1 तैल्‍ला पत्ती, यीशु तैट्ठां निस्तां अपने नगर नासरते जो जेव। तैसेरे चेले तैस सेइं साथी च़ले। 2 आरामेरे दिहाड़े, यीशु तैन केरे प्राथना घरे मां गेइतां तैन लोकन परमेशरेरी गल्‍लां केरि शिक्षा देने लगो। तैसेरी शिक्षा शुन्तां बड़े लोक हैरान भोए ते एक्‍की होरि पुछ़ने लग्गे, "एनी मैन्हे एना गल्‍लां कोट्ठां शिख्खी? एस एत्री अक्ल कोट्ठां आई? एस एत्रे चमत्कार केरनेरी शक्ति कोट्ठां मैल्ही! 3 ऐह त ट्लखान आहे, ज़ैन मरियमरू मट्ठू आहे। ऐह त याकूब, योसेस, यहूदा, ते शमौनेरो ढ्ला आहे! एसेरी बेइनां भी इश्शे इड़ी रेइचन!" एल्हेरेलेइ तैनेईं यीशुएरो इन्कार कियो। 4 तैखन यीशुए तैन लोकन अक कहावत ज़ोई, "नबी बेइरींए लोकन मां इज़्ज़तदार भोल्हो, पन अपने नगरेरे लोकन करां ते कने अपने रिश्तेदारन करां त कने अपने घरेबालन मां बेइज़्ज़त भोल्हो।" 5 तैन लोकेईं यीशु पुड़ विश्वास न केरनेरे वजाई सेइं, तैनी तैस नगरे मां सिर्फ थोड़े ज़ेरे बिमार मैन्हन पुड़ हथ रेखतां तैना बज़्झ़ाए, तैन केरे अलावा होरो कोई चमत्कार न केरि सको। 6 यीशु नासरत नगरेरे लोकां केरो अविश्वास हेरतां हैरान भोव। तैल्‍ला पत्ती, तै अपने चेलन सेइं साथी च़ेवरे पासन केरे ड्लाव्वन मां परमेशरेरी गल्‍लां केरि शिक्षा देतो राव।

7 तैल्‍ला पत्ती, यीशुए अपने 12 चेले एप्पू कां कुजेइतां, तैन दूई-दूई केरतां भेज़ने लगो। भेज़ने करां पेइले, तैनी अपने चेलन, लोकन मरां भूतां केरो सायो कढनेरो अधिकार दित्तो। 8 ते तैनी तैन हुक्म दित्तो, "बत्तां च़लते-च़लते सोटेरे अलावा होरू किछ न नेइयथ। न रोट्टी न झोलो त कने बेटवे मां पेइंसे भी न नेइयथ। 9 पन बूट लेइयथ, पन दूई-दूई कुरते न लेइयथ। 10 ज़ैखन तुस केन्ची ड्लाव्वें मां गाथ, अगर कोई अपने घरे बिश्नेरेलेइ तुसन कुजाए, त तैस्से घरे मां बिशथ, ज़ांतगर तैस ड्लोंव्वेरां न निस्सथ। 11 अगर केन्ची ड्लोंव्वेरे लोक तुसन कबूल न केरन त कने तुश्शी गल्‍लां न शुन्न, त तैट्ठां च़लते-च़लते तुस अपने पव्वां केरि धूड़ झ़ेड़ी छ़ेडथ* ताके तैन केरे खलाफ गवाही भोए। (अवं तुसन सेइं सच़ ज़ोताईं कि परमेशरेरे आदालतरे दिहाड़े बुरे लोकन सज़ाह देलो, ज़ैना सदोम त कने अमोरा नगरन मां रहते थिये। पन ज़ैना लोक तुश्शी गल्‍लां न शुनेले, तैस नगरेरे लोकन परमेशर बड़ी जादे सज़ाह देलो)" 12 यीशुएरो हुक्म शुन्नेरे बाद, तैनेईं तैट्ठां निस्तां बड़े नगरन मां गेइतां लोकन परमेशरेरी गल्‍लां शुनेई कि, "तुस अपने पापन करां मन फिराथ।" 13 ते तैनेईं बड़े लोकन मरां भूतां केरो सायो भी कढो, त कने बड़े बिमार मैन्हन पुड़ तेल लेइतां बज़्झ़ाए।

