होशे 6

यहोवारे पासे फिरनू

1 इस्राएली लोक एक्‍की होरि सेइं ज़ोतन, "च़ला, असां यहोवारे पासे फिरम; किजोकि तैनी असां छ़िन्दे, ते तैए असन बझ़ालो; तैन्नी असां ज़खमी किये; ते तैए इश्शे ज़खमन पुड़ पट्टी भी बन्धेलो। 2 दूई दिहाड़ना बाद तैए असन बहाल केरेलो; ते ट्लेइयोवं दिहाड़े तैए असन खड़े भी केरेलो; तैखन असां तैसेरे सामने ज़ींते रामेले।✝6:2 लूक. 24:46. 3 एज्जा असां ज्ञान तोपम, बल्के यहोवारू ज्ञान तोपनेरे लेई कोई कोशिश केरम; किजोकि यहोवारू बांदू भोनू झ़ेझ़ेरू ज़ेरू पक्‍कू आहे; तै झ़ेड़रो ज़ेरो असन पुड़ एज्जेलो, बल्के बरसांतरे आखरी झ़ेड़रो ज़ेरो ज़ैस सेइं ज़मीन सेगोतीए।"

इस्राएल ते यहूदारो पश्चात्ताप न केरनो

4 पन यहोवा ज़ोते, हे एप्रैम, अवं तीं सेइं कुन केरीं? हे यहूदा अवं तीं सेइं कुन केरीं? तुश्शो प्यार झ़ेझ़ेरे बिदलारारे ज़ेरे, ते झ़ेझ़री उडरने बाली ओशरी ज़ेरिए। 5 एल्हेरेलेइ मीं नेबी केरे ज़िरिये तैन पुड़ ज़ेरो मैक्‍कु च़लेवरोए, ते अपने वचन्न सेइं तैना मारे, ते मेरो न्याय लौअरो ज़ेरो चमकते।✝6:5 यिर्म. 5:14. 6 किजोकि अवं बलिदाने सेइं नईं, कायम रानेबाले प्यारे सेइं खुश रहताईं, ते होमबेलिन करां जादे इन चाताईं कि लोक परमेशरेरू ज्ञान रखन।✝6:6 मत. 9:13;मत. 12:7;मरक. 12:33.

7 पन तैन लोकेईं आदमेरो ज़ेरो करार ट्लोड़ी छ़डो; तैनेईं तैड़ी मीं सेइं धोखो कियोरोए। 8 गिलाद ज़ुलम केरनेबालां केरू नगर बनोरूए, तैन खूने सेइं भेरतांए। 9 ज़ेन्च़रे डैकू केरि टोली कोन्ची मारनेरी ताकी मां बिशतीए, तेन्च़रे याजकां केरि टोली शेकेम नगरेरे पवित्र ठारारे बत्ती मां मारतन, बल्के तैनेईं महापाप कियोरोए। 10 मीं इस्राएलेरे खानदाने मां अक बड़ी भयानक चीज़ लाहोरीए; तैड़ी एप्रैम वेश्यापन केरते, ते इस्राएल अशुद्ध भोते।

11 हे यहूदा, ज़ैखन अवं अपने लोकन गुलैमी मरां वापस आनेलो, तैस वक्तेरे लेई तेरे बारे मां भी बदलो ठहरावरोए।✝6:11 यिर्म. 51:33;योए. 3:13.