होशे 14

आखरी मां इस्राएलेरू दुबारां आबाद भोनू

1 हे इस्राएल, अपने परमेशर यहोवा कांजो वापस एई, किजोकि तीं अपने अधर्मेरी वजाई सेइं ठोकर खेवरीए। 2 ज़ैना प्राथनारी गल्‍लां तीं ज़ोनी आन तैना एप्पु सेइं साथी नेइतां, यहोवा कांजो वापस एइतां तैस सेइं ज़ो, "इश्शे पाप माफ़ केर; दया केरतां असन कबूल केर; तैखन असां शुक्रेरी बलि च़ाढ़मेले।✝14:2 इब्रा. 13:15. 3 अश्शूर असन बच़ेइ न सके, असां घोड़न पुड़ सुवार न भोल्हे; ते न असां फिरी एपनी बनेवरी मूरतन सेइं ज़ोमेले, ‘तुसां इश्शे देबते आथ;’ किजोकि अनाथे पुड़ तूए दया केरतस।"

4 यहोवा ज़ोते, अवं तैन केरि भटकनेरी आदत दूर केरेलो; ते तैन सेइं पूरे दिले सेइं प्यार केरेलो, किजोकि मेरो क्रोध तैन पुड़ेरां उतरी जेवरोए। 5 अवं इस्राएलेरे लेई ओशरो ज़ेरो भोल्हो; तै सोसनेरे फूड़ू केरो ज़ेरो फलेलो, ते लबानोनेरे गैइड़ां केरो ज़ेरो ज़ीलां छ़डेलो। 6 तैसेरे ज़ीलन पुड़ेरां डाल निस्सेले; तैसेरी शोभा ज़ैतूनेरी ज़ेरि भोल्ही, ते तैसेरी खुशबू लबानोनेरे गैइड़ां केरि ज़ेरि भोल्ही। 7 ज़ैना तैसेरी छावी मां बिश्शेले; तैना अन्नेरे ज़ेरे बधेले, तैना दाछ़रे ज़ेरे फलेले-फुलेले; ते तैसेरी मुशूरी लबानोनेरी दाछ़रे रस्सेरी ज़ेरि भोल्ही।

8 एप्रैम ज़ोलो, "मूरतन सेइं हुनी मेरू कुन कम्मे?" अवं तैसेरी शुन्तां तैस पुड़ नज़र बनेइतां रखेलो। अवं सब्ज़ सनोवरेरो ज़ेरो आईं; मीं करां तीं कुन फल मैल्हेलो।

9 ज़ै अक्लमन्द भोए, तैए एना गल्‍लां समझ़ेलो; ज़ै समझ़दार भोए, तैए एन बुझ़ेलो; किजोकि यहोवारी बत्तां सिद्धी आन, ते धर्मी लोक तैन मां च़लते राले, पन पापी तैन मां ठोकर खेइतां बिछ़ड़ेले।