1 "हेरा, तै भखते भेट्ठरी ज़ेरि दिहाड़ी* एइतीए, ज़ैखन सब अभिमानी ते सब बुरे लोक अन्नेरो भूंस बनेले; ते तैस एजने बाले दिहाड़े मां तैना एरे भस्म भोइ गाले कि न तैन केरू ज़ील बच़ेलू ते न तैन केरि शाख, सेना केरो यहोवा एन ज़ोते।✝ 2 पन तुश्शे लेई ज़ै मेरे नंव्वेरो डर मनतो भोए, धार्मिकतारो दिहाड़ो निस्सेलो, ते तैसेरी किरणा केरे ज़िरिये सेइं तुसां बेझ़ोई गाले; ते तुसां निस्सतां पालोरे बछ़ड़ेरे ज़ेरे उछ़ड़ेले ते छालां मारेले। 3 तैखन तुसां दुष्ट लोकन ढ्लन्च़ेले, मतलब मेरे तैस ठहरेवरे दिहाड़े तैना तुश्शे पव्वन हैठ मांज़न बेनि गाले, सेना केरो यहोवा एन ज़ोते।

4 "मेरो दास मूसेरो कानून मतलब ज़ैना विधि ते नियम मीं सैरी इस्राएली लोकां केरे लेई तैस होरेब पहाड़े* पुड़ दित्तोरे थिये, तैना याद रखा।

5 "हेरा, यहोवारे तैस बड़े ते भयानक दिहाड़ेरे एजनेरे पेइले, अवं तुसन कां एलिय्याह नबी भेज़ेलो।✝ 6 ते तै अम्मा बाजी केरो मन तैन केरे मट्ठां केरे पासे बदलेलो, ते मट्ठां केरो मन तैन केरे अम्मा बाजी केरे पासे बदलेलो। एरू न भोए कि अवं एइतां धरती नाश केरि।"