Marcos 9

17 मैन्हु केरि भीड़ी मरां एक्‍की मैन्हे यीशु जुवाब दित्तो, "हे उस्ताद, मीं अपनु मट्ठू तीं कां आनेरू थियूं, ताके तैन ठीक भोए। किजोकि तैस पुड़ भूतेरो सायो आहे, ते तैस गल केरने न दे। 18 कोन्ची भी ठैरी तैन भूत मेरे मट्ठे ट्लाते, ते ज़मीनी पुड़ बिछ़ोड़ते। तैखन तैसेरे ऐशी मरां शैम्फ एइतीए ते तैन दंत कटते ते ठठमुकर भोइ गाते। मीं तेरे चेलन सेइं ज़ोवरू थियूं कि, ‘मेरे मट्ठे पुड़ेरां भूतेरो सायो केढी देथ।’ पन तैना केढी न सके!" 19 एन गल्‍लां शुन्तां यीशुए तैन जुवाब दित्तो, "हे गैर विश्वासी मैन्हव! अवं केइस तगर तुसन सेइं साथी रालो? त केइस तगर अवं तुश्शो अविश्वास झ़ैल्‍लेलो? तैस मट्ठे मीं कां आनां!" 20 तैखन तैनेईं तैन मट्ठू यीशु कां आनू। ज़ैखन तैनी भूते यीशु लाव, त तैनी अकदम तैन मट्ठू मरोड़ू, ते मट्ठू तल्‍ले बिछ़ड़ू। ते तैसेरी ऐशी मरां शैम्फ निसने लग्गी त तैन ड्लेडने लग्गू।

21 यीशुए तैसेरे बाजी पुछ़ू, "एसेरी ऐह हालत केइसेरी देंती आहे?" तैसेरे बाजे ज़ोवं, "बचपनेरी देंती। 22 एस मारनेरे लेई एन भूत बड़े बार कधी अग्गी मां ते कधी पैनी मां बिछ़ोड़तू रहते, पन अगर तू किछ केरि सकतस, त असन पुड़ तरस खेइतां इश्शी मद्दत केर!" 23 यीशुए तैस मट्ठेरे बाजी सेइं ज़ोवं, "तू ऐह को गल केरतस! अगर तू विश्वास केरस, त एन भोइ सकते। किजोकि मीं पुड़ विश्वास केरनेबालां केरे लेई सब किछ भोइ सकते।" 24 तैस मट्ठेरे बाजे अकदम ज़ोरे सेइं लेरां देइतां ज़ोवं, "हे प्रभु, अवं विश्वास केरतईं, मेरी मद्दत केर कि अवं शक न केरि।"

25 ज़ैखन यीशुए हेरू कि बड़े लोक दौड़तां अकोट्ठे भोने लग्गोरेन, त तैनी भूत एन ज़ोइतां डांटू, "हे भूता, ज़ै एस मट्ठे टोव्नू त लट्टू बनातस। अवं तीं हुक्म देताईं, एस मट्ठे मरां निस्सी गा, ते एसमां फिरी कधी भी न एज्जां!" 26 तैखन तैनी भूते चिन्डां मारी त तैन मट्ठू मरोड़ू, फिरी तैन तैस मट्ठे मरां निस्सी जेव। त मट्ठू मर्रू ज़ेरू भोइ ज़ोवं, इड़ी तगर कि बड़े लोक ज़ोने लग्गे कि मट्ठू मेरि ज़ोवं। 27 पन यीशुए मट्ठेरो हथ ट्लेइतां खड़ू कियूं। ते मट्ठू ठीक भोइतां खड़ू भोवं।