़ोवं, "हे रब्बी (गुरू)" ते तैस फुम्मड़ी दित्ती। 46 तैखन तैनेईं यीशु ट्लेइतां कैद कियो। 47 यीशुएरे चेलन मरां, ज़ैना तैसेरे नेड़े खड़े थिये, एक्‍के अपनि तलवारे सेइं महायाजकेरे एक्‍की नौकरे पुड़ च़लाई त तैसेरो अक कन केट्टी छ़डो। 48 यीशुए तैन मैन्हन सेइं ज़ोवं, "कुन तुस मीं डैकू समझ़तां ट्लानेरे लेई तलवारां ते डण्डे घिन्तां एवरेथ? 49 अवं त हर दिहाड़ी मन्दरे मां तुसन सेइं साथी रेइतां परमेशरेरे बारे मां लोकन शिक्षा देतो थियो, पन तैखन तुसेईं अवं न ट्लाव। पन एन एल्हेरेलेइ भोने लगोरूए कि पवित्रशास्त्रे मां मेरे बारे मां ज़ैना गल्‍लां लिखोरिन तैना पूरी भोन।"

50 तैखन यीशुएरे सारे चेले तैस छ़ेडतां नेश्शी जे। 51 ते अक जुवान ज़ैनी अपनि नग्गी जानी पुड़ अक लिगड़ पलैट्टेरू थियूं, यीशु पत्ती च़लो। ते भीड़ी मरां किछ मैन्हेईं तै ट्लाव। 52 पन तै तैन केरे हथ्थन मां अपनु लिगड़ छ़ेडतां नग्गो नेश्शी जेव।

53 तैल्‍ला पत्ती, मैन्हु केरि भीड़ां यीशु महायाजकेरे घरे मां नियो। ते सारे प्रधान याजक ते कने बुज़ुर्ग त कने शास्त्री यीशुएरू इमतिहान नेनेरे लेई महायाजके सेइं साथी तैड़ी अकोट्ठे भोए।✝ 54 यीशु त कने मैन्हु केरि भीड़ी करां दूर-दूर रेइतां पतरस तैन पत्ती-पत्ती महायाजकेरे मेहलेरे अंगने तगर पुज़्ज़ी जेव। ते तैड़ी तै महायाजकेरे पहरदारे सेइं साथी बिशतां अग तपने लगो।

55 मेहलेरे अन्तर, प्रधान याजक त कने सारी महासभा यीशुएरे खलाफ गवाही तोपनेरी कोशिश केरि राओरे थिये, ताके तैना तैस मैरी सकन, पन तैन्न किछ न मैल्हू। 56 किजोकि बड़े मैन्हु यीशु पुड़ झूठी गवाही देने लग्गोरे थिये, पन तैन केरि गवाही अक्‍कां ज़ेरि न थी। 57 आखरी मां किछ मैन्हेईं उठतां तैसेरे खलाफ ई झूठी गवाही दित्ती कि, 58 "असेईं एस करां एन ज़ोते शुनेरू कि, ‘अवं मैन्हु केरू बनोरू एस मन्दरे बिछ़ोड़तां ट्लेइ दिहाड़न मां होरू मन्दर बनालो, ज़ैन मैन्हु केरू बनोरू न भोल्हु।’ " 59 पन एन ज़ोइतां भी तैन केरि गवाही अक्‍कां ज़ेरि न निस्सी।

60 तैखन महायाजके आदालतेरे मझ़ाटे खड़े भोइतां यीशु पुछ़ू, "एना लोक तेरे खलाफ गवाही देतन, कुन तू कोई जुवाब न देस?" 61 पन यीशु च़ुप राव, ते किछ जुवाब न दित्तो। तैखन महायाजके तैस फिरी पुछ़ू, "कुन तू परमेशरेरू मट्ठू मसीह आस?" 62 यीशुए ज़ोवं, "हाँ, अवं तै आईं। ते ज़ेन्च़रां परमेशरेरी किताबी मां लिखोरू कि ‘तुस सारे लोक, मैन्हेरू मट्ठू (यानी मीं) सर्वशक्तिमान परमेशरेरी देइने पासे बिश्शोरे त अम्बरे मरां बिदलारे सेइं साथी धेरती पुड़ एजते हेरेले।’" 63 तैखन महायाजके सेरकोइतां, अपना चोगो छ़िन्दतां आदालतेरे मैन्हन सेइं ज़ोवं, "हुनी असन होरि केन्चेरी गवाहेरी ज़रूरत नईं! 64 तुसेईं एप्पू परमेशरेरी तुहीन शुनी! ते तुस एसेरो कुन फैसलो केरतथ?" तैखन तैनेईं सारे मैन्हेईं ज़ोवं कि, "ऐह मैन्हु दोषी आहे किजोकि एनी परमेशरेरी तुहीन की, एल्हेरेलेइ, एस मौतरी सज़ा दे।" 65 तैखन तैन मरां किछ मैन्हु, तैसेरी बेज़ती केरनेरे लेई, तैस पुड़ थुकने लग्गे। ते किछ मैन्हु तैसेरी एछ़्छ़ी लिगड़े सेइं ढेकतां तैस मुक्‍केईं बाने लग्गे ते तैस सेइं ज़ोने लग्गे, "भविष्यिवाणी केर कि केनि तीं बाई।" ते नौकरेईं भी तैस ट्लेइतां थप्पड़ बाए।

66 ज़ैखन पतरस, महायाजकेरे मेहलेरे अंगने मां थियो, त महायाजकेरे नौकरेनन मरां अक कुआन्श तैड़ी आई।✝ 67 तैसां पतरस अग तपतो लाव। ते तै कुआन्श पतरस तेकतां तैस सेइं ज़ोने लग्गी, "तू भी एस नासरत नगरेरो यीशु सेइं साथी थियो।" 68 पन पतरसे यीशुएरो इन्कार कियो ते ज़ोवं, "अवं न ज़ैनी ते न सेमझ़ी कि तू कुन लगोरिस ज़ोने।" फिरी तै तैट्ठां बेइर डेवढी मां जेव। तैखन कुकड़े बांग दित्ती।

69 ज़ैखन तैसां नौकरैनां फिरी पतरस लव, त तै तैन सेइं, ज़ैना नेड़े खड़े थिये, ज़ोने लग्गी, "ऐह मैन्हु तैसेरे चेलन मरां अक आहे!" 70 पन पतरसे फिरी यीशुएरो इन्कार कियो।

थोड़े च़िरे बाद, ज़ैना पतरसेरे नेड़े खड़े थिये, तैनेईं तैस सेइं ज़ोवं, "पक्‍को तू भी तैसेरे चेलन मरां अक आस, किजोकि तू गलील इलाकेरो मैन्हु भी आस।" 71 तैखन पतरस कसम केरतां ज़ोने लगो, "मीं फिटकार लग्गे, अगर अवं झूठ ज़ोईं कि अवं एस मैन्हु ज़ानतो भोईं, ज़ेसेरे बारे मां तुस गल्‍लां केरने लग्गोरेथ!" 72 तैखन अकदम दूइयोवं बार कुकड़े बांग दित्ती। ज़ै गल यीशुए पतरसे सेइं पेइली ज़ोवरी थी, तै गल तैस याद आई कि, "कुकड़ेरे दूई बार बांग देने करां पेइले तू ट्लाई बार मेरो इन्कार केरेलो कि तू मीं न ज़ानस।" तैखन तैनी बड़ी लेरां दित्ती, किजोकि तैनी यीशुएरो इन्कार केरनेरे वजाई सेइं बड़ो दुखी भोव।