14 हेरोदेस राज़े भी यीशुएरे बारे मां शुनू, किजोकि यीशुएरू नवं मुशूर भोवरू थियूं। तैनी यीशुएरे बारे मां ज़ोवं कि, "शायद, यूहन्ना, ज़ै बपतिस्मो देनेबालो थियो, मुड़दन मरां ज़ींतो भोवरोए। एल्हेरेलेइ, तै एना चमत्कार केरि सकते।" 15 होरेईं मैन्हेईं यीशुएरे बारे मां ज़ोवं कि, "शायद, तै मैन्हु एलिय्याह नबी आहे!" पन किछ होरेईं मैन्हेईं ज़ोवं कि, "तै त पराने ज़मानेरे परमेशरेरी गल्‍लां ज़ोने बालां केरो ज़ेरो अक नबी आहे!" 16 पन हेरोदेस राज़े लोकां केरि गल्‍लां शुन्तां ज़ोवं कि, "तै मैन्हु त यूहन्ना आहे, ज़ेसेरी क्रोड़ी मीं कट्टेव्री थी। तै मुड़दन मरां ज़ींतो भोवरो आए!" 17 हेरोदेस राज़े एन्च़रां सोचू, किजोकि थोड़े दिहाड़ना पेइले, तैनी एप्पू अपने सिपाही भेज़तां यूहन्ना कैद केरतां छ़डोरो थियो। तैनी अपने ढ्ला फिलिप्पुसेरी लाड़ी हेरोदियासेरी वजाई सेइं एन्च़रां कियोरू थियूं, ज़ैस सेइं तैनी ड्लाह बनोरो थियो। 18 एल्हेरेलेइ, यूहन्ना हेरोदेस राज़े सेइं बार-बार ज़ोतो थियो कि, "तीं अपने ढ्लाएरी लाड़ी सेइं ड्लाह बनानो जाइज़ नईं।" 19 तैल्हेरेलेइ हेरोदियास रानी यूहन्ना सेइं दुश्मनी रखती थी ते तैस कत्ल केरनो चाती थी। पन तै तेन्च़रां न केरि सकती थी, 20 किजोकि हेरोदेस राज़े पतो थियो कि यूहन्ना अक धर्मी ते पवित्र मैन्हु थियो। तैल्हेरेलेइ, हेरोदेस राज़ो तैसेरी बड़ी इज़्ज़त केरतो थियो त कैदखाने मां हेरोदियास रैनी करां बच़ेइतां रखतो थियो। त तै यूहन्नारी गल्‍लां शुन्तां बड़ो डरतो थियो, पन तैसेरी गल्‍लां खुशी सेइं शुन्तो भी थियो।

21 आखर्कार यूहन्ना मारनेरो ठीक मौको मैल्हो। हेरोदेस राज़े अपने ज़र्मेरी दिहाड़ी मां अक धाम रख्खी। तैस धामी मां तैनी अपने बड़े खास अफसरन, त कने फौजी अफसरन, त कने गलील इलाकेरे बड्डे-बड्डे मैन्हु कुजाए। 22 तैखन हेरोदियास रैनरी कुई तैस कमरे मां आई, ज़ैड़ी तैना बिश्शोरे थिये। त तैसां तैड़ी नेच़तां हेरोदेस राज़ो त कने तैसेरे मेहमान खुश किये। तैखन राज़े कुइये सेइं ज़ोवं, "ज़ैन तू चास मीं करां मग, अवं तीं देलो।" 23 त राज़े तैस कुइये सेइं कसम भी खाइ कि, "ज़ैन किछ तू मीं करां मग्गेली, अवं तीं देलो, इड़ी तगर कि अवं अपनु अध्धू राज़ भी देलो।" 24 तैल्हेरेलेइ तैस कुइयां बेइर गेइतां, अपनि अम्मा पुछ़ू, "अवं हेरोदेस राज़े करां कुन मेग्गी?" तैखन तैसेरी अम्मा ज़ोवं, "यूहन्ना बपतिस्मो देनेबालेरी क्रोड़ी मग।" 25 अकदम तै कुई अन्तर राज़े कां आई त तैस कां मिन्नत की, "अवं चाताईं कि, तू यूहन्ना बपतिस्मो देनेबालेरी क्रोड़ी केटतां एक्‍की थाले मां हुन्ना आन।" 26 तैसेरी गल शुन्तां राज़ो बड़ो दुखी भोव, पन अपनि कसमरे वजाई सेइं त कने अपने मेहमानां केरे वजाई सेइं तैने इन्कार केरनो न चाव। 27 तैल्हेरेलेइ, तैनी अकदम एक्‍की सिपाही हुक्म दित्तो कि, "यूहन्नारी क्रोड़ी केटतां आन।" 28 सिपाही कैदखाने मां गेइतां यूहन्नारी क्रोड़ी कट्टाई, त एक्‍की थाले मां रेखतां आनी त कुइये कां दित्ती। त कुइयां गेइतां अपनि अम्मा कां दित्ती। 29 ऐह गल शुन्तां यूहन्नारे चेले तैड़ी आहे, त तैसेरी लाश नेइतां कब्री मां देब्बी छ़डी।

