1 Biyɔ ekukuma, beka ekwom bin ɛnyɔɛpe, tɔ epiki ààbɛ nɛ mɛkɔŋ. Nɛ tsɛɛtsɛ guka náá, bi ɛ́ pe ɛ́ nɛ kukuma pɛ tɔ gwoo.

2 Djaalaka Zɛɛb tɔ esosoob. É sok bi di edjaala Zɛɛb ɛ, dika ndjem da bi ɛ́ ɛbulal nyɛ bhɔɔ. 3 É sok bi di edjaala Zɛɛb ɛ, bi goka ɛ́ nɛ ɛbaadjaala pe étɛp’es, etɛɛ náá Zɛɛb needjɛ bis tɛtɛ ze ɛgoola Mbɛɛ Bhaadal yɛ. Mbɛɛ Bhaadal tak nabɛ ɛ́, ɛgoola etɛp e Klisto di syela ɛ. Deenek, dum nɛ tɛp tak ɛ mɛ di nenak é membok’aak. 4 Djaalaka nɛ Zɛɛb etɛɛ náá, mɛ neegoola bhaadal tak popoopwon dáa mɛ di egoka náá, mɛ sa ɛ.

5 Kɛka nɛ etsoŋ djas é mis mɛ bot ɛ́ di ààdum koŋ nɛ Klisto ɔ. Bi ɛ́ di nɛ ba mɔɔ ɛpɛɛd ɛwala zedjɛaa bin, étɛp ɛsa bɛ enɛm esa ɔɔ, saka yɛ. 6 Betka náá, mɛkpa mɛ di ewyis tɔ enuub bin ɛ, ye di embɛɛ mɛkpa nɛ mɛtela djas nɛ mɛgwom dáa mɛsɔn, étɛp bi neegu dáa bi di egoka nɛ ɛyala mot nɛ mot ɛ.

7 Dum nɛ tɛp’am, bi aagwak menduk mam ɛ́ nɛ Tisik mɔn-nyaagam mɛ dyeebakwyɛl ɔ, mot-mɛsa ɛ Ghɛŋ tɔ esosoob, mot bis nɛ nɛ di egyee ɔ. 8 Mɛ dhis nyɛ ɛ́ étɛp nyɛ eezɛdjɛ bin menduk mes, nɛ ɛbaadjɛ bin mɛghaaz. 9 Nyɛ ɛpezyɛ sama bɛ nɛ Onezim, sosoob mɔn-nyɛɛg’ena mena di ekwyɛl tɔ ɛdum ɛ koŋ nɛ Zɛɛb ɔ, nyɛ ɛ́ ngɔt tɔ bɔn-nyɛɛg bena, nyɛ waalɛɛ bin etɛp djas di edhaa wak ɛ.

10 Aalistaalak, mot bis nɛ nɛ di é membok ɔ, bɛ nɛ Malak mɔn-nyɛɛg ɛ Bhaanabhas, bɛ eeswos bin. Bi naazegwak mɛtiŋ mɛ bis nadjɛ bin dum nɛ Malak ɛ, nyɛ kum penek ɔɔ, beka nyɛ ɛnyɔɛpe. 11 Yezu nabaadi ebaadjóoaa Yustus ɔ, nyɛ eeswos bin. Bot binɔk bɛlɛl ɛ, ba bim ekeletyɛ bot ɛ mbyak eYuda nazeni beka ɔ di esa mɛsa mɛ Ɛyoŋ ɛ Zɛɛb bis nɛ bɛnɔɔ ɔ. Deenek, bɛ naadyeebadjɛ mɛ mɛghaaz. 12 Epafalas, mɔn-nyɛɛg’en, mot nadus pɛ kyee dik’en ɔ, nyɛ eeswos bin pe. Nyɛ ɛ́ mot-mɛsa ɛ Yezu Klisto, nyɛ ààkat ɛdjaala Zɛɛb kɔ ɛsu ɛ len, etɛɛ náá, bi neepyet ɛnyɔɛpe, ɛdum ɛ koŋ ɛ len nɛ Zɛɛb neetɔ́ sok, deenek, bi neegheesesa ɛkwosak ɛ Zɛɛb. 13 Mɛ ɛ́ nɛ ghwyil ɛke kɔ ɛsu ɛ lɛ náá, nyɛ ɛpedyeebasa mɛsa ɛbuɛpe étɛp’en, étɛp ekeletyɛ e ghaada Laodhise, nɛ ekeletyɛ e ghaada Yeelapolis. 14 Luk mɔn-nyɛɛg’ena mɛ di ekwyɛl ɔ, mot di ngwomel bot ɔ, bɛ nɛ Dhemas eeswos bin.

15 Swoska bɔn-nyɛɛg bina di pɛ tɔ ghaada Laodhise ɔ, dɔɔ nɛ Nymfa zɛnɔɔ bot ɛ zɛɛga mendjaala di esɛɛga pɛ tɔ ndjaŋ’ɛ ɔ. 16 Bhii bi aasilal ɛlaa mɛkana mak ɛ, kyeedka yɛ pɛ daa bot ɛ zɛɛga mendjaala di pɛ ghaada Laodhise ɔ, da bi ɛ́ laa mɛkana mɛ mɛ nakyeed pɛ yɔbɔ ɛ. 17 Lɛɛka nɛ Aatsipe náá: «Wɔ ɛ́ kobaka! Wɔ goka ɛ́ nɛ ɛsilal mɛsa mɛ Ghɛŋ nadjɛ wɔ ɛ ɛnyɔɛpe.»

18 Mam Pɔl, mɛ eeswos bin. Yɛ ɛ́ mam mɛ ɛmet ɛ kwyal mɛkpa mɛ mɛswosel mak nɛ mbɔ’am met. Sa bi ààdjisa náá, mɛ ɛ́ é membok. Beta náá, enɛm nɛ embɛɛ e Zɛɛb di nɛ nen.