1 यहोवा ज़ोते, लोकन खबरदार केरनेरे लेई नरशिंगो बज़ा किजोकि तैनेईं मेरो करार ट्लोड़ोरोए, ते मेरे कानूनेरे खलाफ बगावत कियोरीए, एल्हेरेलेइ दुश्मन उकाबेरो ज़ेरो यहोवारे घरे पुड़ ट्लुटतां पेलो। 2 तैना मद्दतरे लेई मीं कां बिनती केरेले, "हे इश्शे परमेशर यहोवा, असां इस्राएली लोक तीं ज़ानतम।" 3 पन इस्राएले भलियाई केरनी अपने मने करां दूर कियोरीए; एल्हेरेलेइ दुश्मन तैसेरे पत्ती पेलो।

4 तैना राज़े बनाते राए, पन मेरी मेर्ज़ी सेइं नईं। तैना हाकिम भी बनाते राए, पन मेरे अनज़ाने मां। तैनेईं अपनु सोन्नू चाँदी नेइतां मूरती बनेई ज़ैस सेइं तैन्ना नाश भोइ गान। 5 हे सामरिया, मीं तेरे बछ़ड़ेरी मूरती रद कियोरीए, मेरो क्रोध तैन पुड़ भड़कोरोए। तैना कताली तगर अशुद्ध हालती मां राले? 6 इन इस्राएले सेइं भोवरूए। एन एक्‍की कारीगिरे बनेवरूए, तै परमेशर नईं। एल्हेरेलेइ सामरियारू एन बछ़ड़ू टुक्ड़े-टुक्ड़े भोइ गालू।

7 इस्राएली हवाई बेतन, ते तैना ऐंधरी फसल कटेले। तैन केरे लेई कोई ऊडार न रालू, न तैन केरि फसली मरां किछ अट्टू भोल्हु; ते अगर भोल्हु भी त हमलो केरनेबाले दुश्मन तैस खाएले। 8 इस्राएल निगली छ़डोरोए; हुनी तैना गैर कौमन मां एरे निकम्मे भोइ जेवरेन ज़ेन्च़रे बेकार भांड भोते। 9 किजोकि तैना मद्दत मगनेरे लेई अश्शूरे जो एन्च़रे च़ले जे, ज़ेन्च़रे जंगली गधो झुण्डे मरां भटकते; एप्रैमे यार मज़दूरी पुड़ रखोरेन। 10 अगर तैना गैर कौमन मरां मज़दूर बनेइतां रखन, फिरी भी अवं तैन अकोट्ठे केरेलो। ते तैना हाकिमां केरे ते राज़ेरे बोझे सेइं घटते गाले।

11 एप्रैमे पापबलि देनेरे लेई बेड़ि वेदी बनेवरिन, पन तैन्ना वेदी तैसेरे पापी भोनेरी वजा भोल्ही। 12 मीं त तैन केरे लेई अपने कानूनेरी लखेइं गल्‍लां लिखतां दित्तोरिन, पन तैना तैन बेखली समझ़तन। 13 तैना मेरे लेई बलिदान त केरतन, ते जानबर भी बलि केरतन, पन तैसेरो फल सिर्फ मासे; तैना एप्पु तैस खातन; पन अवं यहोवा तैन सेइं खुशी न भोईं। हुनी अवं तैन केरे अधर्मे याद केरतां तैन केरे पापेरी सज़ाह देलो; ते तैना मिस्रे जो गुलाम बन्नेरे लेई वापस गाले। 14 किजोकि इस्राएले अपनो बनानेबालो परमेशर बिसरतां मेहल बनाए, ते यहूदा बड़े क़िले बाले नगर बसेवरेन; पन अवं तैन केरे नगरन मां अग लेइलो, ते तैस सेइं तैन केरे क़िले भस्म भोइ गाले।