30 परमेशरेरी गल्‍लां लोकन शुनानेरे पत्ती, यीशुएरे प्रेरित तैस कां वापस आए, ज़ैना तैनी भेज़ोरे थिये। ज़ैन किछ तैनेईं लोकन सेइं कियोरू ते शिक्षा दित्तोरी थी, तैन सारी गल्‍लां यीशु सेइं शुनाई। 31 बड़े लोक यीशु त कने तैसेरे चेलन कां एइते गाते थिये। एस वजाई सेइं, तैन्न रोट्टी खानेरे लेई भी मौको न थियो मैल्होरो। तैल्हेरेलेइ यीशुए अपने चेलन सेइं ज़ोवं, "मीं सेइं साथी केन्ची अकेन्ती ठैरी एज्जा, त थोड़ो ज़ेरो आराम केरा।" 32 एल्हेरेलेइ तैना किश्ती मां च़ेढ़तां, अकेन्ती ठैरी च़ेलि जे।

33 पन बड़े लोकेईं यीशु त तैसेरे चेले गाते लेइतां पिशानी छ़ड्डे कि तैना कोरहां च़लोरेन। तैल्हेरेलेइ, सारे नगरेरे मैन्हु पैदल दौड़तां तैन करां पेइले तैड़ी पुज़तां अकोट्ठे भोए। 34 ज़ैखन यीशु किश्ती पुड़ेरां ओस्सो, त तैनी मैन्हु केरि अक बड़ी भीड़ लेहितां तैन पुड़ तरस खाव, किजोकि तैना मैन्हु तैन भैड्डां केरे ज़ेरे थिये, ज़ैन केरो कोई पुहाल न भोए।* तैखन यीशु तैन लोकन परमेशरेरे राज़्ज़ेरे बारे मां बेड़ि गल्‍लां केरि शिक्षा देने लगो।

35 ज़ैखन दिहाड़ी डुबने लग्गोरी थी, त यीशुएरे चेलेईं तैस कां एइतां ज़ोवं, "ई सुनसान ठारे, ते च़िर भी बड़ू भोवरू आहे। 36 एन मैन्हन भेज़, ताके एना च़ेवरे पासां केरे बेस्तन त कने ड्लाव्वन मां गेइतां अपने लेई खाने जो रोट्टी घिन्न।" 37 पन यीशुए तैन्न जुवाब दित्तो कि, "तुस्से एन खाने जो रोट्टी देथ।" पन तैनेईं तैस सेइं ज़ोवं, "कुन अस दूई शौव दिहाड़ी केरि कमाई सेइं रोट्टी घिन्तां एन मैन्हन खुवाम? एन न भोइ सके!" 38 एल्हेरेलेइ, यीशुए तैन सेइं ज़ोवं, "तुसन कां केत्री रोट्टी आन? गेइतां हेरा।" पतो केरनेरे पत्ती, तैनेईं यीशु सेइं ज़ोवं कि, "पंच़ रोट्टी त कने दूई मेछ़ली आन।" 39 तैखन यीशुए अपने चेलन हुक्म दित्तो कि, "सारे मैन्हु नीले घासे पुड़ बिशाला।" 40 एल्हेरेलेइ तैना मैन्हु शौव-शौव त कने पज़ा-पज़ा केरि हुन्डी मां बिश्शी जे। 41 तैखन यीशुए अपने हथ्थे मां पंच़ रोट्टी ते दूई मेछ़ली ट्लेइ, त अम्बरेरे पासे तेकतां शुक्र कियूं। तैल्‍ला पत्ती, यीशु तैना रोट्टी ट्लोड़तां चेलन कां देते जेव कि लोकन खाने जो देन। तेन्च़रां दूई मेछ़ली भी तैन सारे लोकन बेंटी दित्ती। 42 ते सारे मैन्हु खेइतां रेज़्ज़ी जे। 43 तैल्‍ला पत्ती, यीशुएरे चेलेईं बेच़ोरी रोट्टी त कने मेछ़ली केरे टुक्ड़न सेइं 12 टोकरी भेरि। 44 ज़ैनेईं रोट्टी त मेछ़ली खेइ, तैन मां 5000 मड़द थिये।

45 तैल्‍ला पत्ती, यीशुए अपने चेलन हुक्म दित्तो कि, "तुस किश्ती मां च़ेढ़तां मीं करां पेइले समुन्दरेरे उस पार बैतसैदा नगरे जो च़ली गाथ, ज़ांतगर अवं एन लोकन न भेज़ी।" त तैना तैट्ठां जे। 46 लोकन भेज़नेरे पत्ती, यीशु तैट्ठां निस्तां नेड़े एक्‍की पहैड़ी पुड़ प्राथना केरनेरे लेई जेव।

47 ज़ैखन ड्लोझ़ भोइ, त तै किश्ती, ज़ैस मां यीशुएरे चेले थिये, समुन्दरेरे मझ़ाटे थी, त यीशु अकैल्‍लो ज़मीनी पुड़ थियो। 48 तैनी हेरू कि तैसेरे चेले किश्ती मां च़ेप्पू देइ-देइ परेशान भोने लग्गोरेन, किजोकि एग्रोवरां बड़ी तेज़ हवा च़लोरी थी।

लगभग झ़ेज़्झ़ेरे च़ेवरे बज़ेई ज़ैखन हेजू आंधरू थियूं, यीशु समुन्दरेरे पैनी पुड़ च़ेलतां अपने चेलन कां अव। तै तैन केरां अग्रोवं निसनू चातो थियो। 49 पन ज़ैखन तैनेईं यीशु समुन्दरेरे पैनी पुड़ च़लतो लाव, त तैनेईं सोचू कि तै भूत आहे। तैल्हेरेलेइ, तैनेईं चिन्डां मैरी, 50 किजोकि तैना सारे तैस हेरतां बड़े डेरि जोरे थिये। पन तैनी अकदम तैन सेइं गल्‍लां की ते ज़ोवं, "हिम्मत रखा! अवं आईं। डरा न!" 51 तैखन तै तैन केरि किश्ती मां च़ढ़ो, ते तूफान च़लनो बन्ध भोइ जेव। तैखन चेले बड़े हैरान भोए, 52 किजोकि तैनेईं न थियूं समझ़ोरू कि यीशु केन्च़रां रोट्टी त कने मेछ़ली बधोरी थी, पन तैन केरे मन बेसमझ़ भोरे थिये।

53 तैल्‍ला पत्ती, यीशु त तैसेरे चेले गलील समुन्दरे पार केरतां गन्नेसरत नंव्वेरे जगाई पुड़ पुज़्ज़े। तैड़ी तैनेईं किनारे पुड़ किश्ती बेन्धतां रख्खी। 54 ज़ैखन तैना किश्ती पुड़ेरां ओस्से, त तैट्ठेरे लोकेईं यीशु पिशैनी छ़डो। 55 एल्हेरेलेइ, तैनेईं सारे इलाके मां गेइतां लोकन खबर शुनाई कि यीशु एवरोए। ज़ैड़ी-ज़ैड़ी लोकेईं शुनू कि यीशु एवरोए, तैड़ी लोकेईं बिमार मैन्हु खट्टी पुड़ छ़ुइतां यीशु कां आन्ने लग्गे, ताके तै तैन्न बज़्झ़ाए। 56 ज़ैड़ी कोन्ची ड्लाव्वन मां, नगरन या बेस्तन मां यीशु गातो थियो, तैड़ी लोक बिमार मैन्हन बज़ारन मां यीशु कां एन्हतां रखते थिये। तैना यीशु सेइं मिन्नत केरते थिये कि, तैन सिर्फ तैसेरे लिगड़े सेइं हुरने देन। ज़ेत्रे बिमार मैन्हु यीशु सेइं हथ लाते थिये, तैना सारे बेज़्झ़ोते थिये।